Mataafa Uumata 40
40
Yoosefi orxaya nuqusa a hidaappa caati'i olsa fure
1A Yoosefi tika hida kara cooyye, kuyyaata takkaayye, saara a orxaya nuqusa Kipsiti taadeta daddaanna ka saara a orxaya a damta koona, dapa koden ka nuqusa nyarrahasiisen. 2Nuqusase Feri'ooni ka saarrasene lakki qara'e, akata miirode. 3Ikka tikase a hida a kara Yoosefi hidame kara'e, porase a ajajampayta tika hida kara' hidacciise. 4Ajajampaytase ka harka Yoosefi oppa ishootta xaaye. Yoosefi ka ishootta qara tooyni. Ishootta ka tika hida kara kuyyaata lamayteeta jaren.
5Saara a orxaya taadeta daddaanna ka saara a orxaya a damta koona halkeetta takkaayye, lamattiiyyi olsa olsooden, furaasso kan karkar.
6Yoosefi ete parri teykantiiyyi ishootta kapopa kedeeyye, ishootta a eeyye nyarrahe'e akke. 7Ka ishootta' kide, “Ata awwe maana'e asse miinta poornassen?”
8Ishootta ka ishi' kidene, “Olsan olsoonne ka nama ino' furo dapne.”
Yoosefi ka ishootta' kide, “Nama a Waaqa olsa fureeta ishi' daashe fura ettaninniiy, me olsaassin ana' torra.”
9Saara a orxaya taadeta' daddaanna ka kide, “Dishma a wayneeta'en olsaan akke. 10Wayneese qaraayye, saara sessa ca. Ikka danka sooksade ka eennoow pise ka dalta horkookshen ka palen. 11Sitiiyyi kuppaayya a Feri'oonin harkoppa qapa. Anka wayneetase kara' diipe ka aane ka harkoppa Feri'ooni' daashe pahata.”
12Yoosefi ka ishi' kide, “Olsoosen maana akka kodden dakkaysado. Saarose a wayneeta sessa, kuyyaata sessa kideeta. 13Nuqusa kuyyaata Sessa kamma hidaappa ke fura. Ka dapaayti ke' diisha ka kodaayti a xatta' qaropa ke oorsha. Akka akkima a xatta saara a orxaya nuqusa taadeta daddaanna kodditeeyye koonitto mina'e, nuqusa' taadeta daddaassa. 14Ma xoori awta we piisa ke' qajeelane ana in teyman ka ana dikado. Ka qootiyyo desa Feri'ooni kapa lele ka akkan tikoose a hida kara sooko saanta ana' fade. 15Irreetanne piita Ipruti ana qeeden ka arepa anan de'en. Areeyye nefo an we an mihinnin mali are ana hiden.”
16Saara a orxaya a damta koona ete akka Yoosefi olsa saara a orxaya taadeta daddaannaati' fayya fure dakayeeyye, olsaadi Yoosefi' torre ka kide, “Anti olsaan olsoode'ew, putteena masoopeta sessan xaysade ana' pahata. 17Masoopeta piisa qara' qatte kara damta a nuqusa' harmisamte ika lekayteeta ca. Xampira ka de'en ka an isi qara qapooyye damtase masoopetase kara dammi.”
18Yoosefi ka ishi' kide, “Masoopetose sessa kuyyaata sessa mina. 19Nuqusa kuyyaata sessa kammaayye hidaappa ke fura. Ka matta ke qara muracciisa ka pukkaayti akka qoyra qara' fannisamo' koda allitta ka so'aatti dama.”
20Kuyyaata sessattatiiyyi, letta a deloota Feri'ooni ulfeessammi. Feri'ooni ka sankulta kode ka orrase isha olli piita mukinno hale. Ka saarase a orxaya taadeta daddaanna isho saarase a orxaya a damta koonoti tika hidaatiiyyi mukissampayasene turopa hale. 21Ka saarase a orxaya taadeta daddaannaati kodaadi a deyyo qaropa oorshe, ikka kuppaayyasene a taadeta nuqusa daasha paayye. 22Saarase a orxaya a damta daddaannaati' xoori ifannisacciise. Akka Yoosefi olsaasso ishootta fure mina'e, we piisa ka asseew qara' kodden.
23Xoori saarase a orxaya taadeta nuqusa daddaannooti iYoosefi teyme, umma matte isha in oorsanne.
Currently Selected:
Mataafa Uumata 40: MaQu
Highlight
Copy
Compare
Share
Want to have your highlights saved across all your devices? Sign up or sign in
