aEzikyel 27
27
Ǹyə́ng ikú ka̱kul aTaya
1Te uYawe là nnap ká̱ mi pa̱, 2<<Mmaɓu, á ya anəm, yə́ng ikú ka̱kul aTaya. 3Là á na pa̱, <Uza̱ va ra ka̱ anung asa̱l aga ntar ìwá, atak va onəm oga ǹyap ka̱ ǹyap ká̱ i gwang kà̱, mmami uNəm uga nzhi uYawe, n là pa̱,
<< <ÁTaya, u là pa̱,
u ɓyen paɗi.
4Oga iwá á gáng oga aswari ɓu,
onəm oga mme ɓu nəm ɓu iya̱m iga mɓyen ndər.
5Oza̱ nəm oga akun ɓu ká̱ ikún afir aga aSenir,
oza̱ kyen akun asida ka̱ aLebanon
ka̱kul nnəm akun a wangwang va i kpan asang ajirgi kang i chen.
6Oza̱ nəm iya̱m iga nchi ajirgi ndəng ɓu
ká̱ oga akun aalon aga mbin aBashan,
oza̱ nəm atak ntəm á ɓu ká̱ akun akasharina
aga anung ìwá aKitim,
oza̱ ɗa̱mshi na ká̱ inyin nlàlàp.
7Mmá nəm oga abasəm ɓu ka̱ alinin anəna̱n,
aga nra̱p nza̱m aga aMasar, ka̱kul na á sat iya̱m iga ǹnyám ìpir nnàp.
Mmá ra̱p atani ɓu ka̱ alinin aga ndəng izər ìvyau
ka̱ nrəzang pa̱ ga̱r aga anung ìwá aElisha.
8Onəm oga ntəm ka̱ aSidon ka̱ aArwat òmà onəm oga nchìchi.
Onəm oga aghan va̱ ka̱ ashe ɓu, áTaya, òmà onəm oga mpyal ajirgi ndəng.
9Onəmgbak oga aGebal ka̱ onəm oga aghəghan òma yà nzəng ká̱ ɓu,
oza̱ ka̱ nzwan atak nggwang akun ajirgi ɓu.
Nkpaktak ajirgi ndəng ká̱ onəm oga nchìchi
ɓa ka̱ atak ɓu ka̱kul ǹyap ìyap.
10Onəm oga aPasha ka̱ oga aLut ka̱ oga aPut òma yà
ka̱ ashe oshozha ɓu oga nnəm ìkum ɓu.
Oza̱ zong oga nggwanggwang
ka̱ oga atagya acham ka̱ ashe ɓu,
kang oza̱ i rup ká̱ ɓu.
11Nkpaktak onəm oga aArwat ka̱ oga aHelet gáng akamsəlang ɓu i pángchí atak,
kang onəm oga aGamat ǹnyi te oza̱ ka̱ apal atak aga mpángchí atak ɓu.
Oza̱ zong oga nggwanggwang oza̱ pa̱ kpaktak ka̱ izər akamsəlang ɓu.
Oza̱ nak ìɓyen ɓu ɓyen ndər.
12<< <ATarshi nəm ìyap ka̱ ɓu, ka̱kul mmak ìdur ɓu, te uza̱ yap oga iya̱m ìyap ɓu ka̱ aazurfa, ka̱ acham, ka̱ aguza, ka̱ acham aləbər. 13OYavan, ká̱ oTubal, ká̱ oMeshek, òmà okpa ìyap ɓu, oza̱ yap oga iya̱m ìyap ɓu ká̱ onəm, nzəng ká̱ oga ikpáng acham arə́zàng ka̱ atak ǹyap ìyap ɓu. 14Onəm va̱ ka̱ Nzhi Togarma ǹnyi te, oza̱ yap iya̱m ìyap ɓu ká̱ ipərí, ká̱ ipərí ìkum, kang ká̱ oga alabitəri. 15Onəm oga aDedan nəm ìyap ká̱ ɓu. Oga mbín pa̱ kyák ngga anung ìwá tong okpa ìyap ɓu. Oza̱ mwa ɓu ká̱ inyin nlàlàp ká̱ akun aeboni.
16<< <AAram nəm ìyap ká̱ ɓu, ka̱kul mmak iya̱m ɓu. Oza̱ yap iya̱m ìyap ɓu, ká̱ ipáng ndəng ìpəpa, ká̱ atani arəzang pa̱ ga̱r, ká̱ iya̱m nlòk iga nra̱p nza̱m, ká̱ alinin anəna̱n, ká̱ ipáng irəzang, ká̱ ipáng iga mbwai. 17AYahuda ká̱ mbin aIsa̱rila nəm ìyap ká̱ ɓu, oza̱ yap iya̱m ìyap ɓu ká̱ ìzangzəng, ká̱ iya̱m-nrì, ká̱ ndop irizhe, ká̱ afal mmì mpyet, ká̱ njəng nnə́ngnəng nchángchàng. 18ADamaskus nəm ìyap ká̱ ɓu ka̱kul mmak iya̱m ìyap ɓu, ká̱ mmak ìdur ɓu. Uza̱ yap iya̱m ɓu ká̱ ndəng ìba̱ngba̱ng ngga aHelbon, ká̱ awulu aləfər. 19ADan ká̱ aYawan aga aUzal nəm ìyap ká̱ ɓu, oza̱ yap iya̱m ìyap ɓu ká̱ acham, ká̱ akasiya, ká̱ iya̱m inə́ngnəng.
