Mataafa Uumata 38
38
Yihuta isho Ti'imaari
1Sitiiyyi Yihuta hellaasso kapaayye xa'e ka kanta Atulaami opa aane ka nama takka Hiira kidammo kapa kallaanni. 2Ka eeyye'e enenta a Kene'aanitta takka Shu'a kidammoti akke ka heme. 3Isheetta ka inna hitte ka inna diirta' xaayte ka maxxa ishi' koote ka kiite, Eeri. 4Ka a lammattati hitteew ka inna diirta' xaayteew ka maxxa ishi' koote ka kiite, Onaani. 5Ka a sessattati hitte ka inna diirta' xaayteew ka maxxa ishi' koote ka kiite, Seella. Ishootta sitiiyyi piita a Aksiipi kidammittooyye kalan.
6Yihuta ka innaadi a kuuta Eeri'i enenta Ti'imaari kidammitto heme. 7Eeri xoori qoota kodaadi a neeqan Waaqa miirayshe malla, Waaqa alle isha ishshe. 8Ete Eeri to'e kammaayye, Yihuta i'Onaani' kide, “Akka tika qartaayshina oppa' hellaa' xaayto'e, iskatteetaadi quda' oore.” 9Onaani' xoori hellaa dalada akka xaadi in koddinin qoota upo malla, oto iskatteetase a qartaaysho olli muknooyye, akka innassoti hellaa in dalannini'i, xormaadi alle' piitopa urqinni. 10Kodoose' xaadi qoota Yaahiwwe miirayshe malla alle'e isha ishsheew. 11Sekkammaayye Yihuta ka Ti'imaari' kide, “Haka innaayyo Seella kuttanno kara'e, aane kello tika toolaayshinati' tawe ka in hemaman.” Wa malla asse kide, “innoosen kuli akka hellaa a taakane mina'e, ana tura to'a” kide ka qaape. Ti'imaari ka oori ante ka tika toolaayshotiti kallaatta paayyite.
12Parra lekaya kammaayye, iskatteeta Yihuta, enentase Ashu'a ka toote. Yihuta ka ete pooyta dikkishe ka xasa oorsadeeyye, moottaadi Atulamittase Hiira ollinni piita Tiimina opa orra kahirraadi quda nyirfa mujno kapopa aanen. 13Orra ka Ti'imaari' kide, “Aappa opa diirtaayti kahirraadi quda nyirfa muja Tiiminaapa anni.” 14Seella akka kuttade, Yihuta ka akka Seella Ti'imaari quda ooro in koonin qoota upnaatte malla, Ti'imaari mehaddasene a dapteeta'e alle isi quda sookisse ka mehadda pila' kalsatte ka japaran matta qara dekatte. Ka porase Tiiminaapa anno kapa'e, xarra a paleeta Enayimi tura' qa'ite.
15Yihuta ete isheetta akkeeyye, qoota isi qara dekte malla, almalitteeta ishi' pahanaatte. 16Isha akka iskatteeta innaadi koddite qoota in upnaannin malla, kapopa maqe. Ka isheetta' kide, “Ke kapopan de'a ka?”
Isheetta ka kiite, “Oto ana kapopa deetooyye maana ana' daassa?”
17Isha ka kide, “Horeetiyyo oppaayyen innayya qolpayta ke' erka.”
Isheetta ka kiite, “Ipaxaari ma, haka innayyosen erkinitto'e qapteeta ana' daashe.”
18Isha ka kide, “Xawwa maanan kapa ke' qapsiisa?”
Isheetta ka kiite, “Jifeeta a maxxaayti qara co ka teepa ishin rakkannitta isho uleetaayti ana' qapsiise.” Isha ka wa kaassatte piisa isheetta' daashe ka olli muke. Isheetta ka ishi inna hitte.
19Ka sekkammaayye ela xaate ka tikopa kalte. Ka mehaddasene alle sookisse ka a dapteeta' kalsatteew.
20Yihuta ka qapteetase furatta'e, innayya qolpayta Atulaamittase qara iskatteetase kapopa erke. Isha' xoori ete aaneeyye, iskatteetase idape. 21Ka orra piitooseti kaassade ka kide, “Iskatteeta takka almalummitto ka xarra Enaayimi tura' qa'ainitto ayshopa ante?”
Orrase ka ishi' kide, “Iskatteeta asse pahato piitinno oppa in kitto.”
22Aappaase ka Yihuta kapopa oore ka ishi' kide, “Iskatteetase in dape. Orra piitoseti nefo ikiini, ‘Iskatteeta asse pahato piitinno oppa in kitto.’”
23Yihuta ka kide, “Anti innayyasene in isheetta erkeey, atti nefo ka isheetta faate ka dapteey, akka orra inon jeerinnini'i, wa an qapsiise a isheetta' paten.”
24Leya sessa kammaayye, Yihuta'e lelen ka kidene, “Haantota innaatti i'almalumte ka laka qara inna hitte.”
Yihuta ka kide, “Paleeta kara lakopa alle' sooksha ka apittan kupa ikka tooto.”
25Isheetta ete paleetoppa isheetta sooksheneeyye, Yihuta kapopa erkana erkite ka kiite, “Jifeese ka teepa ishin rakkannaane isho uleetose a ayno akka koddite upado, anti namooseti'in inna hiteey.”
26Yihuta ka mehaddoosen akka xaadi kodden, upnaade ka kide, “Qootan innaayyo Seella akka isheetta quda in oorrin dawre malla, isheetta ana kapa dukaata qapa.” Sekkammaayye lammatta'e isheetta kapopa in anne.
27Ete xaaya kela kayteeyye, Ti'imaari akka sallahama karittoppa qapto upnaatame. 28Ete xaaynittooyye inna takkan ka xata harka sookshen. Iskatteeta xaaysannitto ka harka mina ishi rufta a tiima' hiddite ka kiite, “Ini paayyota' dalada.” 29Ma xoori ete innasene harkase ela oorsadeeyye, inna pila'e kapan xata dalade. Xaaysattootase ka ishi' kiite, “Atta asse pora maajjite ka kapan xata sookte?” Semmalla maxxa innasene Paayyota' dalade ka “Faares” kidame. #38:29 faares afa Iprutinni, oppan fulaha ka sooka kideeta. 30Sekkammaayye innasene harka mina rufta a tiima' qapa ka daladen. Maxxaadi ka Saaraahi kidame.
Currently Selected:
Mataafa Uumata 38: MaQu
Highlight
Copy
Compare
Share
Want to have your highlights saved across all your devices? Sign up or sign in
