Хуруҷ 20

Даҳ фармун

1Ав вахт Худо ҳамаи иш гапт афармой: 2«Ман Худованд тав Худоимк, тав чи Миср, чи бандагӣ кат ажуварим.

3Пас, беғарзи Ман тав ани худоти навоот.

4Ягун бути ё ягун чизи мисоли, хапи бахшат натош, хоҳ осмунӣ воот, хоҳ заминӣ ё хоҳ замини обти так. 5Автитиса саҷда накун, ке автити ибодат накун, чобахшак Ман Худованд тав Худоим. Ман ғаюр Худоимк, додоти гуноҳти бахша, пуллотишинт то сеюму чорум наслк, Ман шим дорошт, ҷазо туфарумишт. 6Аммо одамтик, Ман азиз дорошту фармунтим иҷро куношт, то ҳазор пуштисашинт меҳру вафо кунумишт.

7Чи Худованд Худой нумт суистифода навар, чобахшак Ман одамик, чи Ман нум суистифода кунчӣ, беҷазо намунумишт.

8Ёдит носк, шанбе мет — муқаддас мет хаст. 9Ҳама арктит ухш мети бид кун. 10Аммо авдум метк, шанбе мет хаст, Ман бахша, яъне тав Худованд Худой бахша ҷудо кун. Шанбе мет ҳич арки накун, на ту, на жутату ғайкт, на ғулуму канизт, на чорвот, на ғарибитк, ҳавлит хаст. 11Зеро Ман Худованд ухш мети осмуну замину баҳри ҳама чизу чорайпишинт ҳаст акуним. Ке авдум мети дам аносим. Анипти бахша Ман Худованд шанбе мети баракат атуфариму муқаддас акуним.

12Додову очайт иззату ҳурмат кун, то ав заминик, Ман Худованд Худот тав туфарумишт, умрт ван воот.

13Одам натухой.

14Зино накун.

15Дуздӣ накун.

16Ҳичохси ҳақи дуруғ шаҳодат натуфар.

17Ҳамсояй кату инчу ғулуму канизу ғову хар, яъне ягун ави чиз тамаъ накун».

Халқи чукайрак

18Вахтик халқ тундуру чахмоқу дид иктагӣ ғари авенору шохкарнайи овоз адуғушор, ҳама чи тарс аларзору чи ғар дир авор. 19Ке Мусойса авор: "Ту мохпи гап деҳ, мох ғуш дорим, лекин Худо мохпи гап надеҳот, мабодо мирим". 20Мусо халқиса аво: "Начукайрт! Худо ухта хастк, шумох санҷоту Ави тарс шумохпи воот, то ки гуноҳ накунт". 21Ке халқ дир авуштору Мусо сахт тора ҷогайсак, Худо авока хой, наздик авӣ.

Қурбунгоҳи борай

22Ав вахт Худованд Мусойса аво: «Исроилитиса иранка во: "Шумох авентик, Ман чи осмун шумохпи гап адеҳим. 23Ман мунтагӣ хапти бахшашинт нуқрагию тиллоӣ худоти соз накунт. 24Чи ғирек Ман бахша қурбунгоҳ соз куну авока чи сутуру вузу ғовит сухсунтагию сулҳи қурбунити ур. Ман ҳар ҷогаик, зикри нуми бахшам сабаб вита хаст, воwумишту тав баракат туфарум. 25Агар чи санг Ман бахша қурбунгоҳ соз кун, ах чи тоштагӣ сангти накун, чобахшак агар теша расун, ах палид вичӣ. 26Ман қурбунгоҳи зинапояйнит насан, мабодо тав аврат яхшот"».

Currently Selected:

Хуруҷ 20: yai

Highlight

Compare

Copy