Maatiyoosi 28
28
Yesuusi akka tootoppa xa'e
Maari 16:1-10; Luqa 24:1-12; Yoha 20:1-10
1Ete sampata orra Yihuta tarpeeyye, torpaappaayye kuyyaata paayyotati, paraappanne Mektelitteetase Maariyaami isho Maariyaamise a pila hawlase tooyya'e aanen. 2A isi qara in upnin mali piita ka a kuttati lellehete; erkampattoota a Poqalla ka moonte lekkatte ka shilase hawlase tura dufen sukisse ka qara kutiite. 3Fuula erkampattooseti akkima hankaada mina'e la'ayni mehaddaadi a kalsatte nefo, akka fuuttota mina'e ati. 4Tooytampayasene erkampattoose fuura qaran xaate, ixaren ka akkima orra le'e mina kodden. 5Erkampattootase xoori i'iskattaseti kiite, “Ishina akkima Yesuusise fannisame faanittan in upaay, in fuuran. 6Akkima turan kide mina'e, tootoppa ixa'e are in co. Pora oppa mookame nefo xooya are tooyya. 7Ka jarjartan aana ka tamaarewwaadi kida, ‘Ha tootoppa ixa'e ka piita Kelila opa ishin tura qatta akka eyye isha akkitan’ Tin in ishina leleey.”
8Sekkamma ishootta aren ifuurri ka aren harmo xasoonni ka jarjartan alle hawlase kapa aanen ka tamaarewwaadi torreeta hiren.
9Yesuusi ka poroppa ishootta mina de'e ka ishootta kide, “Nakayta a ishina koddo!” Ishootta ka isha kapopa de'en ka loqqaadi quda qaqqapaden ka ishi sakataden. 10Sitiiyyi Yesuusi ka ishootta kide, “in fuuran aana ka akka piita Kelila opa aanane'e, hellaanno lela; eyye ana akkaneey.”
11Iskattase ete annooyye, tooytampayasene oppaayye orra demo katama karopa aane ka wa kodde piisa saarra qeesewwaati torre. 12Saarra qeesewwa ka qimoota piita olliiyyi kurpa kuti'en ka olli oorsaden ka foolisoota kaaja kuttaya daashen ka ishootta kidene, 13“Samayta kida ‘An ino mukneeyye halkeetti tamaarewwaadi de'en ka pukkaadi haten.’ 14Oton mukissampayta nefo dakayaayye sede ino isha harfisha ka akka ishina in rakkinini kodaay.”
15Tooytampayasene ka kaajasene teyyaden ka akkamoose a ishootta kidamte qara koden. Sede ka a kuttati orra Yihuta oppa dakaatte ka awwe ikki torraammi.
Yesuusi tamaarewwaadi ture akkaade
Maari 16:14-18; Luqa 24:36-49; Yoha 20:19-23; koda 1:6-8; Qoro 1ta 15:3-8
16Tamaarewwasene kudanka takka xoori, irrootase piita Kelila kara kitto a Yesuusi akka qaropa aanane ishootta lele qaropa aanen#Maati 26:32; Maari 14:28 . 17Ka ete isha akkeneeyye, ishi sakataden. Orra demo xoori, in dukaysanne. 18Yesuusi ka de'e ka ishootta kide, “Hupna ukkumeeta piisa piita ka moontanne ana'e daasame. 19Semmalla oori aana ka orra piita piisa maxxa aappa ka a Inna ka a Hapura Qulqullootatin jaqqa Ka tamaarewwaayyo koda#koda 1:8 . 20Ka waan anti ishin ajaje piisa akka kodane'e, ishootta kollisha. Tin anti haka piraampirati awta piisa ishin olliiwwin caay.”
