Mataafa Uumata 43
43
Hella opa Yoosefi Piiniyaami qeeden ka Kipsipa aaneneew
1Piita Kene'aani dike loosatte. 2Toola Yayqoopi ete untase a hellaa piita Kipsiti ishin kalen damen ka pireneeyye, aappaaysho ihellaadi' kide, “Aana ka piita Kipsiti unta lamayteeta ino' piddaaw.”
3Yihuta' xoori i'aappaayshoti' kide, “Aappo, aappaase piita Kipsi mukinno fayya'e ino kokkonayshe ka kide, ‘Oton innassinanne a' deeniniiyyi ana kapan a' dehattan.’ 4Semmalla oton i'innoosene ino olli erkini, in anna ka unta ke' piddina. 5A taaki oton iddawriniiyyi, aappoose i'ino' kide, ‘Oton innaassinanne a' deeniniiyyi ana kapan a' dehaattaneey,’ an anno.”
6Yayqoopi ka kide, “Maanan ishina' kode, akka ana nyarrahasiissa'e ‘Inna pila'en qapna’ kiiten?”
7Ishootta ka kidene, “Aappoose'e qootinno ka qoota toolinnoti desa akata ino qore. Ka kide, “Hela aappaayshin ica? Inna pila iqqaptaneewwe? Ino ka akka kaasumaadi mina ishi oorinne. Hela xawwa a innaassinan xooya kidon upna?”
8Yihuta ka aappaayshoti' kide, “Akkan ino ka ke ka hellaanno doxan an pirammini'i, innoosen harkiyyo oppa' daashe; amman xaana ka annaay. 9Ana kapa' kaassatamaay, innoosen ino olli erke. Oton nakaytanneen ishan an kalliniiyyi, hakan co'e, juppoolaytan kodda. 10Kadan asse an jarrini kiiteeyye, esse allu lakkin oorri heenne.”
11Aappaaysho Yayqoopi ka ishootta' kide, “Oto anta ishin qara olli in kinniniiyi, aappase piita mukinno'e, wa piitinno palannitta oppa harka kela we qapada ka aappaaseti ishin aana. Qimaameta ka takma ka wa damta alanna ka karpeeta ka luukkata Temiri ka occolooneta lamayteeta akallaassin oppa' pohada ka ishin aana. 12Takka punu kaajosen dapanne ishina ooreneey, kaaja harka lakki koda ka ishin aanada. 13Ka innoosen kuli isi quda' qeeda ka aappoose kapopa aana. 14Waaqa a we piisa ettaninno a karitta aapposeti ishina' nukkullaysho ikka ishin suraysado ka Simooni isho Piniyyaami ishin olli erko. Ma a xayyo ihellaa dapa' deeteey, ana alle' dapo.”
15Hellaasene ka oori harka kela we' qapaden ka kaaja harka lakki qeedaden ka Piniyaami ollin piita Kipsi opa aanen. Ka ete eeyye kayeneeyye, Yoosefi turopa dehaaden. 16Yoosefi ete ishootta olli piniyaami akkeeyye, saaraadi'i kide, “Orrose qeede ka tikopan aane. Ka awwe piifa ana olli damaneey, xorma takka qale ka piifa' kode.”
17Aappase ka akka Yoosefi ishi' kide mina'e, hellaa sene a Yayqoopin tika Yoosefipa aane. 18Ishootta ete tika Yoosefipa annaane akata qaapen ka kidene, “Wa malla tikaadipa inon aananna, kaajasene an deyyo deeneeyye akalla kara ino olli kale malla ino qara' rakkoota qeeda heena. Ka oori karpishshadda ino kodata ka harrewwaanno kuli teyyatta'e tikaadi karopa ino kalsanni.”
19Semmalla ete xarroppa kayeneeyye aappaaseti'i kidene, 20“Ha poqallaay, deyyo'e arepan unta heraatta' deene. 21Eten kallinno letta ka poroppa ino qara' dumte, anka mukitta' harmisanninnooyye, eten akallaanno tura furrinnooyye kaajaanno piisa ka akallaanno kara caan. Anka amma ittura xata kajaasenetin deenew. 22Kaaja an amma untan piddanna xawwi in qapna. Umma sitiiyyi nama kaajosen xanno akalla karopa ino' xaaye an upno.”
23Isha ka ishootta' kide, “Sede malla in qaapan ka in fuuran. Waaqaayshin ka a aappaayshina'e kaajosen akalla kara ishina' xaaye koddita diisheey, kaaja a deyyo anti in teyyade.” Ka oori Simoonin ishootta kapopa de'e.
24Aappaase ka hellaasene a Yayqoopi tika Yoosefi kelopa kullishe ka pisha ishootta' qeede ikka loqqa jaqaden. Ka harrewwaassoti kuli oha katte. 25Akka Yoosefi olli piifa daman qoota ishootta' lelamte malla, haka Yoosefi piifa' kallo'e, harka poornaysha a isha' daashane'e kello harmisanni.
26Ete Yoosefi tikopa kaleeyye, harka poornayshasene qapaden ka isha kapopa kullen ka ishi' daashen ka ulfeessaa'e kaareeta ishi oorshen ka matta piitan kayen. 27Isha ka nakayta ishootta qara qorade ka ishootta' kide, “Qimaytase xaayshin a ana' lelten, hela maanaappa ca? Hela ammiki'i ca?
28Ishootta ka kidene, “Aappinno orxaytaayti ammikki ca ka nakayta qapa.” Ka kaareeta ishi oorshen.
29Yoosefi ete piniyaami inna a aayya takkan kara ollin daladene akkeeyye, ikide, “Innasene a' kiitene kamma orshen sene?” Ka ishi' kide, “Innaayyo, a Waaqa ke' sako.” 30Yoosefi ete innaasso akkeeyye qoota ishi' dakaate malla, ishootta kapa alle' xa'e ka aane kaataadi kara' pooye.
31Ka ildaappa jaqade ka kuli ishootta kapopa sooke. Ka duupade ka akka piifa dehayshane ajaje.
32Qoota orra Kipsi orra Ipru olli dameeta, nyala kapa' dikino malla, Yoosefi'i xawwi damta daashen ka hellaassoti'i, xawwi' dehayshen ka orra Kipsi a eeyye damta dammooti'i, xawwi' dehayshen. 33Hellaasene a opa Yoosefi, Yoosefi mina desa akka oli kamma' qatenen a kutta desa paayyen ka haka a shakkati olkamma' qaa'en. Ete akkima qaa'en tooynaaneeyye, oppe qawwaawen ka oli totooyyini. 34Ikka damtase Yoosefi tura kitto quda ishootta' qeenni ka piniyaami'i harka keni daashen. Ikka Yoosefi olli damen ka ikken ka duduttanen ka xasooden.
Currently Selected:
Mataafa Uumata 43: MaQu
Highlight
Copy
Compare
Share
Want to have your highlights saved across all your devices? Sign up or sign in
