Mataafa orra Lewi 8
8
Akka Arooni isho hellaadi a diira qeesuma shuumamen
sooka 29:1-37
1Yaahiwwe ka Muuse kide, 2“Arooni isho hellaadi a diira ka mehadda a kalsadane a qeesuma ka sayteetase daatinaan ka xormase kalisoota hasenta a juppootati dehaado ka laahadda lakki isho laaqqotase a kara haddaya in kinnin sataraan dehayshe. 3Ka xarrase a tukkana Yaahiwwe turopa samayta piisa hale.”
4Muuse ka akka Yaahiwwe isha ajaje qara kode; samayta ka xarrase a tukkana a Yaahiwwe turopa ollopa xore. 5Muuse ka samayta kide, “Wa Yaahiwwe akka kodamane ajaje tooy sene arekammopaxata ca.”
6Muuse ka Arooni isho hellaadi a diira samayta turopa sookshe ka akka pisha jaqadane kode; 7ka Arooni quda qamiseeta kalshe ka saappata ishi hidde ka kaappa qara ishi kalshe ka efuudi qara ishi kalsheew ka kurtase harmuman dawen efuudi qarandesa ishi hidde; 8ka qara'e akala kessoppa ishi kalsheew ka kara'e ishi uurimi isho tuumimi xaaye; 9ka parroota matta qara ishi mare ka akka Yaahiwwe isha ajaje qara'e, paroosetiiyyi fuula tura'e milikkitase qulqullaawe warqeetoppa kodame ishi kalshe.
10Ka sayteetase daatammitto qeedeew ka tukkanase a Yaahiwwe isho wa tukkanose kela ca piisa daate; ka xawwi reexe. 11Ka sayteetase qudaayye shakkayteeta qeede ka porase a kalisoota qara tappaan fidde; ka akka xawwi reexamane'e, porase a kalisoota isho mehaddaadi a kodaan koonaane ka saahinase kara pisha jaqannaan isho meehaadi a kara xaaynaan piisa sayteetan daate. 12Ka akka Arooni xawwi reexammo'e sayteetase daatammitto qudaayye matta qara ishi tuqe ka daate. 13Ka kammadesa akka Yaahiwwe ajaje qara'e hellaa Arooni a diira qeedeew ka quda qamisewwa kalshe ka saappata ishootta hide ka qara kullewwa kalshe.
14Ka xormase hasenta juppootati qalamo dehayshe; Arooni isho hellaadi a diira ka matta xormaseti qara harkaasso qapaden. 15Muuse ka qale ka diikaadi qeede ka qupittaadinni kaassaasene a pora kalisoota piisa daate ka porase a kalisoota qulqullayshe ka diika a kela hase porase a kalisoota kela tuqe ka saantosetin porase a kalisoota jaqqe. 16Ka hallaaka isho moora karitta karanxata co piisa ka nyaala a tira tura dekno ka xalla isho moora a quda co piisa qeede ka porase a kalisoota qara kupe. 17Ka akka Yaahiwwe ajaje qara'e so'a a xorma a kela hase ka kollattaadi isho uusaadi safaraayye laka tulopa sookshe ka kupe.
18Arooni isho hellaadi a diira ka matta laahaseti qara harkaasso qapaden; sekkammaayye Muuse ka kalisoota kupannitto'e laahase dehayshe; 19Ka laahase qale ka diikaadi porase a kalisoota quda qinda piisan fide. 20Ka laahase meele ka mattaadi ka meellaadi isho mooraadi ka hallakaadi kupe. 21Ka akka Yaahiwwe isha ajaje qara'e hoppattaadi isho loqqaadi pishaan jaqe; ka kalisoota Yaahiwwe alaawnitto ka isha xasannitto kode ka so'a a laahaseti pisa porase a kalisoota qara kupe.
22Muuse ka laahase a lammatta orran qeesuminnaan qeedeew; Arooni isho hellaadi a diira ka matta laahaseti qara harkaasso qapaden. 23Muuse ka laahase qaleew ka diika a laahaseti qudaayye shakkayta qeede ka napahata Arooni a akkitta ka ampukkuttaya a harka akkitta isho a loqta akkitta qaran qaqappade. 24Ka hellaa Arooni a diira samayta turopa sookshe ka diika laahaseti qudaayye shakkayta qeede ka napahawwaasso a akkitta ka ampukkuttaya a harkaasso a akkitta isho a loqqaasso a akkitta qaran qaqappade; ka diika a kela hase porase a kalisoota quda qinda piisan fide. 25Ka masartaadi ka hallakaadi isho moora a karitta karanxata ka nyaala a tira tura dekno ka xallaadi lakki isho moora a quda co ka kaytootaadi a akkitta qeede; 26ka laaqqotase kara haddaya in qapnin fuula Yaahiwwe turaayye satara kara kitto qudaayye laaqqota takka ka laaqqota a sayteetan laaqamte takka isho a qaaha takka qeede ka moorase ka hallaakase isho kaytootase a akkitta qara xaaye. 27Ka sene piisa qeede ka harka Arooni isho a hellaadi a diira oppa xaaye; ishootta ka kalisoota lellehinnaaniti koden ka fuula Yaahiwwe tura'e lellehshen. 28Sekkammaayye Muuse ka harkaaysho oppaayye qeede ka akka kalisoota shuumata qeesumati koddito'e porase a kalisoota qara'e kalisoota Yaahiwwe apittan dehaannitto ka alaawnitto ka isha xasannitto kode ka porase a kalisoota qara kupe. 29Ka aytaraasaadi qeede ka fuula Yaahiwwe tura'e kalisoota lellehinnaane kode ka lelleehshe; laahase orra qeesumissa qalame oppaayye, sede ka akka Yaahiwwe ajaje qara'e qoottota Muuse koddite.
30Muuse ka sayteeta a daateta qudaayye shakkayteeta ka diikase pora kalisoota qara co qudaayye shakkayta qeede ka Arooni isho hellaadi a diira ka mehaddaasso a kalsadene qara fide; ka saantosetini Arooni isho hellaadi a diira ka mehaddaasso a kalsadene xawwi reexe.
31Muuse ka Arooni isho hellaadi a diiraati kide, “Akka Yaahiwwe ana ajaje ka kide, ‘So'osen a Arooni isho hellaadi a diira patta damen.’ Qara'e so'osen xarra tukkana a Yaahiwwe oppa xarsada ka eyye'ew laaqqotase kalisoota a qeesumissaati kalte ka satara kara kitton dama. 32Ka so'a isho laaqqota a kela hasse apittan kupa. 33Taantetase a ishin qeesuma teyyannittan qoota kuyyaata tappa pirto malla, ishina haka kuyyaase tappa a kara qeesuma teyyannittan dikkannitto kara'e, xarrose a tukkana Yaahiwwe tura aparipa in aanan. 34Taantese awwe kodamte akka hasenta juppoota akkattan malla, Yaahiwwe ajaje. 35Semmalla Yaahiwwe asse qara'e ana ajajeey, ishina akka a leenini'i taanteta Yaahiwwe tooytaada ka kuyyaata tappa isho halkeetta tappa kara'e xarrase a tukkana Yaahiwwe tura aparipa in aanan.” 36Arooni isho hellaadi a diira ka wa Yaahiwwe Muuse qudan ajaje piisa koden.
Currently Selected:
Mataafa orra Lewi 8: MaQu
Highlight
Copy
Compare
Share
Want to have your highlights saved across all your devices? Sign up or sign in
