Maatiyoosi 26
26
Sullaata Yesuusi qara Sulamte
Maari 14:1-2; Luqa 22:1-2; Yoha 11:45-53
1Yesuusi ete haasoosene piisa dikkishe kammaayye, itamaarewwaadi kide, 2“Kuyyaata lakki kammaayye akka xaysonessuma a qaran tarpeeta koddito i'uptan inna nama nefo fannisama turopa tuukkaman.” #sooka 12:1-27
3Sitiiyyi saarra qeesewwa ka qimoota piita, tikase a qeesitta kutta a Qayyaaffa karopa ollopa aanen. 4Ka akka falqan Yesuusi qapan ka isha ishshane suladen. 5Ka kidene, “Akka samaytoppa horayta in xa'innini'i, kuyyaata xaysonessuma oppa in koddinin.”
Akka iskatteeta takka shittootan Yesuusi daatite
Maari 14:3-9; Yoha 12:1-8
6A Yesuusi piita Pittaaniyaatiiyyi, tika Simoonise paaqa dakinta a tuullino qapooyye cooyye, 7iskatteeta takka, shuubba a daka alpastiroosi oppa kodame a oppa shittoota akata heraan kokkoka immakaatte, qapatte ka isha kapopan deete; a damta dammooyye matta qara ishi tuqte. #Luqa 7:37-38 8Tamaarewwaadi ete sede akkeneeyye, imiirooden ka kidene, “Shittootose maana malla asse patta patte? 9Shittoose kaaja kuttaati katama ka kaajosen hiyyeessa qootammi in heenne.” 10Yesuusi ka wa ishootta kiinaane upnaade ka ishootta kide, “Iskatteese wa fayya'e ana kooteey, maana'e isheetta payyahinnittan? 11Hiyyeessa awta piisa ishin kapaaw caan; anti xoori awta piisa ishin kapa an kinnaado. #ooreta 15:11 12Ha isheetta shittootose a ana qara tuqte, hawla ana harmissa malla. 13Anti dukaatannen ishina kiini, piisse qara, pora oppa otootose a fayya torraammitto pisa oppaayye, wossen a koote, akka ishin matte oorsatamto'e, torraaman.”
Yihuta akka Yesuusi qapsiissa owsade
Maari 14:10-11; Luqa 22:3-6
14Sitiiyyi tamaarewwasene kudanka lakki oppaayye, asqorottittase Yihuta kidammo, saarra qeesewwa kapopa aane ka ishootta kide, 15“Katin Yesuusi tarpisha ka ishina daashaayye, maana ana daassan?” Ishootta ka dakara pirreeta kunda sessa ishi daashen. #Sakka 11:12 16Ikka kiseetoseti desa paayye ka aroota a ishi ettanto a oppan Yesuusi qapsiiso faddanni.
Yesuusi akka eetota a qaran tarpeeta tamaarewwaadi olli dame
Maari 14:12-21; Luqa 22:7-14, 21-23; Yoha 13:21-30
17Xaysonessuma laaqqota oppaayye, kuyyaata paayyotati tamaarewwa Yesuusi ka Yesuusi kapopa de'en ka ishi kidene, “Eetotase a xaysonessuma qaran tarpeeta akkan aysha ke harminno heenta?” 18Isha ka ishootta kide, “Katamaappopa aana ka tika a nama a akkittane opa kulla ka ishi kida, ‘Kollissampayta ikiini'i, kiseetiyyo idehaatteey, anti tikaayti'in tamaarewwaayyo olliiyyi eetose a xaysonessuma a qaran tarpeeta dama.’” 19Tamaarewwaadi ka akka Yesuusi ishootta lele qara koden; ka eetotase harmishen. 20Ete shishshipteeyye, Yesuusi ka tamaarewwasene xaadi kudanka lakki olliiyyi eetota kuti'e. 21A damtoppa caaneeyye, Yesuusi ka ishootta kide, “Dukaatannen ishina kiini, ishin oppaayye nama takka ana qapsiisa” 22Tamaarewwasene xaadi ka harmo nyarrahen ka matta mattan ishi kidene; “Hela Poqallaay, ana koddita?” 23Yesuusi ka ishootta oorshe ka kide, “Nama ana olli saahina kara wateeta poottanno, isha ana qapsiisa. #mas 41:10 24Inna a nama akkima qootaadi desa taafamte mina'e ito'an; ma xoori namoose inna a nama qapsiiso, oo isha kido! namoose kati in dalannini ishi wayyi” 25Yihutase isha qapsiiso ka kide, “Kollissampayto, hela ana?” Yesuusi ka ishi kide, “Akka kiite mina.”
Qulqulloota qurpaana
Maari 14:22-26; Luqa 22:15-20; Qoro 1ta 11:23-25
26A damtoppa caaneeyye, Yesuusi ka laaqqota qeede ka qara Waaqa kalataysade ka oppa moosse ka tamaarewwaadi daashe ka kide, “Hinda ka dama, sene so'ayyooy.”
