Maatiyoosi 13
13
Pahanasene a qotampayta a xotta qupnooti
Maari 4:1-9; Luqa 8:4-8
1Awse kuyyaasetiiyyiiw Yesuusi tikoppa sooke ka pakateeta kapa qaa'e. 2Qoota orra lekayta isha kapopa ollopa sooke malla, ikka koonka karopa fayyade ka kuti'e. Orrase piisa ka pakateeta kapan desa qaaqa'ade. #Luqa 5:1-3 3Ikka we lekaya pahanaan ishootta haasawade ka kide, “Ha qotampayta takka ayla'e sookade. 4Ete xotta qupnooyye, xotta demo pora kapa'e seehen, xampira ka de'en ka pohaden. 5Xotta demoow kookohota a qaraayye piita a kutta in kinnin qare seehen; ka qoota piita kutta kela in kinnin malla, eennow sakkatten. 6Ma xoori sakkattase qoota hittina fayya'en katannin malla, ete atoota awditeeyye, ikupade ka koke. 7Xotta demoow qeeyya kare'e seehen. Qeeyyasene ka jifen ka untase qara piren, 8xotta a taakane xoori piita fayya oppe seehen. Takka ka harka dippa palite, takka ka harka kunda lehi palite, takka ka harka kunda sessa palite. 9Nama napahata a dakaynitto qapo, a dakayo.”
Yesuusi wa malla pahanaan haasawanna
Maari 4:10-12; Luqa 8:9-10
10Sekkammaayyeew, tamaarewwa Yesuusi ka isha kapopa dehaaden ka ishi kidene, “Maana malla pahanaan orra haasawanni?” 11Yesuusi ka ishootta oorshe ka kide, “Ishina akka haasasene a mankisteeta moonta juutame upnaattane'e i'ishina daasamte. Xaaysho xoori, ishootta'en daasamme. 12A qapo'e, qara'ew ishi daasamta, ikka ollin ishi koopta; a in qapnin xoori sede a qapo qara qeedama#Maati 25:29; Maari 4:25; Luqa 8:18; 19:26. 13Ishootta qoota a eyye tooynaan kapaayye, akkini in kinnin ka a eyye dakkaysannaan kapaayye, dakayni in kinnin; ikka ishootta kalli in kinnin mallan pahanaan ishootta hasawanniiy. 14Sede nefo xuumase a xuumampaytase Issayyaasi kide, ‘dakaya idakaytan, umma ishina'en kalto; tooyeeta nefo ittooytan, umma a akkitan. 15Karitta orrooseti daka kodde, nappaasso nefo idakkaawen, ildaasso nefo i'oli diippen. A taakati ildaassotin akkini heenen ka nappassotin dakayni heenen; ka mattaayshotin qapanni heenen; ka anopa tiitaawni heenen; anka ishootta dininni heene. Sede ishootta qara dikkade#Issa 6:9-10 . 16Xaayshin xoori, ildaassin qoota paata akkinaan, nappaassin ka paata dakaynaan malla, i'eeppisamten#Luqa 10:23-24. 17Dukaatannen ishina kiini, xuumampaya isho hanqeellaya lekaya wessen a ishina akkinittane akka xajeele, umma in akkine; ka wessen a ishina dakaynittane dakaya xajeelen, umma in dakayne.”
Yesuusi pahanasene a qotampayta a xotta qupnooti'i olkela la'ayshe
Maari 4:13-20; Luqa 8:11-15
18Kammadesa Yesuusi ikide, “Amma oori ishina pahanasene a qotampayta a xotta qupnooti maana akkima kodden dakkaysada; 19Xottasene pora kapa seehe, ini nama qaaletase a mankisteeta Waaqa dakaye, ikka ishi in kallini lelli; seetana ka deeni ka qaaletase karittaadi kara aylamte isha kara pohanni. 20Xottasene kookohota qara seehe'ew, ini namase oto qaaleta dakayooyye, eennoow xasan teyyanno lelli. 21Ma xoori eta desa diisheey qoota qaalese isha kara hittinna in katannin malla, oto qaalese minan rakkoota isho pora daanama isha qara kaynooyye eennow kehaysanni. 22Xottasene qeeyya kara seehe'ew, ini namase qaaletose dakayno lelli. Ma xoori, dikatta piisseti isho sassapa teyanta'e, qaaletase a Waaqa qara pirri, ikka dalta dalli in kinnin. 23Xottasene piita fayya oppa seehe'ew, ini namase qaaletase dakaye ikka ishi kallitto lelli. namoose nefo dalta dalli; takka harka dippa, takka ka harka kunda lehi, takka ka harka kunda sessa koddite.”
Pahana a yeetota
24Yesuusi pahana pila'e ishootta leleew ka kide, “Mankisteeta moonta nama duloppa xotta fayya aylade pahata. 25Ete orra mukeeyye, paarkaalaadi ka de'en ka kappase oppa yeetota qupen ka kela tawen. 26Ete kappase dehe ka fiiteeyye, yeetotase nefo siti akkaatte. 27Orxayaasene a aappaase a dula ka isha kapopa de'en ka ishi kidene, ‘Poqallaay, xotta fayya duloppa a ayline? Ata xawwi yeetota aysha oppopa deete?’ 28Isha ka ishootta oorshe ka kide, ‘Paarkaala asse kode,’ Orxayasene ka kidene, ‘Hela kuli akkan anno ka oppa shukno iheenta?’ 29Isha ka kide, ‘Inna! oton yeetotase shuknittaneeyye, shaane kappase kuli oppa shukkitaneey, 30alle diisha ikka haka fera kaynitto kara ollin kuttaden. Awta fera kaytooyye, mujampaya'en kida: Paayyota qaraayye yeetota oppa shuka ka akka apittan kupatto'e marrana marrana hida ka kappa kosaappopa ana kalshaay.’”
