Maatiyoosi 19
19
Yesuusi qoota hemittati desa kollishe
Maati 5:31-32; Maari 10:1-12; Luqa 16:18
1Yesuusi ete haasoosen dikkishe kammaayye, piitase a Kelilaati xa'e ka piitase a Yihuta a kirra Yurtaanoositi afa disiti kittopa aane. 2Samayta kuttayta ka isha kamma aane, ikka eyye ishootta dinshe.
3Sitiiyyi Feresaata ka Yesuusi kapopa deete ka isha ekkaysatta faate ka isha kaassatte ka kiite, “Hela nama wa koddina piisa minanne akka iskatteetaadi alle diisho ifaqqatamte?”
4Yesuusi ka ishootta oorshe ka kide, “Isase kiinitto, ‘Waaqa paayyota qara diirta ka iskatteeta uume; hela a nappapne?#uuma 1:27; 5:2 5Ka kideewwe se minan nama aappaaysho isho aayyaasso'e alle diisha ka iskatteetaadi quda kodda; ishootta lakki ka dakinta takka koddan.’ #uuma 2:24 6Semmalla arepa desa ishootta takkan diisheey lakkin semmalla wa Waaqa ollopa jaqqalshe, nama olkela in poqqinnin.”
7ishootta ka ishi kidene, “Ka kuli Muuse maana malla ajaje ka kide, ‘Nama a warqata ishin iskatteetaadi diinno ishetta daasho ka alle ishetta diisho?’” #ooreta 24:1-4; Maati 5:31
8Yesuusi ka ishootta oorshe ka kide, “Muuse, qoota karittaayshin dundune malla akka iskattaayshin alle diissane ishina faqqate diisheey, paayyota qara assen.
9“Anti xoori in ishina kiini: Nama a iskatteetaadi a in dahalsannin mali alle isheetta diinno ka a pila hemino piisa idahale, [Nama iskatteetase a diirtaadi alle isheetta diishe hemino piisa, dahalmayta.”]#Maati 5:32; Qoro 1ta 7:10-11 #19:9 maatiyoos 5; 32 Qoro1ta7; 10-11
10Tamaarewwaadi ka ishi kidene, “Oto kallaata diirta isho a iskatteetaadi asse kodditeeyye, hemeeta alle diissata wayyi.”
11Yesuusi ka ishootta oorshe ka kide, “Hemitta mali kallaatta, orra ishootta daasamte mali orra piisa in koddito. 12A kunaya kodde ka dalade icaan; a nama ishootta mure nefo icaan a mankisteeta moonta malla kiide ka a kunaya mina isi dikna ka caaneew. Nama a sede teyyatta ettaninno, a teyyado.”
Yesuusi akka hella' sake
Maari 10:13-16; Luqa 18:15-17
13Sitiiyyi Yesuusi akka harkaadi hella qara qapado ka ishootta qinsado'e, orra Yesuusi kapopa hellaan de'e. Tamaarewwaadi xoori orrase'e fuken.
14Yesuusi ka ishootta kide, “Mankisteeta moonta a sene asse pappahaati'iy; hella in dawran diisha ikka ana kapopa de'en” 15Ka harkaadi ishootta qara qapade; ka oori porose oppaayye qinda pila opa aane.
Kaassuma xayyoolayse takka teyantoodeeti
Maari 10:17-31; Luqa 18:18-30
16Takkaayye nama takka ka Yesuusi kapopa de'e ka ishi kide'e, “Kollissampayto, akkan caatta parapara akkado'e, koda a paxaara maana kodeeta ana faani?”
17Yesuusi ka ishi oorshe ka kide, “Qoota wa paxaaraati desa, maane ana kaassanni? Waaqa takkaytaaw paxaariiy, oton caatta parapara akkatta heentaayye, ajajadda tooytaado.”
18Namase ka kide, “Ajajadda a xaamane?”
Yesuusi ka ishi oorshe ka kide “Ajajaddasene kiina'e, ‘Nama in ishshan; in dahalan; in hatan, deerta in maakkuman, #sooka 20:13-16; ooreta 5:17-20 19aappaayshin isho aayyaassin ulfeesse ka akka isi jaalannitto mina'e, orra piisa jaalado.’” #sooka 20:12; ooreta 5:16; Lewi 19:18
20Xayyoolaytase ka kide, “Sene piisan tooytaadeey, wa pila a ana hase maana?”
21Yesuusi ka ishi kide, “Oton qaja mali kinnaatta faaniiyyi, aane ka wa a qapta piisa kate ka teekolaya qoote, teyanta moonteeyye akkattaay; ka xooye ka ana kamma de'e.”
22Xayyoolaytase ete sede dakayeeyye, qoota teyanta kutta qapo malla, nyarrahatanne alle aane.
23Sekamma Yesuusi ka tamaarewwaadi kide, “Dukaatannen ishina kiini, teyantoolayta'e mankisteeta moonta oppopa kalta, akata kokkoki! 24In ishina kiini, a teyantoolayta mankisteeta Waaqa oppopa kalo kapaayye, a kaala qaawa marfeeta karan kullo sholla'i.”
25Tamaarewwaadi ete sede dakayeneeyye, harmo oppa qawwaawen ka kidene, “Ka kuli asseeyye, ayno dineeta ettansha?”
26Yesuusi ka ishoottopa tooyyade ka kide, “Sede nama in ettansamto ma, Waaqa'e we piisa ettansammi.”
27Sitiiyyi Peetiroosi ka kide, “Ino we pisan alle diinne ka ke kamma deeneey, ka kuli maanan akkanna?”
28Yesuusi ka ishootta kide, “Anti dukaatannen ishina kiini, oto we piisa haaraya koddinaaneeyye, inna nama ka suufaanaadi a ulfeena qara kuti'aneeyye, awse ishina ana kamma deena, sufaana kudanka lakki qare kutiitan ka kaffasene a Isira'eeli kudanka lakki qara farattan. #Maati 25:31; Luqa 22:30 29Nama ana malla kide ka tika, taaki hellaasso, taaki tuparraasso, taaki aappaaysho, taaki aayyaasso, taaki hellaadi, taaki dula alle diishe, harka dippa akkada; ka caatta parapara kuli lehada. 30Ma xoori, orra tura qate kuttayta kammopa oora, a kamma qate ka turopa oora.” #Maati 20:16; Luqa 13:30
