Mataafa orra Lewi 7
7
Kalisoota ishin dapayta
1Taanteta a ishin kalisoota ishin dapayta dehannaan sede; kalisoose nefo a akata qulqullaawte. 2Kalisoota a ishin dapayta dehaannitto pora oppa kalisoota kupannitto qalammitto oppa'e a eeyye'ew qalamto; diikaadi ka porase a kalisoota quda qinda piisan fidamo. 3Hallakaadi isho mooraadi piisa a kalisoota dehaado; masartaadi ka moora a karitta karanxata co piisa 4ka xalladaadi lakki ka moora quda co ka nyaala a tira tura dekno a kara qeedamen ka dehaaden. 5Qeesitta ka kalisoota a Yaahiwwe apiitan dehaannitto kodo ka porase a kalisoota qara kupo. Sede kalisoota a ishin dapayta'ey. 6Sanynyeeta a qeesewwa koddite oppaayye a diira kodde piisa dameeta i'ettanshan; ma xoori a pora qulqullaawe oppa damen. Damtose a akata qulqullaawteey.
7Taanteta a ishin kalisoota haseenta juppoota isho a ishin dapayta dehannaan takkaaw. Qeesitta akka hasenta juppootati kalisowwosen teyatto koono, isha so'osen teyyada. 8Qeesitta kalisoota kupannitto nama qara qeenno ka dehanno kalisootase kupannitto a dehayshe qudaayye a koka teyyado. 9Kalisoota a unta a kisa taaki payqa piita taaki a sipla qara palite, a qeesitta kalisowwosen dehannoti daasamto. 10Kalisoota unta a karaa sayteeta ekerta lahen taaki in lahanin, a hellaa Arooni a diiraati olqitteeta qootamto.
Kalisoota takkumta
11Nama takka oton Yaahiwwe'e kalisoota a takkumta dehanniiyyi, taantetaadi sede. 12Oton kalata dehassa'e kalisoota horeeta dehanniiyyi, kalisootase a kalata quda'e laaqqota a karaa haddaya in qapnin a sayteetan tiqqiiren ka laaqqota qaqqaaha a sayteeta quda daaten ka laaqqota a daamma nukkulla a sayteetan tiqqiiren oppa laaqen a quda qapo ka ollin dehaysho. 13Kalisootaadi a takkumta a kalata dehaannitto quda'e, kalisoota laaqqota a karaa haddaya qapto a dehaysho. 14Ka laaqqowwosen qara takka takka qeedo ka Yaahiwwe'e kalisoota a xawwi reexxamte kodo ka dehaysho. sede nefo qeesittase diika kalisoota takkumta fiino'e daasamta. 15So'a a kalisoose a takkumta a namoose kalata dehaannoti, kuyyaatase a oppa qalamen oppa'ew a damamen diisheey parripa in muknin.
16Ma xoori nama takka oton xasa a daasade taaki heennaadi qara'e kalisoota kalinniiyyi, kalisootase a awsi'iw damamto; a mukte a parraytaadiiyyi damamtoow. 17So'a kalisoose kela hase kuyyaata sessattaatiiyyi alle apittan kupa. 18So'a kalisoose a takkumta oton kuyyaata sessattatiiyyi damamaneeyye, Yaahiwwe kalisootose in teyyado; kalisoose a nyalte koddita diisheey we kapa in dikamto. Nama kalisoose dame ishin dapampaytaay rakkoota isha qara kaya. 19So'a wa a nyale quda kaye, a apittan kupaden diisheey in damammin;
So'a nyala in qapnini, nama nyala in qapnin piisa a damo. 20Ma xoori nama nyala qapo ka so'a a kalisoota takkumta a Yaahiwwe kalshen damo, a samaytaadippa alle seeramo. 21Nama takka oton nama nyale quda kaya taaki pinanta nyalte taaki wa nyale a pila quda kayaayye ka qara so'a kalisootase a takkumta a Yaahiwwe kalshen damaayye, a samaytaadippa alle seeramo.
22Yaahiwwe ka Muuse kideewwe, 23“Isira'eeleta lele ka kide, ‘Moora okkaya ka a kahirra isho a telalla in daman. 24Moora a horeeta issin toote taaki a pinanta qape wa pilaati kodada diisheey in daman. 25Horeeta a Yaahiwwe kalisoota kupannitto koddite ka dehaatte oppaayye nama moora damo, a samaytaadippa alle seeramo. 26Pora oppa kallaannittan pisa oppaayye, diika a xampira taaki a horeeta in daman. 27Nama a diika damo, a samaytaadippa alle seeramo.’” #uuma 9:4; Lewi 17:10-14; 19:26; ooreta 12:16; 23:16-23
28Yaahiwwe ka Muuse kideewwe, 29“Isira'eeleta lele ka kide, ‘Nama Yaahiwwe'e kalisoota a takkumta dehanno, a kalisootase a takkumta a dehanno qaraayyeew qeedo ka qoota mattaaditi desa Yaahiwwe dehaysho. 30Ka Yaahiwwe'e kalisootase kupannitto harkaadin dehaysho; ka moora isho hallaaka dehaysho; ka aytaraasa kalisoota kupannitto kodo ka Yaahiwwe turandesa lellehsho. 31Qeesitta a moorase porase a kalisoota qara kupo ka aytaraasa Arooni isho hellaadi a diiraati daasho. 32Kalisootase xaayshin a takkumta oppaayye kaytoota a akkitta qeeda ka qoottota qeesittati koda ka ishi daasha. 33Hellaa Arooni a diira oppaayye nama moorose isho diikoose kalisoota kalinno, a kaytoose a akkitta teyyado. 34Kalisoota a takkumta a Isira'eeleta kalinnitta oppaayye anti aytaraasase a lellehissaan dehannaan isho kaytootase a takkumta Isira'eeleta qaran qeede ka qoottotaaysho a paraparati kode ka qeesittase Arooni isho hellaadi a diiraati daashe. 35Kuyyaatase a Muuse Arooni isho hellaadi a diira akka koda Yaahiwwe kodane'e ishootta dehaysheeyye kalisootase kupannitto a Yaahiwwe dehannitto oppaayye sede qoottotase Arooni isho a hellaadi a diiraati daasamte. 36Kuyyaata Arooni isho hellaadi a diira akka qeesewwa koddane daatameneeyye akka qoottose ishootta daashane'e Yaahiwwe hellaa Isira'eeli ajaje ka akka xeltada deena piisa karaayye sede tooytane'e, taanteta kode ka ishootta qaatishe.’”
37Taanteta kalisoota kupannitto ka a unta ka a juppoota ka a ishin dapayta ka a qeesuma daatama isho a takkumta tooy sede. 38Koommayta Siina oppa kuyyaata Yaahiwwe akka Isira'eeleta kalisootaaysho ishi dehasso ajajeeyye, wa Yaahiwwe irroota Siina qara Muuse ajaje tooy sede.
Currently Selected:
Mataafa orra Lewi 7: MaQu
Highlight
Copy
Compare
Share
Want to have your highlights saved across all your devices? Sign up or sign in