27Ka tiwwa qeedeew ka Waaqa kalataysade ka ishootta daashe ka kide, “Pisani tiwwoose kara ikka! 28Sede diikase xayyo a kodayteeta haaraya a diissata, juppoota orra lekayta malla tuqamooy. #sooka 24:8; Er 31:31-34 29In ishina kiini, hakan mankisteeta aappinnootiiyyi luukkata a wayneeta haaraya a diipamte ishin olli ikko kara'e, arepa desa luukkata wayneetose diipamte lammatta an ikko.” 30Ka ete masmuureta dawaden kammaayye, irroota Taprasayti qaropa fayyaden.
Yesuusi akkima peetiroosi isha marmado turanneew lele
Maari 14:27-31; Luqa 22:31-34; Yoha 13:36-38
31Sitiiyyi Yesuusi ka tamaarewwaadi kide, “Itaafamte ka kiini ‘Sikmaytan daysha, xelloota kahirra ka olkela pasta.’ Semmalla awwe halkeesse oppaayye alle ana diissan ka ana kapa qahatan. #Sakka 13:7 32Ma xoori, awtan tootoppa xa'o kammaayye, piita Kelilaati'in ishina qatta.” #Maati 28:16
33Sitiiyyi Peetiroosi ka oorshe ka kide, “Kati punu orra piisa alle ke diisha ka ke kapa qahaayye, anti pakkanna ke kapa an qaho.” 34Yesuusi ka oorshe ka ishi kide, “Dukaatannen ke kiini, awwe halkeesse are kitto oppaayye, a lukkalitta in iyyinin turanne, sessaanne ana marmatta.”
35Peetiroosi ka kide, “Kadi punu toota koddinittaayye, ke ollin to'a diisheey, pakkanna ke an marmado.” Tamaarewwasene ata hase piisa ka asseew kiden.
Yesuusi akka Ketesemaaniiyyi qinsade
Maari 14:32-42; Luqa 22:39-46
36Sekkammaayye Yesuusi ka tamaarewwaadi olliiyyi pora a Ketesemaani kidammo opa aane ka tamaarewwaadi kide, “Disi tulopan aana ka qinsadaay, ishina areppa tawa.” 37Ka Peetiroosi isho hella Saptiyoosi lakki isi quda qeede ka nyarrahata ka qaapeeta paayye. 38Ka ishootta kide, “Hakan toota qara kayno'en akata nyarraheey; areppa tawa ka ana olli japaada” 39Ka shakkayteeta ishootta kapa desa heeqqe ka itturan desa pi'e ka fuula piitan qape ka qinsade ka kide, “Aappo xanno, oton ikoddiniiyyi, tiwwosene a rakkoota a ana qara tarpen; ma xoori a xaayti qara koddito diisheey, xayyo qara in koddinin.”
40Ka sekkammaayye tamaarewwasene xaadi sessa kapopa tiitaawe ka ishootta muke akke ka Peetiroosi kide, “Hela saateta takka nefo ana olli japaatta malaaltene? 41Akka ekkaysuma ishin qara in kaynini'i, japaada ka qinsada; hapura iharmisade so'a xoori nukkullayaay.”
42Ka lammatta aaneew ka qinsade ka kide, “Aappo xanno, oton tiwwosene a rakkoota hakan ikko maliiyyi ana qara tarpa koddini in kinniniiyi, a xaayti qara koddito.” 43Ka tiitaaweew ka ishootta a ildaasso mukittaan ulsaadene ikka mukene akke. 44Ka alle ishootta kapa aaneew ka waasene a deyyo oppa'ew oore ka a sessattati qinsadeew. 45Ka sekkammaayye tamaarewwaadi kapopa tiitaawe ka ishootta kide, “Hela amma ikki muknittan ka nessannittane? Tin saatetase a oppa inna a nama harka juppoolaya oppopa qapsiisaman ikayteey, 46xa'a ka anna; tin isase ana qapsiiso idesa kayeey.”
Akka Yesuusi qapame
Maari 14:43-50; Luqa 22:47-53; Yoha 18:3-12
47Ete sede afaappa in dikkinniniiyi, Yihuta, isase tamaarewwaadi kudanka lakkippa takka kodde, ide'e. Isha olliiyyiiw, samayta a koraatewwa isho kumaya qaqqapade, kuttayta ka de'e; ishootta saarra qeesewwa isho qimoota piita kapa erkamen. 48Yihutase isha qapsiiso turanneew orraseti milikkita daashe ka kide, “Nama an anti dinko isha faanittaneey isha qapa.”
49Ka eennow Yesuusi kapopa dehaade ka isha dinke ka kide, “Kollissampayto, a nakayta ke koddo.”
