Mataafa orra Lewi 3
3
Kalisoota takkumta
1Nama takka oton kalisoota a takkumta'e okkayaappa dehanniiyyi, xorma taaki okkatta a toobuma in qapnin reexxo ka Yaahiwwe dehaysho. 2Ka horeetase a dehanno qara harka qapado ka xarra tukkana Yaahiwwe tura qalo; hellaasene a Arooni a diira qeesewwasene ka diikaadi qeeden ka porase a kalisoota qudan qinda piisan fiden. 3Namase dehanno ka kalisootase a takkumta a dehayshe oppaayye qeedo ka Yaahiwwe kalisoota kupannitto kodo ka dehaysho; wa a dehaysha nefo, moora karitta karanxata co piisa 4ka xallada lakki isho moora a quda co ka nyaala a tira tura dekno. 5Hellaasene a Arooni a diira ka qeeden ka kalisootase kupannitto porase a kalisootaati qora qara kitto ollin kupen. Sede nefo kalisoota a Yaahiwwe alaawnitto ka isha xasannitto a apittan dehaannitto koddita.
6Nama takka oton xelloota a kahirra taaki a tela oppaayye Yaahiwwe'e kalisoota a takkumta dehanniiyyi, oton punu xorma taaki akkootetaayye, a toobuma in qapnin koddito. 7Oton haaritta laaha'e kalisoota dehanniiyyi, a fuula Yaahiwwe turopan de'o. 8Ka matta qara ishi harka qapado ka xarra tukkanase a Yaahiwwe tura qalo; hellaa Arooni a diira ka diikaadi qeeden ka pora a kalisoota quda qinda pisan fiden. 9Namase dehanno ka kalisootase a takkumta a dehayshe oppaayye qeedo ka Yaahiwwe'e kalisoota kupannitto kodo ka dehaysho; wa dehaysha nefo, hallakaadi piisa ka masartaadi a surraappa kayte piisa ka moora karitta karanxata co piisa 10ka xallada lakki isho moora a quda co ka nyaala a tira tura dekno a sene Yaahiwwe'e kalisoota kupannitto kodo ka dehaysho. 11Qeesitta ka ishootta qeedo ka Yaahiwwe'e kalisoota a damta a apittan dehaannitto kodo ka porase a kalisoota qara kupo.
12Oton telaappa kalisoota dehanniiyyi, a fuula Yaahiwwe turopan de'o. 13Ka matta qara ishi harka qapado ka xarra tukkanase a Yaahiwwe tura qalo; hellaa Arooni a diira ka diikaadi qeeden ka pora a kalisoota quda qinda piisan fiden. 14Namase dehanno ka kalisootase a takkumta a dehayshe oppaayye qeedo ka Yaahiwwe'e kalisoota kupannitto kodo ka dehaysho; wa dehaysha nefo, moora karitta karanxata co piisa 15ka xallada lakki ka moora quda co ka nyaala a tira tura dekno. 16Qeesitta ka kalisoota a damta a apittan dehaannitto a alumaadi Yaahiwwe alaawnitto ka isha xasannitto kodo ka pora kalisoota qara kupo; hallaaka isho moora piisa a Yaahiwwe. 17Porra oppa kallaannitan piisa oppaayye, moora isho hallaaka ka diika kuli in daman; sede ka xeltadaassin a itturopa deena piisa oppaayye taanteta a parapara ishina koddito.
Currently Selected:
Mataafa orra Lewi 3: MaQu
Highlight
Copy
Compare
Share
Want to have your highlights saved across all your devices? Sign up or sign in
