Mataafa orra Lewi 5
5
Wa malla kalisoota hasenta juppoota dehannaan
1Nama takka oto wa akke ka upaati desa akka xaxado ka maakkumo kaassatamo ka lela tiitooyye, juppoota kodeey rakkoota isha qara kaya.
2Nama takka oton a in upnin maliiyyi wa nyale, sede nefo pukka a pinanta taaki a horeeta taaki a wa piitandesa titmanna quda kayaayye, ishi kuli inyala; ishin dapampayta koddeey.
3Taaki oton a in upnin maliiyyi wa nama kara sookina ka nama nyalinna quda kayaayye, kiseeta upnaade paayyatteeyye ishin dapampayta kodda.
4Taaki nama takka oton a in dikanin mali a paxaarati taaki a neeqati afa kata ka xaxadaayye, kiseeta a upnaade paayyatteeyye ishin dapampayta kodda.
5Nama takka oton seneppaayye takkan ishin dapaayye, a samayta tura ishin dapaytaadi lelo. 6Ka juppootaadi a kode malla kalisoota ishin dapaytati'i fuula Yaahiwwe tura'e xellootaadi a kahirra isho a tela oppaayye kahirta taaki telteeta dehaysho; qeesitta ka akka juppootaadi ishi hasso kodo.
7Oton kahirta dehassa ettaninni in kininniiyyi, juppootaadi a kode malla fuula Yaahiwwe turopa napaala lakki taaki jiwjwa elela lakkin de'o; ka takkan kalisoota juppootati dehaysho ka takkan kalisoota a kupannittooti dehaysho. 8Ka qeesitta kapopan de'o; qeesitta ka paayyota takka qeedo ka kalisoota juppootati dehaysho ka qara xolma quu'o umma in mittinin. 9Ka diika kalisootase a juppoota quda shakkayta qeedo ka porase a kalisoota qudandesa fido; ka diika kela hase porase a kalisoota kela tuqo; sede kalisoota juppoota'ey. 10Ka a lammatta qeedoow ka taanteta turan lelamte qara'e, kalisoota kupannitto kodo ka dehaysho ka namase juppoota kode akka juppootadi ishi hasso kodo ikka ishi diisamto.
11Ma xoori namase juppoota kode oton napaala lakki taaki jiwjiwa elela lakki dehassa ettaninni in kinniniiyyi, a daamma paxaara kiilota takka kalisoota juppootati kodo ka dehaysho; ma xoori qoota kalisoota juppoota koddite malla, sayteeta ekerta oppa in pi'innin umma tankarta qara in xaaynin. 12Ka qeesitta kapopan de'o; qeesitta ka daammase quda harka kara kusso ka kalisoose Yaahiwwe kalsamte akka ishin matte oorsatamto'e, kalisootase a damta a Yaahiwwe apittan dehaannitto olliiyyi porase a kalisoota qara kupo; sede kalisoota a juppoota'ey. 13Namase oton juppowwosen dikame oppa takka kodeeyye, qeesitta saanta asse pahatonne akka juppootadi ishi hasso koda ikka ishi diisamta; daamma kela hase a kalisoota unta mina'e a qeesitta teyyado.
Kalisoota ishin dapayta
14Yaahiwwe ka Muuse kide, 15“Nama oton a in upnin mali ishin dapa ka daassawaayyo a qulqullaawe a xayyo a Yaahiwwe oppaayye takka qajishaayye ka seden juppoota kodaayye, xellootaadi a kahirra oppaayye a laha toobuma in qapnin qeedo ka kalisoota a ishin dapaytati kodo ka ana Yaahiwwe dehaysho. Hera laahaseti ka sheqileeta tukkana qulqullaawetin ekkaysatamo ka dakara pirreetatin hiilamo; sede kalisoota a ishin dapayta'ey. 16Ka waasene qulqullaawe a qajishe qara'e harka ken oppa takka padaawo ka oppa oorsho; ka ollin qeesitta daasho; qeesitta ka laahase a kalisoota a ishin dapaytatinni akka juppootaadi ishi hasso kodo ikka ishi diisamto.
17Nama oton a in upnin mali juppoota kode ka waasene a Yaahiwwe dawre oppa takkan qepsheeyye, ishin dapampaytaay Oppa'e kaassatama. 18Hiila a atti sookisse qara'e xellootaadi a kahirra oppaayye a laha toobuma in qapnin qeedo ka kalisoota ishin dapaytati kodo ka qeesitta kapopan de'o; qeesitta ka juppootase xaadi a in upnin mali kode akka ishi hasso kodo; ikka ishi diisamto. 19Sede kalisoota ishin dapayta; isha Yaahiwwe tura'e dapa kodeey.”
Currently Selected:
Mataafa orra Lewi 5: MaQu
Highlight
Copy
Compare
Share
Want to have your highlights saved across all your devices? Sign up or sign in
