Maatiyoosi 16
16
Feresaata isho Saatuqaata akka Yesuusi ekkaysatta faate
Maari 8:11-13; Luqa 12:54-56
1Feresaata isho Saatuqaata Yesuusi kapopa deete ka isha ekkaysatta isha kaassatte ka kiite, “Intoonno, moonte xata milikkita ino akkisheey#Maati 12:38; Luqa 11:16” 2Isha xoori i'ishootta oorshe ka kide, [“Oto kalakalaawtooyye, ikkiinittane, ‘Moonta itiimnaatteey, i'awda’ 3Oto para qinnooyyeew, ikiinittane, ‘Iparanpareey, iroopa’ senen desa moonta quda tooyeetan wa kodda leleeta i''uptan, ma wa xeltoose oppa kitta leleeta a ettaninni a kittan.] 4Xelta neeqa ka amanammi in kinnin milikkita akkaaw faani milikkita a xuumampaytase a Yoonaasi mali milikkita a pila ishetta'en daasamo” Ka alle ishootta kapa aane. #Maati 12:39; Luqa 11:29
Haddaya Feresaata isho a Saatuqaata kapa sekaatta
Maari 8:14-21
5Tamaarewwaadi ete pakateeteeyye afa disi opa tuulleneeyye, laaqqota isikela teyyatta teymen. 6Yesuusi ka ishootta kide, “Ishina haddaya Feresaata isho a Saatuqaata kapa sekaada ka istoytaada.” #Luqa 12:1
7Ishootta ka oori olli kidene, “Ha qootan laaqqota iskela an teyyannin malla asse kide koddita.”
8Yesuusi ka sede upnaade ka ishootta kide, “Ishina a amanteeta ishina qajatte, qoota laaqqota iskela teyyatta diissatati desa maana malla olli torraannittan? 9Into ammikki ishina in kalle? A laaqqota ken nama kuma ken kayte akka moossowwa kela satara meeqaappa immakten, matteeyye a oorsanni a kittane?#Maati 14:17-21 10Taaki a laaqqota tappa nama kuma afuri kayte akka moossowwa kela satara meeqaappa immakten, matte a oorsanni a kittane?#Maati 15:34-38 11Eten ishina kide, ‘Haddaya Feresata isho a Saatuqaata kapa isitoytaadaayye’ Akkiman qoota damtati desa ishina an lellini, atta ishina in kallin?” 12Tamaarewwasene oori, akkima Yesuusi ishootta kiino, “Tamaareta Feresaata isho a Saatuqaata kapa sekaada” Ka qoota haddaya laaqqota kara lahannaane lelli in kinnin, siti ishootta kalte.
Peetiroosi akka qoota Yesuusi desa maakkume
Maari 8:27-30; Luqa 9:18-21
13Yesuusi ete piita Filippoosi qeesaariya kayeeyye, itamaarewwaadi kaassade ka kide, “Ata orra ayno inna namati kiini?”
14Ishootta ka ishi oorshen ka kidene, “Orra demo ikiini, ‘Yohaannisise pishaan orra jaqqino’ A demo ka kiiniiwwi, ‘Eeliyaasi’ Orra pila ka kiiniiwwi, ‘Ermiyaasi taaki xuumampayaappaayye takka.’” #Maati 14:1-2; Maari
15Ikka kideewwe, “Ishina ayno ana kiinittanew?” #Luqa 9:7-8
16Simoonise Peetiroosi kiinaan ka ishi oorshe ka kide, “Atti a Kiristoosi, a innasene a caattampayta Waaqa” #Yoha 6:68-69 17Yesuusi ka isha oorshe ka kide, “Simooni inna Yoona! Aappaase xanno moonte kalo sede ke la'ayshe diisheey, nama ke in la'anneey, i'eeppisamte! 18Anti nefo in ke kiini, atti a Peetiroosi!#16:18 a shshila “peetiroosi” kideeta afa Kirikkitinni “shila” kideeta. Anti shilose qara'en maapariyyo a amanteeta qaatisha, umma hupna neequmta nefo maaparose puta in ettansho. 19Anti fura mankisteeta moonta'en ke daasha; nama piita qara hiito moonte asseew hidama; nama piita qara furto, moonte asseew furama” #Maati 18:18; Yoha 20:23 20Ka sekkammaaye oori, akkima isha Kiristoosi kodde akka nama takka nefo in lellini'i, ishootta ajaje.
Yesuusi qoota rakkoota a isha qara kayto isho a tootaaditi desa haasawade
Maari 8:21-33; Luqa 9:22-27
21Awseti desa paayyatte Yesuusi oori akkima Yursaalamipa anta ka harka a qimoota piita ka a saarra qeesewwa isho a kollissampaya a seera oppa rakkatta ka ishshama ka kuyyaata sessattati tootoppa xaana isha faanitto tamaarewwaadi la'assa paayye.
22Peetiroosi xoori xawwi desa Yesuusi qeede ka isha fukke ka kide, “Poqallaay, pakkanna in koddinin; sede ke qare in kaynin!”
23Yesuusi xoori alle tiitaawe ka Peetiroosi kide, “Atti seetano, ana kamma oore! Dikattose xaayti dikatta nama diisheey, a Waaqa'en; akka ana tura kehayta kodditeey.”
Yesuusi kamma anta rakkoota a qapto
Maari 8:31; 9:31; Luqa 9:23-27
24Sitiiyyi Yesuusi itamaarewwaadi kide, “Nama ana kamma deena heeno piisa, a isi qara karitta kutado ka masqalaadi haadado ka ana kamma ishin de'o. #Maati 10:38; Luqa 14:27 25Nama issin paha heeno piisa isi patinni; ma xoori nama ana malla kiino ka isi patinno, piisa issinni pahan. #Maati 10:39; Luqa 17:33; Yoha 12:25 26Nama kati wa piisse qara ca piisa akkada ka kapa isi dapaayye, maana isha qara nessissa? Taakiti nama maanaanne isifurada? 27Inna a nama erkampattowwaadi olliiyyi ulfeena aappaayshotitin de'a ka awse nama piisa akka kodaadi mina daasha. #mas 62:12; Maati 25:31; Roomi 2:6 28Dukaatannen ishina kiini, sene are qa'anna oppaayye orra inna a nama a mankisteetaadin deeno haka akkan maliiyyi in leenini takka takka ca.”
