Mataafa orra Lewi 15
15
Wa a dakinta nama kara urqina akkima nama nyalinnaan
1Yaahiwwe ka Muuse isho Arooni kide, 2“Samayta Isira'eeliti lele ka kide, ‘Nama takka oton paaqa minanne wa urqina saalaadi kara sookniiyyi, namoose inyale. 3Namoose wossen saalaadi kara urqina kadi punu qa'aden taaki in qa'anniniiyyi, inyale; wa saala nama kara sookna, nama nyalinniiy. 4Nama saalaadi kara wa urqina sooknaan, qoola a oppa mukno taaki wa aqara kutiina piisa anyale'e koddan. 5Nama qoolaadi quda kayo, mehaddaadi a kalsanna a diipado ka dakintaadi jaqado; ma xoori haka kalaakalati anyale kodda. 6Nama a saalaadi karaayye wa urqina sooknaan, pora oppa kuti'e oppa nama kuti'o piisa a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 7Nama a saalaadi karaayye wa urqina sooknaan quda nama kayo piisa a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 8Nama a saalaadi karaayye wa urqina sooknaan oton nama qara'e tufada, namoose a qara tufade a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 9Nama a saalaadi karaayye wa urqina sooknaan, koorricca aqara kuti'e piisa asseew a nyale kodda. 10Nama wa isha qara kuti'e quda kayo piisa, haka kalaakalati asseew a nyale kodda; nama wa isha qara kuti'e alle ma'inno piisa a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 11Nama a saalaadi karaayye wa urqina sooknaan oton harka in jaqqannin ka nama quda kayaayye, namoose a quda kaye a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 12Nama a saalaadi karaayye wa urqina sooknaan oton okta quda kayaayye, alle pappaqsha; oton meeha a qoyroppa xefame quda kayaayye, pishaan jaqqa.
13Nama a saalaadi karaayye wa urqina sooknaan oto dinooyye, jaqqaysumaadi'i a kuyyaata tappa dikado ka kammaayye mehaddaadi a kalsanna diipado ka dakintaadi pisha elatin jaqado ka nyala mali kinnaado. 14Ka kuyyaata settattatiiyyi elela lakki taaki jiwjiwa napaala lakki qapado ka tukkana a Waaqa turopa fuula Yaahiwwe turopan de'o ka qeesitta daasho; 15qeesitta ka takka kalisoota hasenta juppootaati dehaysho; ka takka kalisoota kupannitto dehaysho; ka saantosetinni, wossen urqina saalaadi kara sookna malla fuula Yaahiwwe tura'e ishi jaqqaysuma kodo.
16Nama takka oton xorma isha kara urqaayye, a dakintaadi piisa pishaan jaqado ; ma xoori haka kalaakalati a nyale kodda. 17Ohawwa taaki qoolla a oppa xormoose kodda piisa a alle pishaan diipamen; ma xoori haka kalaakalati a nyale'e koddan. 18Oton diirta iskatteeta olli mukaayye, xorma ka kara urqaayye, a lamatti dakintaaysho pishaan jaqaden; ma xoori haka kalaakalati a nyale'e koddan.
19Iskatteeta oton xoptaadi a leya'e quda caayye, nyalaadi kuyyaata tappa isheetta quda piran; nama isheetta quda qappado piisa haka kalaakalati a nyale kodda. 20A xoptaadi a leya isheetta quda kittooyye, wa oppa muknitta taaki qara kutiinitta piisa a nyale'e koddan. 21Nama qoolaadi a oppa muknitto quda qappado piisa a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 22Nama wa isheetta qara kutiite quda kayo piisa a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 23Nama qoolaadi a oppa mukinitto taaki wa a qara kutiite quda kayno piisa haka kalaakalati a nyale kodda. 24Oton diirta isheetta olli mukaayye, xoptaadi a leya ka isha quda kaytaayye, diirtose kuyyaata tappa kara'e a nyale kodda; qoolaadi a oppa mukno piisa ka a nyale kodda.
25Iskatteeta takka oton xoptaadi a leya maliiyyi kuyyawwa lekaya diika kara urqiniiyyi taaki xoptaadi a leya qa'anni in kinniniiyyi ka urqa quda tawniiyyi, kuyyawwa a diikose isheeta kara urqino piisa karaayye, akka kuyyawwasene a xoptaadi a leya mina'ew a nyalte koddita. 26kuyyawwa diikoose urqino piisa karaayye, qoola a oppa mukinitto taaki wa a qara kutiinitta piisa akka kuyyawwasene a xoptaadi a leyaa mina'ew a nyale koddan. 27Nama a wossen quda kayo piisa a nyale kodda; semmalla a mehaddaadi a kalsanna diipado ka dakintaadi jaqado; ma xoori haka kalaakalati a nyale kodda. 28Oto diikoose qa'ado kammaayye, a kuyyaata tappa dikkatto ka nyala mali kinnaatto. 29Kuyyaata settattatiiyyi a eleela lakki taaki jiwjiwa a napaala lakki qapatto ka tukkanase a Waaqa turopa qeesitta kapopan deeto. 30Qeesitta ka takka kalisoota hasenta juppootati kodo ka dehaysho ka takka kalisoota kupannitto kodo ka dehaysho; ka saantosetinni, diikoose a urqe minanne nyala a qaptaati'i fuula Yaahiwwe tura'e ishi jaqqaysuma kodo.’
31Samayta Isira'eeli akka tikoose xayyo otantaaysho oppa kitto in nyalinnini'i ka nyalooseneetin in leenini'i, wa orra nyalinna kapa ishootta sekaysha.”
32Nama saalaadi kara we urqinaan taaki a xorma urqishe ka minan nyale, 33taaki iskatteeta isquda xopta leya qapto, taaki diirta taaki iskatteeta a saalaaysho kara we urqinaan taaki diirta a iskatta nyalte olli muke desa taanteta a daasamte sede.
Currently Selected:
Mataafa orra Lewi 15: MaQu
Highlight
Copy
Compare
Share
Want to have your highlights saved across all your devices? Sign up or sign in
