Mataafa orra Lewi 4
4
Kalisoota hasenta juppoota
1Yaahiwwe ka Muuse haasawade ka kide, 2“Samayta Isira'eeliti kide, ‘Nama oton a in upnin mali juppoota kodaayye ka waasene a Yaahiwwe ajaje ka in kodan kide oppaayye takkan kodaayye,
3oton a ishin dapen qeesitta daatameeyye ka samayta piisa ishin dapayta kodeeyye, juppoose xaadi a kode malla a haaritta xorma a toobuma in qapnin qeedo ka Yaahiwwe'e kalisoota juppootati kodo ka dehaysho. 4Ka xarra tukkana a Yaahiwwe tura'e ana Yaahiwwe turopa xormase dehaysho ka matta qara ishi harka qapado ka Yaahiwwe tura qalo. 5Qeesittase daatame diika a xormaseti quda shakkayta qeedo ka tukkanase a Yaahiwwe kelopan kullo. 6Ka qupittaadi diikase oppan qappado ka fuula Yaahiwwe tura'e kaaranta a kaatasene qulqullaawe turandesa tappaan fiddo. 7Qeesittase ka diikase quda shakkayta qeedoow ka tukkanase a Yaahiwwe kelaayye fuula Yaahiwwe tura'e kaassa porase a kalisoota a tankarta alaawnitto quda daato; ka diikase a xorma kela hase qeedo ka xarra tukkana a Yaahiwwe turaayye porase a kalisoota a kupannitto kela tuqo. 8Qeesitta ka xormase a kalisoota juppootati dehayshe oppaayye hallaaka piisa qeedo; sede nefo moora a karitta karanxata co piisa 9ka xalla lakki ka moora quda co isho nyaala a tira tura dekno ollin dehaysho. 10Qeesitta akka xormase kalisoota a takkumta qalame kara moora isho hallaaka qeede mina'e, a asseew xormase kalisoota a juppootati qalame karaayye hallaaka piisa qeedo ka porase a kalisoota kupannitto dehaannitto qara kupoow. 11Ma xoori kollatta xormaseti isho so'adi piisa ka mattaadi ka loqqaadi ka uusaadi isho hopattaadi piisa 12ka xormase piisa safareeyye laka tulopa porase in nyallin oppa tara tuqnaan a oppa tara ollopa tuulame qara'e qora quno ka qara kupo.
13Oton samayta Isira'eeli a in upnin maliiyyi juppoota kodaayye ka wa Yaahiwwe ajaje ka dawre oppaayye takkan kodaayye, kadi punu samayta dapa a kode in upnin nefooyye, ikki ishin dapaytaaw. 14Oto xora samayta juppoota a kode upnaadeeyye, haseenta juppootaseti'i a haaritta xorma takka qeedo ka xarra tukkana Yaahiwwe oppopa dehaysho. 15Qimaya samayseti ka fuula Yaahiwwe tura'e xormase qara harkaasso qapaden ka fuula Yaahiwwe tura qalamo. 16Qeesittase daatame ka diika xormoseti quda shakkayta qeedo ka tukkanase a Yaahiwwe kelopan kullo; 17ka qupittaadi diikase oppan qappado ka fuula Yaahiwwe tura'e kaaranta a kaatasene qulqullaaweti turandesa tappaan fiddo. 18Qeesitta ka diikase quda shakkayta qeedoow ka tukkanase a Yaahiwwe kelaayye fuula Yaahiwwe tura'e kaassa a pora kalisoota qara daato; ka diikase a xorma kela hase qeedo ka xarra tukkana a Yaahiwwe turaayye porase a kalisoota kupannitto kela tuqo. 19Ka xormase karaayye hallaaka isho moora piisa qeedo ka pora kalisoota qara kupo. 20Qeesitta akkima xormase kalisoota juppootati dehaade kode mina'e, a asseew xormoose kodoow; qeesitta ka akka juppootaaysho ishootta hasso kodo; ikka ishootta diisamto. 21Ka xormase piisa safara kara sooksho ka akka xormase a paayyota kupe mina'e, sede kuli asseew kupo; sede nefo kalisoota a hasenta juppoota samaytati dehaannitto.
22Oton mukissampayta takka a in upnin mali juppoota kodaayye ka wa Yaahiwwe Waaqaayti ajaje ka dawre oppaayye takkan mihishaayye, isha ishin dapampayta. 23Oto juppootaadi upnaadooyye, a qolpayta toobuma in qapnin kalisootaadi kodo ka dehaysho. 24Ka matta qolpaytaseeti qara harka qapado ka fuula Yaahiwwe tura'e porase a oppa kalisoota kupannitto qallaan oppa qalo. Sede kalisoota juppoota'ey. 25Qeesittase ka diika a kalisootoseti qudaayye shakkayta qupittan qeedo ka porase a kalisoota kupannitto qara dehannaan qaraayye kaassa qara daato. Ka diikase kela hase porase a kalisoota kupannitto kela tuqo. 26Ka akka hallaaka isho moora kalisootase a takkumta porase a kalisoota kupannitto qara kupe mina'e, hallaakase isho moorase a qolpaytoseeti piisa asseew kupo; ka saantosetinni, akka juppoota namooseti ishi hasso kodo ikka ishi diisamto.
27Oton samaytoppaayye nama takka a in upnin mali juppoota kodaayye ka wa Yaahiwwe ajaje ka dawre oppaayye takkan kamma dapaayye; isha ishin dapampayta. 28Oto juppootaadi upnaadeeyye, a telteeta toobuma in qapnin kalisootaadi kodo ka dehaaysho. 29Ka harkaadi matta telteetase kalisoota juppootati dehaatte qara qapado ka porase oppa kalisoota kupannitto qallaan oppa qalo. 30Qeesitta ka diikaadi qudaayye shakkayta qupittan qeedo ka kaassasene qara porase a kalisoota kupannitto dehannaan qara co qara daato ka diikase kela hase porase a kalisoota kupannitto kela tuqo. 31Ka akka kalisoota a takkumta karaayye moora isho hallaaka sookinnaan mina'e, a karaayye asseew sookshoow qeesitta ka kalisoota a Yaahiwwe a alaawnitto ka isha xasannitto kodo ka porase a kalisoota qara kupo; ka saantosetinni akka namooseti juppoota diisamto kodo ikka ishi diisamto. #dikoota 15:27-28
32Oton kalisoota a juppootaaditi'i kahirraappa dehanniiyyi, a sukeenta toobuma in qapnin dehaysho. 33Ka harkaadi matta sukeentase kalisoota juppootati dehaatte qara qapado ka porase oppa kalisoota kupannitto qallaan oppa qalo. 34Qeesitta ka diikaadi qudaayye shakkayta qupittan qeedo ka porase a kalisoota kupannitto qara dehannaan qaraayye kaassa qara daato ka diikase kela hase porase a kalisoota kupannitto kela tuqo. 35Ka akka kahirtase kalisoota a takkumta qalen karaayye moora isho hallaaka sookinnaan mina'e, a asseew a karaayye sooksho ka Yaahiwwe'e kalisoota a damta olli, porase a kalisoota qara kupo; ka saantosetinni, akka juppootaadi ishi hasso kodo ikka ishi diisamto.
Currently Selected:
Mataafa orra Lewi 4: MaQu
Highlight
Copy
Compare
Share
Want to have your highlights saved across all your devices? Sign up or sign in