20<< <ADedan nəm ìyap ká̱ ɓu, ká̱ oga agodo aga nnak nkongkong ìpəri. 21OArabiya ká̱ nkpaktak ovan ponzhi oga aKedar nəm ìyap ká̱ ɓu, ká̱ ivan inagam, ká̱ inagam kang ká̱ iɓə́l. 22Onəm oga ǹyap ìyap oga aSheba ká̱ aRama nəm ìyap ká̱ ɓu, oza̱ yap iya̱m ìyap ɓu ká̱ iya̱m inə́ngnəng pa̱ ɗongɗong inəna̱n va ji pa̱ kpaktak, ká̱ nkpaktak oga ipáng iga mbwai, ka̱ azənariya.
23<< <AHaran ká̱ aKane, ká̱ aEdan, ká̱ onəm oga ǹyap ìyap oga aSheba, aAshur, ká̱ aKelmat nəm ìyap ká̱ ɓu. 24Ka̱ ashe ǹyap ìyap ɓu oza̱ nəm ìyap ká̱ ɓu, ka̱ oga ilukwan iga mbwai iɓyenɓyen, ká̱ oga ilukwan iga ndəng izər ìvyau, ilukwan iva mmá ra̱p nza̱m kà̱ pa̱ ɗongɗong, ká̱ akapet aməlamməlam, kang ka̱ oga asang amyármyar aɓyenɓyen.
25<< <Oga ajirgi ndəng aga aTarshi nnà i wur oga iya̱m ìyap ɓu.
Te u rup kang u myak u ga mpyal kà̱ ìshimshe oga iwá.
26Onəm oga nchi ɓu ga ká̱ ɓu ka̱ ashe ìnang ìwá.
Ǹyə̀r ngga asa̱l nfa alum ɓa chwan ɓu kà̱ ìshimshe ìwá.
27Ndur ɓu, ká̱ oga iya̱m ɓu, ká̱ oga iya̱m ìyap ɓu,
ká̱ onəm oga nchi ajirgi ndəng ɓu, ká̱ onəm oga nchi akwati,
ká̱ onəm oga nzwan atak nggwang akun ajirgi ɓu,
ká̱ okpa oga ǹyap ìyap ɓu,
ká̱ nkpaktak onəm oga nnəm ìkum ɓu,
ká̱ nkpaktak nggatək onəm va̱ ka̱ ashe ɓu,
te oza̱ i zhip ka̱ ashe ìshimshe ìwá kà̱ ìlum iga nru ɓu.
28Ka̱kul nnáp ayə́ng onəm oga nchi ajirgi ndəng ɓu te,
mbin i yənggət,
29kang nkpaktak ovəngva̱ kpán akun aga nchichi,
ká̱ nkpaktak onəm oga nchi oga ajirgi ndəng
i fa ka̱ ashe oga ajirgi oza̱
i tong ka̱ apal nzam.
30Oza̱ i yə́ng ayə́ng arwarwa ka̱kul ɓu,
oza̱ i wung mɓwang ka̱ ishi oza̱,
kang i ɓəndəng ka̱ ashe nchwang.
31Oza̱ i kpat ishi oza̱ ka̱kul ɓu,
oza̱ i mwàk ilukwan ikú.
Oza̱ i yə́ng ayə́ng arwarwa ka̱kul ɓu.
32Ka̱ ashe nshì ìpyang oza̱ ka̱kul ɓu te,
oza̱ i yə́ng, oza̱ i là pa̱,
<<Uda mal ká̱ aTaya yà?
Kang ǹyangmata̱ uza̱ kà̱ nra pa̱ kwák ka̱ avəng ìwá á.>>
33Ka̱ awalang va̱ oga iya̱m ìyap ɓu fa apambin te,
u nak onəm pa̱ makmak dur,
u nak oponzhi ga apambin dur ká̱ mmak ìdur ɓu
kang ká̱ oga iya̱m ìyap ɓu.
34Ǹyangmata̱ te iwá chwan ɓu chit ka̱ ashe oga atak agbá̱nggbà̱ng.
Oga iya̱m ìyap ɓu ká̱ nkpaktak onəm oga inok ɓu,
oza̱ zhip ndəng nzəng ká̱ ɓu.
35Nkpaktak onəm va̱ ra ka̱ oga mbin ngga anung ìwá,
te ayər nəm oza̱ ka̱kul nɗaktak va̱ ya ɓu.
Ayər nəm nkpaktak oponzhi oza̱,
kang oga asa̱l awú oza̱ ga̱ɓa̱n.
36Onəm oga ǹyap ìyap ka̱ ashe oga mbin i nap avyal á ɓu,
u sat iya̱m iga nnəm ayər ká̱ oza̱.
Kang u yà lap ka̱t mbyet mbyet.> >>
Currently Selected:
aEzikyel 27: YER
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
