Rom 11
11
Anv, Esowo ebten na Israela?
1N kpꞌbahbe re, anv, Esowo ebten ane ebea? Eꞌee! Mefono antahng, me nne Israel wo. Me mmon no Ebraham wo. N lohng go etꞌtohngo ji Benjamin.#11:1 Fil 3:5-8; 1 Tim 1:13 2Esowo ka ten ane ebe, ba á tohko kahn bo, bo kehm jini. Ń nehme kahn edi nwer Esowo ji Elaija bungu a Esowo bada Israela?
3Á bungu re, “Ntul, bobwul abanyehnamahr eba, fere wa adi njom alimi enya. Me n sa ntahngtahng, gana bo kpꞌsebe re bo wul-m.”
4Anv, Esowo faang-e renan? Á faang-e re, “Me n kuuru ane atahltahl nkpel elkubal ane atahl awubu (7,000) bum elname, ba kala jamme alahng, kak Baal.”
5Ano wo fvfo tob li ngare nyꞌnehm ana. Ebsake ane ba Esowo ma yehke tib go ege a nnoobo.#11:5 Rom 9:27 6Lꞌfere jol re á yehke bo tib go ege a nnoobo, o lohngo re, go bo eltum sang. Tohko jol ano, nnoobo kpeem li nnoobo.
7Jia lohngo renan? Israel tikem bel ji bo jo seb. Ane ba Esowo yehke bo ba bele. Erik ane jehko bele etahnsi.#11:7 Rom 9:31
8Ana nwer Esowo bungu no re,
“Esowo ebkak bo etohko jio ji ellu alale,
fere kak bo amahr nya bo lꞌkꞌkpe jo nyehn,
fere ka bo atung nya bo lꞌkꞌkpe jo wuk tete rehng lela.”#11:8 Mat 13:14-15; 2 Tes 2:10-12
9Devid kpe bung re,
“Nong, nkak ebo nyi bo kpo lim siingi nlehke,
a ekpoko ji bo bahke gboko,
a esiti mbang ji bo bahke seele,
eji lꞌjol eltuuru ebo.
10Nong, amahr ebo bamme,
eji bo lꞌkꞌkpe jo nyehn.
Si bo elsol ni nnen,
bo jo jen ano ngare anyehng anyehng.”
11N kpꞌbahbe re, Anv, bobsel elsel ni bo bahke gboka? Eꞌee! Ebꞌbi ebo ji wahnge eltahre ma rehng goji ane baka baka, eji bo lꞌjo teele Israel ala. 12Eji abiafem nya Israel ko afang ba ka njini, fvfo ekpak bi bo gbo no bi ma lim ane baka baka ma gbo afang, elfuulu bahke gbale sehng ngare nyi Israel kpee bahke feere goji Esowo.
Ana ane baka baka bele eltahre
13Anv, n kpꞌbungu a nahne wahn ji ki li abone Israel. Eji n li ntiingetib no Esowo tum-m tv ane baka baka, n kpꞌgeere kak eltum ename, 14eji limi limi kan n lꞌlim ala jo teele ejahbe ejame, n fere tahre egom ebo jindiki.#11:14 Elt 13:46-47 15Tibre eji eltene ni Esowo tene Israel limi re, njini jol go etem a Esowo, jen ji bahke jolo ngare nyi Esowo lꞌkpe ko bo? Bahke jolo elkpin ka akvne. 16Ngbokambang lꞌfere jol ka Esowo, ane ebe bako kpee tob li ka-e fvfo.#11:16 Jon 17:16,19 Nlohk eti lꞌjol ka Esowo, abꞌbo tob li ka ye fvfo.