50Yesuusi ka ishi oorshe ka kide, “Mootto! Wa malla deete dikkishe.” Orrase ka oori Yesuusi kapopa desa de'e ka isha qape. #26:50 “mootto, wa malla deete dikkishe” taaki “ata mootta, maane deete?” 51Sitiiyyi orra Yesuusi olli co oppaayye takka ka koraatetaadi yuke ka orxayta a qeesitta kuttati dayshe ka qudaayye napahata kate. 52Sitiiyyi Yesuusi ka ishi kide, “Orra koraateeta orropa oorsanno koraatetanneew pirammiiy, koraatetaayti korkortaadi karopa oorsado. 53Hela katin aappinno qinsadaayye, a erkampattowwa a kola xela oranna #26:53 lekiyooni kolaa a xela anna takkan, “torpampaya kuma afuri dippa keni paayyatte haka kuma lehi mina caae” qapanni a kudanka lakki qara qapa ana in erkinini ke pahata? 54Oto asse kodditooyye, mataaffasene a qulqulloota kiina'e, ‘Rakkoota akkatta isha parpaaccisni;’ oori ayshanne dikkadan?”
55Etosenetiiyyi Yesuusi ka samaytaseti kide, “Hela akkima tiyyoolayta qapnaan mina'e, koraatewwa isho kumaya pohatten ka ana qapa deetene? An tika qulqulloota kela kuyyaata piisa kollinnooyye, ishina ana a qapne. #Luqa 19:47; 21:37 56Ma wa malla se pisa koddite, akka waasene a xuumampaya taafene dikkadan malla.” Sitiiyyi tamaarewwaadi piisa ka alle isha diishen ka kapa qahen.
Yesuusi akka firtishoonkota turopa dehaade
Maari 14:53-65; Luqa 22:54-55, 63-71; Yoha 18:13-14, 19-24
57Sekkammaaye orrase Yesuusi qape ka tikase a qeesitta kuttati a Qayyaaffa opan aanen. Kollissampaya a seera isho qimoota piita tikase karopa ollopa xoren. 58Peetiroosi xoori, haka tikase a qeesitta kuttati'i lake desa Yesuusi kamma aane ka piraamprqaraadi tooyni ka tikase karopa kulle ka tooytampayaappa qaa'e. 59Saarrasene a qeesewwa isho firtishoonkota Yihuta piisa ka akka Yesuusi qara toota faratamto'e maakkiyya darta pora faani. 60Kadi punu maakkiyya darta lekaya dehaaden nefooyye, maakkuma minan isha qara toota faratamto in teyne. Piraampira qaraayye nama lakki ka dehaade ka haasawade ka kide, 61“Ha namoose ikide, ‘Tikoose a Waaqa qulqullaawte alle qitqitissa ka kuyyaata sessa kara qupeeta in ettansha.’” #Yoha 2:19
62Qeesittase kutta ka xa'e ka isha kaassade ka kide, “Wossen a orroose ke qara maakkumma oppa we takkan nefo a oorisso?” 63Yesuusi xoori jawi kide. Qeesittase kutta ka ishi kide, “Atti oton a Kiristoosi a inna Waaqatiiyyi, akka ino lelto'e, maxxa caattanpaytase a Waaqatinnin ke xaxacciisni.”
64Yesuusi ka ishi kide, “Akkamase a kiite mina ma xoori, in ishina kiini, arepa desa, a inna a nama harka hupnampayta Waaqati akkitta kutiinaan ka moonte xata oraaraappa deenaane akkitan.” #Taani 7:13
65Sitiiyyi qeesittase kutta ka miirode ka mehaddaadi isi quda kakkaa'e ka kide, “Waaqa ote! Ishina ka otittaadi dakayteneey sede qaropa maakkitta maana'e parpaaccista?#Lewi 24:16 66Maana ishina pahata?” Ishootta ka oorshen ka kidene, “Toota isha parpaaccisni!”
67Ikka oori sitiiyyi ildaappa ishi tuttufaden ka oppa qiden. A demo ka isha kakkandiishen ka kidene, #Issa 50:6 68“Kiristoosi, intoonno, xuuma haasawado, ayno ke kandishe.”
Akka peetiroosi Yesuusi marmade
Maari 14:66-72; Luqa 22:56-62; Yoha 18:15-18, 25-27
69Peetiroosi tika qeesittase kutta karanne lakoppa qaa'e. Sitiiyyi orxayteeta takka ka isha kapopa deete ka ishi kiite, “Atti kuli Yesuusise a piita Kelila olliiw kitta.” 70Isha xoori i'orra piisa tura marmade ka kide, “Wa kiinitta an upo!” 71Ete xarroppa xata sookeeyye, orxayteeta a pila ka isha akkiteew ka orra eeppa co kiite, “namoose Yesuusise a piita Naasirati olli ca.” 72Peetiroosi ka lammatta marmadeew ka xaxade ka kide, “Anti namoose an upo!” 73Eta shakkaya kammaayye, orrase eyyeppa qaaqa'ade ka Peetiroosi kapopa dehaade ka ishi kide, “Damayaaytiiw ke lelliiy, atti asu dukaatanne ishootta oppa a takka.” 74Sitiiyyi Peetiroosi ka kide, “Anti namoose an upo!” Ka isi jiijeeta ka xaxatta paayye lukkalitta ka eennow iyye.
75Sitiiyyi Peetiroosi isase a Yesuusi ishi kide, “A lukkalitta in iyyinin turanne sessaan ana marmatta.” Isha matte oore ikka lakopa alle sooke ka a kuttati pooye.
