Mika 2
2
1Den mus luku bun! Den di e sidon prakseri kruktudu èn di e didon prakseri ogri tapu den bedi. Dan den e du a ogri te dei opo, fu di den abi a makti fu du en. 2Efu den poti den ai tapu wan pranigron, den e fufuru en teki. Efu na wan oso den wani, den e puru en na a sma anu. Na so den e puru den sma oso na den anu èn teki den sani di den sma abi. 3Na fu dat'ede MASRA taki: Luku, Mi o du a folku disi wan ogri èn den no o man kibri den ede gi en. A o de wan ogri ten di o meki den bokru den baka. 4A pisten dati den o teki un leki wan eksempre. Den o singi fu sori fa un lasi ati. Den o singi taki:
“A kba!” sma sa taki.
“Den broko wi te na gron.
San ben de fu mi pipel,
sa kon ini anu fu doroseisma.
A puru en na unu anu.”
5Fu dat'ede, te den o trowe a lot fu prati a kondre, no wan sma sa de di o gi unu wan pisi gron na mindri fu a folku fu MASRA.
6“No preiki gi unu,” den taki. “Yu no kan taki den sani dati. Tapu now nanga den skempi di yu e skempi unu. 7Na disi Gado taki o psa nanga a folku fu Yakob? Na so esi MASRA e lasi En pasensi? Na disi na san A o du?” Den sani di Gado taki e sorgu taki ala sani e go bun nanga a sma di e libi leki fa Gado wani. 8Ala yuru Mi pipel e libi leki feyanti nanga den sma di no wani feti srefsrefi.#2:8 A Hebrewtekst fu a pisi disi no krin. Den e fufuru den langa dyakti fu den sma di e psa èn di no ben ferwakti srefsrefi taki disi bo miti den. 9Un e yagi den umasma fu Mi folku puru ini den oso pe den ben e libi switi fu den. A blesi di Mi ben gi den pikin, un e fufuru fu têgo puru na den anu. 10Un opo! Un gwe! Dyaso no de wan presi fu un tan langalanga. Fu di a kondre no krin meki a e tyari soso pori kon na doro. Iya, wan pori di e nyan go moro fara. 11Efu wan sma ben de di e waka e ferteri soso lei nanga sani di no warti srefsrefi tak': “Gado e meki mi si win nanga tranga dringi,” dan a folku ben o si so wan man leki wan trutru profeiti.
12Fu tru, Mi sa tyari Yakob kon na wan.
Fu tru, Mi sa tyari den sma fu Israel di tan abra kon na wan.
Mi sa tyari den kon na wan
leki fa den e tyari skapu kon na wan ini wan skapupen,
leki fa den e tyari den meti ini wan wei kon na wan na ini wan grupu.
Bun furu sma sa de.
13A sma di e broko ala sani puru na pasi
e go na fesi.
Den e broko kon na doro,
den e psa a bigi doro kon na doro.
A kownu fu den e go na fesi,
MASRA e waka na fesi.
Currently Selected:
Mika 2: SB16
Highlight
Copy
Compare
Share
Want to have your highlights saved across all your devices? Sign up or sign in
Tekst © Surinaams Bijbelgenootschap 2016