17Esowo ebgbakke abꞌbo oliv nyandiki go oliv ji á bahme go ege etahngga. Owo wahnge á kehm-a koko, wo ji li ana mbꞌbo oliv ji li go ekulugbe, ba lak-a edi ji á gbakke abꞌbo nyako, eji a lꞌtob jo bel alahb ma kpo lohng go alohk, fere bel afang nyao nya oliv jio.#11:17 Ef 2:11-13,19 18Owo wahnge a lꞌkꞌjo daange abꞌbo nyako nya bo ma gbakke tub go. Á lꞌfere lim ano, jo buumu re, wo mbꞌbo, wo sang kpo ka nlohk elkpin. Nlohk nyi kpo ka-a elkpin.#11:18 Jon 4:22
19A bahke bungu re, “Esowo gbakke abꞌbo nyako, eji á lꞌbel eyake, ko-m ba lake.” 20Jio lohko li go etingitingi. Abꞌbo nyao Esowo gbakke tib go bo ekꞌtaame. Eltaame ena ni wahnge a kpe yim. Ka jo geere! Ga nob re wo jo fahl. 21Esowo tahrem abꞌbo nya tohko jol o bum. Anv, a kpꞌtiri re á bahke wo tahre buma? 22Nyehnen, nnoobo nyi Esowo, a elbibi ene ni á kpo bib. Á kpo bib a ane ba ma gbo, fere jo tib-a nnoobo, a lꞌsoro asi go ege a nnoobo.#11:22 Hib 3:14 Tohko jol ano á bahk-a tob gbahk tub go fvfo.#11:22 Jon 15:5-6
23Abꞌbo nyako tohko sa ano ano go bo ekꞌtaame, Esowo bahke kpe feere a bo, ba lake, tibre á kpi nsahm nyi á bahke ma lim ano.#11:23 2 Kor 3:14-16 24Esowo eblim ejum ji ane lꞌkꞌtiki lim, eji á song kim-a, wo ji li ana mbꞌbo oliv ji li go ekulugbe, fere ko-a ba lake go oliv ji á bahme go ege etahngga. Lꞌlim renan, á lꞌkꞌko abꞌbo nya tohko jol o, feere a nya ba lake go bo etii?
Ana Esowo bahke fere ko Israel
25Abonanee, n kpꞌsebe re wahn kahn ejum jia ji li mbehr mbehr, eji ń lꞌkꞌjo geere kak elnahne. Ejange Israel ajehng ebfere tahne asi. Etahnsi jio bahke jolo tete rehng ngare nyi nfange ane baka baka ma biingi, ba bahke bake goji Esowo.#11:25 Luk 21:24
26Owo Israel kpee bahke kehm bele eltahre, ana nwer Esowo bungu no re,
“Ntꞌtahre bahke lohngo go Sayon ba,
ba yehke abꞌbi nya wob go etꞌtohngo ji Jekob.#11:26 Mat 23:39; Ell 1:7
27A wo li egbanngalung ji m bahke limi a bo.
Ngare nyio nyi m bahke ruku abiafem ebo.”
28Tib eji bo tene nnoobo etib, owo wahnge bo ma fere jol anebekv ba Esowo tib go egahne esi. Tib eji Esowo ma yehke bo, bo kpeke li akpondahme enye tib go esi ji babnde ebo. 29Tibre Esowo kpehme yaange ntir atahng enye bade ane ba á lꞌyehke bo, a ayare enye. 30Wahn ane baka baka, wuku wuku ń taamem tv Esowo. Anv, Esowo ma-n tib ndon enye tib go bo ekꞌtaame. 31Ano wo fvfo bo ki tob taame tv Esowo, eji Esowo lꞌtob tib bo ndon enye, ana á ma-n tib.
32Tibre Esowo eblim ane kpee ebwoomo go ngbekobo nyi ekꞌtaame ebo, eji á lꞌtib bo ane kpee ndon enye.#11:32 Gal 3:22
33Afang nya Esowo, elkahne ene,
a elgbere ene ebsehnge eso.
Nne awo bahke ma ko Esowo elfono?
Nne awo bahke ma kahn mbang nyi Esowo kpo lim nsol enye?
34Ana nwer Esowo bungu no re,
“Nne awo kpꞌkahne ntir nyi Jehova?
Nne awo tub-e elle?#11:34 1 Kor 2:16
35Nne awo ma kꞌka Esowo ejum ji Esowo bahk-e gale?”
36Nsol kpee lohng go ege.
Ye wo wahnge nsol kpee li no.
Nsol kpee li ka ye.
Nong, ellub jol ka-e go njinanjini. Emen.
Currently Selected:
Rom 11: EKA-011
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
