Mataafa orra Lewi 6
6
1Yaahiwwe iMuuse kide, 2“Nama takka oton ana Yaahiwwe qara'e juppoota koda ka wa xelittaadi isha kapa atara xaayade taaki isha qapsiise shiishaayye, taaki isha saraayye taaki sassapadaayye, 3taaki oton wa pate'e akka ka marmadaayye ka xaxada ka an akkine kidaayye ka juppowwosen asse pappaha a orra koona oppa takka kodaayye 4ka juppowwasene koda ka ishin dapampayta koddaayye, wa sare taaki sassapaan qeede taaki a ataraan qeede taaki wa pate ikka teye a oorsho. 5Taaki wa marmade ka qara xaxade piisa a oorsho; ka oto kalisoota ishin dapayta dehannooyye, wa a qeede qara'e harka ken oppa takka padaawo ka aappa wa senetiti oorsho. 6Ka hiila a atti sookisse qara'e, xellootaadi oppaayye laha a toobuma in qapnin qeedo ka kalisoota a ishin dapaytaaditi'i Yaahiwwe turopa qeesitta kapopan de'o. 7Qeesitta ka saanta asse pahatonne fuula Yaahiwwe tura'e juppootaadi akka ishi hasso kodo; namase ka juppootaadi a kode piisa'e diissata teyo. #dikoota 5:5-8”
Kalisoota a kupannitto
8Yaahiwwe ka Muuse kide, 9“Arooni ka hellaadi a diira ajaje ka kide, ‘Taanteta a ishin kalisoota kupannitto dehassan sede; kalisoota kupannitto porase a kalisoota qaraayye a halkeetta kumma haka parinitto kara'e apitta qara mukto; apitta ka porase a kalisoota qaraayye a in libbinin mali opaya quda tawo. 10Qeesitta a konfa xaynaata qora talpa oppa dawame kalsado ka qara xata qamiseeta xaynaata qora talpa oppa dawamte kalsado; ka porose a kalisoota qaraayye tara kalisootase a apitta kupe alle saho ka qinda quda xaayo. 11Ka mehaddoosen sooksho ka a pila kalsado ka tarase safaraayye laka tulopa haado ka pora a in nyallin oppa tuqo. 12Apitta porase a kalisoota qara opayno in libbinin ka opaya quda tawo; teykanta piisaayye qeesitta a apitta qara qora kodo ka qara kalisoota kupannitto xaxxaayo ka hallaaka isho moora a kalisoota takkumta ollin qara kupo. 13Apitta porase a kalisoota qara co a opaya quda tawo umma in libbinin.’”
Kalisoota unta
14Taanteta kalisoota unta sede; hellaa Arooni a diira fuula Yaahiwwe tura'e porase a kalisoota qara'e a kalissota unta dehayshen. 15Qeesitta ka daammase nukkulla sayteetan lahame qudaayye harka kara qeedo ka tankartase kalisootase a unta qaraayye kitto piisa qeedoow ka kalisoose Yaahiwwe kalsamte akka ishin matte oorsadane'e, a Yaahiwwe alaawnitto ka isha xasannitto kodo ka porase a kalisoota qara kupo. 16A kela hasse Arooni isho hellaadi a diira ka paapaha tukkana Yaahiwwe porase qulqullaawe oppa'e laaqqotase a kara haddaya in qapnin ollin damen. 17Umma laaqqotose haddayaan in laaqammin; kalisootiyyo a apittan dehaannitto oppaayye, qoottotaayshoti'in kode ka ishootta daashe; isheetta nefo akka kalisoota a juppoota isho a ishin dapayta mina'e a akata qulqullaawteey. 18Hellaa diira a sanynyeeta Arooni oppa dalanna piisa sede dama; xeltada a itturopa deena piisa karaayye, kalisowwa Yaahiwwe apittan dehaanna oppaayye sede qoottotaaysho'ey; nama kalisoose quda kayno piisa ka qulqullaawa.
19Yaahiwwe ka Muuse kideewwe, 20“Arooni isho sanynyeetaadi oppaayye, nama takka kuyyaata oppa qeesuma daatammooyye, Yaahiwwe'e a kalisoota dehaysho; kalisoota untati'i, daamma nukkulla kura ifitinni harka kudanippa takka a kalisoota unta a kuyyaata mina dehaannitto mina kitton de'o; ka paka takka teykante ka paka takka kalaakalaayye dehaysho; 21Ka daammose qeedo ka fayya sayteetan tiqqiiro ka payqa piita qara laaqqo ka oppa mooso ka kalisoota Yaahiwwe'e a alaawnitto ka isha xasannitto kodo ka dehaysho. 22Hellaadi oppaayye a qeesitta koddino ka pakkaadippa daatammo ka asseew kodo. Xeltada itturopa deena piisa karaayye sede ka qoottota Yaahiwwe koddito ka takka kupatto. 23Kalisoota a unta a qeesitta dehanno piisa a takka kupatto diisheey in damammin.”
Kalisoota a hasenta juppoota
24Yaahiwwe ka Muuse kideewwe, 25“Arooni isho hellaadi a diiraati kide, ‘Taanteta ishin kalisoota hasenta juppoota dehassan sede; pora oppa kalisoota kupannitto qalammitto oppa'e, kalisoota a hasenta juppootati dehaannitto kuli a eyye oppa'ew Yaahiwwe tura a qalamto; sede a akata qulqullaawteey. 26Qeesitta kalisootase dehanno ka paapahase a tukkana Yaahiwwetiiyyi porase qulqullaawe oppa damo. 27Nama koddite wa so'osen quda kayna piisa a qulqullaawe koddan; oton diika kalisooseti'i ohaata quda fiddamaayye, a pora qulqullaawe oppa diipamo. 28Okta so'osen kara xarshen alle mammaaja; oton so'osene tisteeta a sipla kara'e xarsameneeyye, tisteese kara xoosha ka pishaan kara jaqa. 29Toola a qeesewwa oppaayye hella a diira piisa a so'osen damen; sede a akata qulqullaawteey. 30Kalisoota a hasenta juppootati kalte a oppaayye diika qeeden ka hasenta juppootati porase qulqullaawe a tukkana Yaahiwwe kelopan kullen, so'adi in damammin a alle kupaden.’”
Currently Selected:
Mataafa orra Lewi 6: MaQu
Highlight
Copy
Compare
Share
Want to have your highlights saved across all your devices? Sign up or sign in
