aEzikyel 31
31
AMasar wa aAshur
1Kà̱ nra ngga nggəshi ka̱ ape aga ashatɗing ka̱ ashe ìzun iga igba̱pchi ama̱n pa̱ zəng te, uYawe là nnap ká̱ mi pa̱, 2<<Á ya anəm, là ûFirona uponzhi uga aMasar ka̱ nggatək wò pa̱,
<< <Ká̱ uda mí mal ichumchum ɓu yà?
3U mal ka̱ aAshur va wa ìkun asida ka̱ aLebanon,
ìva ká̱ igwong iɓyenɓyen ká̱ ayi ikún,
ìva rup pa̱ makmak,
ishishi ɓa chu ka̱ ashe ìlulu.
4Ndəng nak na rup, nshinggət nak na mak.
Oga awang i nang i gáng atak va̱ mmá suk na kà̱.
Oga avan awúwang i nang,
ka̱ avəng nkpaktak ikún iga apal nzam.
5Te uza̱ rup ji nkpaktak oga ikún iga apal nzam,
oga igugwong twat,
kang oga igugwong á tə́p wang,
ka̱kul ndəng kúr na kúr.
6Nkpaktak inyil iga apaɓur ká oga abək oza̱ ka̱ igugwong,
kang nkpaktak izhé iga anyin mar ivan oza̱ ka̱ avəng igugwong.
Nkpaktak mbín ra ka̱ avəng ayiyi.
7Nrurup ɓyen byet, oga igugong wang,
ka̱kul oga alələng zhip ga ashe mbin ka̱ ashe ndəng.
8Ikún asida va̱ ka̱ ashe ìram Inan te á chu kà̱ ìɓiɓyen ka̱t.
Oga ikún akasharina á chu mal ká̱ igugwong ka̱t.
Oga ikún adurimi a chu mal ká̱ igugong ka̱t.
Ìkun ìro yà ka̱ ashe ìram Inan ɓyen chu kà̱ na ka̱t.
9N nak na uza̱ ɓyen, kang igugwong yəl,
nkpaktak oga ikún aEden, ka̱ ashe ìram
Inan á nəm ìkpəkpar.
10<< <Ka̱kul nva̱ ta te, uNəm uga nzhi uYawe là pa̱, Ka̱kul pa̱ uza̱ rup chit, ishishi ɓa chu ka̱ ashe ìlulu, kang ìgugwak fam ka̱kul nwuwang, 11mi na na ka̱ awó anəm ukamkam uga nnəm ká̱ oga mbín. Mi pyát á na ka̱ apal ingənga. M mandar na chit ka̱ agbagba. 12Onəmchən va nəm ayər ji pa̱ nkpaktak ka̱ ashe oga mbín te, oza̱ kyen na tak kang oza̱ re na. Igugwong tak ka̱ apal oga aɓam ká̱ nkpaktak oga aba̱nda̱m, kang ivan igugwong ɓun tak ka̱ ashe nkpaktak oga nwangsang kà̱ mbin. Kang nkpaktak mbín ngga apambin fa ka̱ akum ayiyi re na. 13Nkpaktak inyil iga agbagba iga apaɓur i ra ka̱ apal ìkun va̱ ru ta, kang nkpaktak izhé iga anyin i ranggang ka̱ apal igugwong. 14Mmá nəm wa nnà ta̱ le kang oga ikún va̱ ka̱ anung ndəng te, oza̱ a rup oza̱ a wang pa̱ makmak ishi oza̱ a ɓa achu ka̱ ashe ìlulu ka̱t, ka̱kul le kang ikún va̱ ka̱ nwá ndəng te a wang wa njini ka̱t. Ka̱kul mmá na oza̱ chit ka̱ ikú, iga aAdit, nzəng ká̱ onəm oga ngga ka̱ ashe awap.
15<< <UNəm uga nzhi uYawe là pa̱, <<Ká̱ nda va̱ uza̱ ga aShəwol te, n nak ngbà̱ng ndəng gún na kang à yə́ng ikú ka̱kukul. N nak oga awuwang sat, oga ndədəng mmákmak fú. N nak aLebanon kpa̱r ka̱kukul kang nkpaktak oga ikún iga ashe nzam tók ka̱kukul. 16N nak izər tán ká̱ mbín va̱ fe nnáp nruru, ka̱ awalang va̱ m màng na ga aShəwol nzəng ká̱ onəm va̱ kà̱ ngga ka̱ ashe awap. Kang nkpaktak oga ikún iga aEden, ká̱ oga ikún iga aLebanon va ɓyen ji, iva ndəng kúr oza̱ kúr te, mmá sak oza̱ ka̱ aShəwol. 17Te oza̱ ga nzəng ká̱ na ka̱ aShəwol, oza̱ ga ya onəm va̱ mmá gbá̱ng ká̱ ndokchi, oro va kà̱ ntəm ka̱ avəng ayiyi ka̱ ashe mbín.
18<< < <<Ka̱ ashe oga ikún iga aEden te, uda mí mal ìɓyen ɓu ká̱ ichumchum ɓu ká̱ yà? Káp ká̱ nnà te mi ga ká̱ ɓu ka̱ Adit nzəng ká̱ oga ikún iga aEden. Ɓu təm nzəng ká̱ onəm oga achè amulur, ká̱ onəm va̱ mmá gbá̱ng ká̱ ndokchi.>>
<< <UFirona wa ta ká̱ nkpaktak nggatək wò, mmami, uNəm uga nzhi uYawe, n là.> >>
Currently Selected:
aEzikyel 31: YER
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
