Rom 9
9
Ane ba Esowo jake no yehke
1N kpꞌbungu go etingitingi. N li ka Kraist, efahnge sang n kpꞌkimi. Ntir atahng enyame nyi Etingi Etohko wob no kp-m yiimi ntianse re, 2eltim ename ebgbal ndon ndon.#9:2 Luk 19:41 Ala kpi-m nteele nteele. 3Tibre mefono antahng, n jo sahb sꞌseb re me n jol ejum nkuk, fere yaame a Kraist tib esi ji abonanee ba e lohng ano a bo, 4ba li abon Israel, ba Esowo ko bo ana abon ebe, fere ka bo ellub ene, a agbanngalung enye, a atahm, fere tib bo ana bo bahke jo kak-e, fere nyam anyam tong bo. 5Bo lohng etꞌtohngo ajehng a babnso ejahre ba mahne mahne. Go eyaame ji ngubjing, Kraist tob lohng ano a bo, ye ji ejum ajehng ajehng wob-e go elwo, ye ji li Esowo bi e kp-e tehke go njinanjini. Emen.
6Ane kpee ba lohng go etꞌtohngo ji Israel sang li ane ba Esowo yehke no.#9:6 Rom 2:28 Jia lohngem re, alum Esowo ebfere jol mbol mbol. 7Ane kpee ba lohng go etꞌtohngo ji Ebraham sang li abon ba Ebraham. Tibre Esowo tongo Ebraham re, “Ane ba bahke lohngo go etꞌtohngo ji Aisik ba ba, bo bahke jo lung bo re abon eba.” 8Jia lohngo re, abon ba bo jele bo go mbang nyehka nyehka sang li abon Esowo. Abon ba Esowo nyame no tong re bo bahke jele bo, bo ba li atingitingi abon.#9:8 Gal 4:23 9Tibre ana wo Esowo nyame no re, “Yabv, ngare nyꞌnehm ana nyi m bahke feere. N lꞌba, Sera ebjel mmon.”
10Jol ye ntahngtahng sang. Ejum jꞌnehm a, ji tob lim Rebekka nkal Aisik, nso ejahre, ngare nyi á sa ela. 11-12Ngare nyio á ka jel abon bao. Jol ejumjum bo ka lim ji kpꞌsabe, a ji kpꞌnobo. Esowo tongo Rebekka re, “Ngbokambang a mmon bahke jo loko nkalla,” eji ntoobo nyi Esowo lꞌyiimi, ye ji kpo lung ane ba á ma yehke bo. Esowo kpehme yehke ane tib go eltum ni bo kpꞌlimi. 13Ana nwer Esowo bungu no re, “Jekob wo jo kor-m, Eso jo sab-m.”
14Anv, e bahke bungu renan? Esowo limm go etingitinga? Eꞌee, ano sang!
15Tibre á bungu tong Moses re,
“Nne no lꞌkor-m, ye wo m bahke tahme ka-e.
Nne no lꞌkor-m wo bahk-m fili ndon.”
16Fvfo, ane ba Esowo kpo yehke, bo limm ane ba kpo kor na bo. Jol bo limm ane ba kpo lim eltum tib esi jio. Esowo kpo yehke ane ba kpo fil-e ndon.#9:16 Ef 2:8-9
17Tibre nwer Esowo bungu tong Fero re, “M bob-a etul, eji n lꞌko-a, jo tib nsahm enyame, mbing enyame fere lohng go njini kpee.”
18Fvfo, Esowo, nne no kor-e no, ye wo kpo fil-e ndon. Á kpo lim ane bel etahnsi ana kor-e no.
Erakatahng ji Esowo, a ndon enye
19Nne ewahne awohng li-m ma tong re, “Jen ji wahnge Esowo kpo ka nne ebi? Nne awo bahke ma kpan Esowo go nsol nyi á kpꞌlimi?” 20Mbi, anv, wo elkohn nne awo no bahke ma faange Esowo go nnyo? Anv, etu kpo bahb ntꞌtoko re, “Jen ji wahnge a ma-m to ana?” 21Ntokatu sang kpi nsahm nyi á bahke koko ndi, to etu ana kor-e noa? Á li ma ko ndi nyꞌnehm ona nyi á ma mong, to etu ji nno, a ji kpꞌsabe.#9:21 2 Tim 2:20
22Kpo kor Esowo re á tib erakatahng eje, fere lim ane kahn re á kpi nsahm. Owo wahnge á kpo kpuumu, fere jo kpooro tib go esi ane ba kpo lim re atahng jo rak-e, bo jio ji á ma toobo bo bum re á rannge bo,#9:22 2 Pit 3:9 23eji á lꞌlim ane kahn afang nyao nya ellub ene ni á bahke kake ane ba jo fil-e ndon, bo ji á ma toobo bo bum re bo bel ellub ene.#9:23 Ef 1:3-14
24Wahr ba li ane bao ba á ma lung, Jus ji ji sang, ane baka baka fvfo.
25Ana Esowo bungu sehng go nnyo mi nnyehnamahr Hosea re,
“Ane ba ki jol ane ebame,
m bahke lungu bo re ane ebame.
Nnenkal no ki-m jo kor,
m bahke jo lung-e re Akor-m.
26Edi ji bo tongo bo re,
wahn ane ebame sang!
Edi jꞌnehm ona ji, bo bahke fere jo lung bo re,
abon ba Esowo bi li go elkpin.”
27Aisaya jo rabe bade Israel re,
“Abon Israel lꞌrur ana asahknti,
ebsake bi bi bahke bele eltahre.
28Tibre Jehova bahke gohro lam ejahbe jio elwaare elwaare.
Elam eje bahke jolo ji nno.”
29Ana Aisaya tohko bung re,
“Ki li re Esowo bi Sebaot tahre ebsake bum,
kehn wahr ebfere jol ana Sodom, a Gomorra.”
30Anv, ejum aji e bahke bungu? Ane baka baka ba ki jo seb re bo li eno go esamahr bi Esowo, bobli eno ji ane ba ma taame kpo li. 31Wo, abon Israel ba Esowo yehke bo, bo jo noko re bo li eno ji ane ba kpo bum atahm kpo li. Jol bo liim.#9:31 Rom 3:22; 10:20-21 32Jen ji wahnge bo ki li eno? Tibre bo jo gare re bo li eno go eltum atahm abumu, go eltaame sang. Owo bo kehm sele gbo go eltal elsele nio ni li Jisos, 33ni nwer Esowo bungu no re,
“Nyehnen, n kpꞌbumu eltal go Sayon,
ni ane bahke jo seele.
Ekpartal jio wo, bo bahke jo gbo.
Nne no lꞌtaame tv-e,
bo we nehm riki ndon.”#9:33 Mat 21:42-46
Currently Selected:
Rom 9: EKA-011
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
