Mataafa Uumata 39
39
Yoosefi isho iskatteeta Botifaar
1Nakkaatewwa a Isima'eeli ka piita Kipsi opa Yoosefin aanen. Botifaara ka ishootta qara Yoosefi karpishshuma' pidde. Botifaara saara orrase tika nuqusa Kipsi tooytinooti. 2Yoosefi' qoota Yaahiwwe isha olli co malla, tikase a kara kalo karaayye wa koona piisa ka ishi' qajeelli. #koda 7:9 3Botifaara ete akka Yaahiwwe Yoosefi olli co, wa koona piisa ka Yaahiwwen ishi' qajeellaan ikka akkeeyye, 4akata Yoosefi jaalade ka orxayaadi piisa qaropa jaalshe ka tikaadi ka wa qapa piisa harkaadippa' diishe. 5A Yoosefi tika Botifaarati wa ca piisa qara' shuumame desa paayyatte, Yaahiwwe ka Yoosefi minanne, wa namoose a Kipsi tikoppa qapa ka wa duloppa qapa piisa sake. 6Semmalla Botifaara' qoota Yoosefi akka waadi a qapa piisa qara ishi' tooyo kode malla, damta a dammo maliiyyi waadi a qapati desa wa dikanna in caan.
Yoosefi aren nameeyye xarjaallitta ka akata paxaari. 7Iskatteeta Botifaara ka oori Yoosefi xajeelte ka ishi' kiite, “Xooye ka ana olli muke.” 8Isha' xoori itiite ka isheetta' kide, “Ha poqallaayyo, qoota waadi a qapa piisa akkan muksho kokkonayshe ka harkiyyo oppa' daashe malla, wa a qapaati desa qaapni in co. 9Poqallaayyo nefo wa tikoose kara ca akkan muksho'e hupna ukkumeeta ana' daashe umma wa upa in caan. Isha wa harkiyyo oppa' daasha diishe takkan nefo in caan ma, qoota iskatteetaadi koddite malla, ke patta ana in daannin. Anti xawwi, attan juppoota asse pahato koda ka Waaqa nyarrahasiisa?” 10Isheetta kuyyaata piisa qootoseti desa isha kaassanni; Yoosefi' xoori isheetta olli mukitta diishe ma, kapopa dehaatta kuli tiite.
11Kuyyaata takkaayye, ete Yoosefi koda koda tika kelopa kulleeyye, nama takka nefo tika kelaayye in co. 12Sitiiyyi iskatteetase a poqallaadi mehadda a kalsade'e quda' qapte ka ishi' kiite, “Ana olli muke.” Isha' xoori mehaddasene' xaadi harkoppa isheetta' diishe ka tika kelaayye, alle oytaapa qahe. 13Ete mehaddasene' xaadi harkaadippa' diishe ka tika kela alle' qahe akkiteeyye, 14Orxayaadi haleete ka ishootta' kiite, “Ha Ipurittase a diirtiyyo apari ishin kale ino jeerinni in heenne! Kaata an kara mukna karopa ana qaropa kale anti ka ulupitta oppa' qape. 15Ete akkan akka orra ana' awlo ullupe dakayeeyye, lakopa alle' qahe.”
16Ikka haka poqallasene a Yoosefi tikopa tiitaawnaane'e, mehaddasene a Yoosefi isi kapa' xaayatte. 17Ka ete kaleeyye, ishi' torrite ka kiite, “Ha Ipurittase a arepa orxuma' haadatte, ana jeerissa'e kaatasene an kara mukna karopa ana qaropa kale. 18Ka eten ullupnooyye, mehaddaadi ana qara' diishe ka alle lakopa qahe.”
19Poqallasene ete sede a iskatteetase' xaadi kiite, “Orxaytase' xaayti asse ana kode” Dakayeeyye, akata miirode. 20Ka oori Yoosefi qeede ka tikase a hida a nqusa kara orra hidacciisno opan aane ka eeyye isha hidacciise. 21Ma xoori Yaahiwwe Yoosefi olli ca ka akata isha xo'e; ikka ajajampayta tika hida tura ulfeena akkade. #koda 7:9 22Semmalla ajajampaytase a tika hida ka orra hidame piisa qara'e, Yoosefi shuume. Yoosefi ka wa tika hida kara kodamma piisa kooni. 23Qoota Waaqa Yoosefi olli co ka akka wa koona piisa ishi' qajeelane' kode malla, ajajampaytase a tika hida we takkan nefo qaapni in co.
Currently Selected:
Mataafa Uumata 39: MaQu
Highlight
Copy
Compare
Share
Want to have your highlights saved across all your devices? Sign up or sign in