Pahana a uqinteeta leya
Maari 4:30-32; Luqa 13:18-19
31Yesuusi ka pahana pila ishootta lele ka kideewwe, “Mankisteeta moonta uqqinteeta a leya a nama takka qeede ka duloppa dishade'e pahata. 32Isheetta nefo uqqinteeta piisa kelopaxata shakki. Awta kuttattooyye xoori, dishima a duloppa piisa qara jaalli ka qoyra kutta koddini. Xampira ka deeni ka taammaadi qara'e saatta saattaanni.”
Pahanasene a haddayya
Luqa 13:20-21
33Yesuusi ka pahana pila ishootta leleew ka kideewwe, “Mankisteeta moonta, haddaya a iskatteeta takka qeette ka daamma taara kura sessaappa'e pukeessite'e pahata. Haddayasene ka puullotase palayshen.”
Yesuusi wa malla pahanaan kollinna
Maari 4:33-34
34Yesuusi wessen piisa pahanaanneew samayta haasawade, umma apari pahana mali ishootta in haasawanne. 35Sede nefo isase a xuumampayta kide, “Pahanaannen haasa qeeda ka haka piita uumamte paayyatteeyye wa juutame haasawada.” Akka dikkatto malla. #mas 78:2
Yesuusi pahanasene a yeetota'e oli kela la'ayshe
36Sitiiyyi Yesuusi orra kapa xa'e ka tika kelopa kulle. Tamaarewwaadi ka isha kapopa dehaaden ka ishi kidene, “pahanoosen a yeetota duloppa ino la'ayshe.”
37Isha ka ishootta oorshe ka kide, “A xotta fayya ayle, inna a nama. 38Dulase nefo, piisse are kitto. Xottasene a fayya nefoow, hellasene a mankisteeta Waaqa. Yeetotaaw hella seetana. 39Paarkaalasene yeetota ayle seetana. Fera nefoow, piraampira piisseti. Ferampaya erkampattowwa a Waaqa. 40Akkima yeetota ollopa oorinnaan ka apittan kupnaan, awta piraampira piita kaytooyye asseew koddita. 41Inna nama erkampattowwaadi erka. ishootta ka mankisteetaadippaayye wa juppootoppopa nama kanna piisa isho a neequmta koona piisa ollopa pohan. 42Ka kupaanaappopa ishootta dakkan. Porose oppaayye oori, pooyta isho ilka ollin qomeeta patta koddita. 43Hanqeellaya xoori awse mankisteeta aappaayshotitiiyyi akka piirtota mina'e la'ayan. Nama napahata a dakaynitto qapo, a dakayo.”
Pahana a teyanta juutamte
44Kammadesa Yesuusi ikide, “Ha mankisteeta moonta, teyanta a duloppa juutamte pahata. Nama takka ka qara kaye ka eeppan xataaw oorshe ka juuteew ka xasoottaadi qaran xaate aane ka wa qapa piisa kate ka dulase piddade.”
Pahanasene a furoota
45Kamma desa Yesuusi ikide, “Semaliiyyiiw mankisteeta moonta nakkaatitta takka furoota kokkoka piddatta faano pahata. 46Ka ete furoota heraadi dikke kokkoka teyeeyye, aane ka wa qapa piisa kate ka furootase piddade.”
Pahana nyupurasene murkujan qapnaane
47Kamma desa Yesuusi ikide, “Semaliiyyiiw mankisteeta moonta nyupura pakateetoppopa katame ka murkuja ika piisa qape'e pahata. 48Ete immakaadeneeyye, orrase murkuja qapno ka kamkama qaropa ishootta tite ka kapa qaa'en ka oppaayye murkuja a dammaan mehadda karopa ollopa pohaden ka a opani dammi in kinnin alle dakken. 49Awta piraampira piita kaytooyye, asseew koddita. Erkampattowa a Waaqa ide'an ka hanqeellayaappaayye juppoolaya xawwi oorshan. 50Ka kupaanaappopa ishootta dakkan. Porose oppaayye pooyta ka ilka ollin qomeeta patta koddita.”
51Kamma desa Yesuusi i'ishootta kaassade ka kide, “Hela kuli se piisa i'ishina kalte?” Ishootta ka oorshen ka kidene, “Aa.” 52Ikka ishootta oorshe kide, “Semalla tooy, kollissampayta a qoota mankisteeta moontati desa kollade piisa, aappa a tikaadi a meeha kelaayye meeha haaraya isho a kere sookinno mina paha.”
Toorayta Naasiratiiyyi Yesuusi qara kaye
Maari 6:1-6; Luqa 4:16-30
53Yesuusi ete pahanaddosen haasawade ka dikkishe, kammaayye, porose oppaayye tawe; 54Ka piitaaysho katamasene a Naasirati opa kale ka eeyyeeyye tikkasene xaaysho a Yihuta a qinseeta kelaayye orra kollinni. Ishootta ka dikke oppa qawwaawen ka kiini, “Ata ini ookumose isho kodaddoosen orra qawwanna ayshaayye qeede? 55Isha innasene a aappaaysho qora xefna'enne? Aayyaasso ka Maariyaami kidammi in kitto? Hellaasso kan Yayqoopi ka Yoosefi ka Simooni isho Yihutaanne? 56Tuparraasso kuli are inoppaawwen kalane? Ka kuli aysha se piisa qeede?” 57Ka isha qara teyyatta diishen.
Yesuusi xoori i'ishootta oorshe ka kide, “Ha xuumampayta piitaaysho isho tikaadi a mattaadi pattoppa'e ulfeessammi in kinnin.” #Yoha 4:44 58Ka qoota isha in amannin malla, eyye daxxowwa lekaya in koone.
