Mataafa Uumata 37
37
Olsa Yoosefi
1Yayqoopi piitase a aappaaysho Hisaaqi oppa' kallaade, piitase a Kene'aani oppa kala. 2Sene are kammopa xata ca torra a qoota toola Yayqoopiti desa torrina.
Yoosefi ete para kudanka tappa kayeeyye, hellaasene' xaaysho a Paala isho Silfa xaayene olli kaharra isho telalla sikinni. Ka dapa a hellaasso' koonaan kalli ka aappa kapa lelli.
3Isira'eeli' qoota keranta kela Yoosefi xaaye malla, hellaadi piisa qaran qapto'e isha xooni. Ka mehadda sira paxaara' qapa ishi' heedishe. 4Hellaasso akka aappaaysho ishootta qaran qapto'e, Yoosefi xoono upnaaden ka piisanti Yoosefi needdaden. Ka isha olli afaa fayya' haasawanni in kinnin.
5Halkeetta takkaayye, Yoosefi olsa olsoode ka hellaassoti' torre, ikka a deyyo qaran qapto'e, isha needdaden. 6Isha i'ishootta' kide, “Olsa an olsoode'en ishina' torraay, dakkaysada! 7Piisantiiyyin duloppa marrana kappa' hiininna. Marrantiyyo ka ela qa'atte, marranaassin ka marrantiyyo kapa tiitayshen ka ishi' sakataden.”
8Hellaasso ka ishi' kidene, “Inan ka ino qara'e' nuqusumta? Moon ino pidda' heenta?” Ka olsoosen ka wa a ishootta' kide qaran xaate'e a deyyo qara qapto'e akata isha needdaden.
9Kammaayye ikka olsa pila olsoodeew ka hellaassoti torreew. Ka ishootta' kide, “Amma nefo olsa pila'en olsoode. Letta ka leya isho hiikka kudanka takka ana' sakatade.”
10Ete olsasene a hellaassoti' lele aappa torreeyye, aappa isha peeqe ka kide, “xawwi sene olsa atta paha? Hela ana ka aayyaassin isho hellaassina ke' sakatada?” 11Hellaasso oori akata miiroden. Aappaaysho' xoori iskara'e qapade ka oppaaw dikanni. #koda 7:9
Hella opa Yoosefi akka Yoosefi kataden
12Sekkammaayye hella opa Yoosefi horeeta aappaayshoti qeeden ka piita Sekemi opa kasen. 13Isira'eeli ka Yoosefi' kide, “Hellaassin akkima piita Sekemi opa horeetan kasen i''upta. Semmalla ishootta tooyya'e' anta.”
Yoosefi ka kide, “Iyya, in aana.”
14Ikka oori ishi' kide'e, “Aane ka hellaassin isho horeeta wa oppa caane tooyye ka otootaayshotin ana' kale.” Ka naaba Keprooniti desa Yoosefi erke. Yoosefi ka aane ka piita Sekemi' kaye.
15Ete koommayta oppa pora ishootta faanooyye, nama takka mina de'e ka isha kaassade ka kide, “Ata maana' faani?”
16Yoosefi ka kide, “Hellaannon faani. Hela pora oppa horeeta sikinnaan i''upta ka ana' lelta?”
17Namase ka ishi' kide, “Are in caan ma, a olli' kiinaane Dotaaynipan kotaannaan dakaye.” Yoosefi ka hellaasso kamma' aane ka Dotaani'i ishootta akke.
18Ishootta ka laka desa isha akken ka a ishootta kapa in kaynin turanne, akka isha ishshane'e suladen. 19Ka olli' kidene, “Olsampaytase are deeniiy, 20xooya ka isha ikanna ka qaawwosen are ca oppa takka karopa kanna. Ka aappinno' kiina'e, ‘Pinanta a neeqa isha dame.’ Ka olsoosen xaadi akka keeto koddanen tooynaay.”
21Xoori Roopeeli ete dakayeeyye, ishan paha fade ka kide, “Inna, katin isha an ikanni in kinnini wayyi. 22Qaawose are koommayse oppa co karopa kata diisheey in ishshan.” Isha wa malla asse kide, Yoosefin paha ka aappa kapopa erka fade. 23Yoosefi ete hellaasso kapa kayeeyye, hellaasso mehaddasene' xaadi sira paxaara' qapa'e isha quda kakkaa'en. 24Ka isha qeeden ka qaawa a kara pisha koken karopa katen.
25Sekkammaayye, ete damta kute'eneeyye, nakkaatewwa a Isima'eeli'i laka desa akken. Ishootta qimaamewwa ka miissa alaawno ka karpeeta kaalla qara fe'anni ka piita Kele'aditi xata piita Kipsi opa a'anni.
26Yihuta ka hellaassoti' kide, “Hela amma innaanno ikassa ka akkan ikanne juuteeta maana ino' koota? 27Ha isha innaanno ka diikinnooy, an isha ikanno kapaayye, xooya ka Isima'eeleta' kanna.” Hellaasso ka wa isha' kide oppa' salen. 28Ete nakkaatewwasene ishootta kapa kayeneeyye, qaawase kara Yoosefi qeeden ka pirreeta kunda lakki nakkaatewwaseneti' katen. Nakkaatewwasene ka piita Kipsi opa Yoosefin aanen. #koda 7:9
29Roopeeli ete tiitaawe ka qaawase kara Yoosefi dapeeyye, nyarrahata'e meeha isi quda kakkaa'e. 30Ka hellaasso kapopa aane ka ishootta' kide, “Ha innasene' xanno eeyyeeyye in caaneey, hela xayyo attan kodda?”
31Sekkaammaayye, qolpayta qalen. Ka mehadda a Yoosefi qeeden ka diikan lahen. 32Ka mehaddasene' qeeden ka aappaaysho kapopan kalen ka kidene, “Mehaddoosenen teyneey, upado. Hela kati mehadda a innaanno'e koddane?” 33Isha ka akka mehadda innaadi' kodden upnaade ka kide, “Aa, mehadda innaayyo. Hay! ha pinanta neeqa innaayyo dame. Dukaatanne pinanta Yoosefi tiiqatte ka damte.” 34Ka oori nyarrahata'e, mehadda isi quda kakkaa'e ka mehadda dapteeta kalsade ka nyarrahe ka kuyyawwa lekaya pooye. 35Hellaadi a hamiyya ka tuparraadi piisa ka akka isha' xasa oorsado'e, kapopa de'en. Isha' xoori xasa oorsatta imalaale ka kide, “An asse innaayyo pooyno quda'en to'a ka hawlama;” Ka oori pora pooytaaw pooyni.
36Sitiiyyi Isima'eelettase a piita Midiyaami Yoosefi qeette ka piita Kipsiti aappa takka Potifaara kidammo' katte. Aappose nefo saara a orra tika nuqusa a Kipsi tooytinooti.
Currently Selected:
Mataafa Uumata 37: MaQu
Highlight
Copy
Compare
Share
Want to have your highlights saved across all your devices? Sign up or sign in
