Mataafa Sooketa 35
35
Taanteta a kuyyaata nessuma Waaqa ulfeessa
1Muuse ka xora samayta Isira'eeli piisa ollopa hale ka ishootta kide, “Akka kootane'e ajajadda a Yaahiwwe ishina daashe sene. 2Kuyyaata lehi koda kootan; ma xoori kuyyaata tappatta akka oppa nessattane'e Yaahiwwe'e kuyyaata nessuma a qulqullaawte koddita; nama kuyyaase oppa koda kodanno a alle ishshamo. #sooka 20:8-11; 23:12; 31:15; 34:21; Lewi 23:3; ooreta 5:12-14 3Kuyyaata a nessuma Waaqati tikka kara kaltane kara apitta nefo in opayshan.”
Daassata a koda tukkana Waaqati daasammitto
sooka 25:1-9
4Muuse ka xora samayta Isira'eeli piisa kide, “Wa Yaahiwwe ishin ajajina sene; 5Yaahiwwe daassatan xooya; nama karitta kara daassata heeno Yaahiwwe a daassata warqeeta ka a dakara pirreeta ka a sipla poora 6ka rufta a moonta pahato ka a awla ka a tiima ka xaynaata a qora talpa oppa shippamte ka nyirfa tela 7ka kollatta laaha a qalameeta tiimatin daaten ka kollatta a pahashen ka jeela kolalta 8ka sayteeta ekerta a ipsa ka qimaamewwa ka sayteeta a daatannaan isho tankartase alaawnittoti 9ka dakaddasene heraan kokkoka a merkidi kidamma isho furowwa efuudi isho akalase a kessoppa qara kalla kalisoota kalsha.
Mehadda a tukkana Waaqa kara kodaan kodane
sooka 39:34-43
10“Harmoota a ishin oppa kitto piisa ka deeto ka wa a Yaahiwwe ajaje kooto. 11Tukkanase a Waaqa ka wa qaran dekene a karan ca ka a laka tulan ca ka rakkumampaya xoorrawwa ka qapayaadi ka tarkowwaadi ka tuudda ka kiriyyaasso 12ka taapota ka molookaddaadi ka dufanaadi a diissata ka kaarantaadi a isheetta tura dekno 13ka tarabbeesa ka molookaddaadi ka meehaadi piisa ka laaqqotase qulqullaawte a Waaqa daannaan 14ka porase qara ipsada xaaynaan ka meehaadi ollinni ka ipsada isho sayteetaaysho 15ka meehase qara tankarta qayyannaan isho molookaddaadi ka sayteetase qulqullaawte a daatinaan ka tankartase alaawnitto ka kaarantase a xarra tukkana 16ka pora a qara kalisoota a kupannitto kalinnaan ka paallataadi a sipla poora oppa kodamte ka molookaddaadi isho meehaadi piisa ka saahinase kara pisha jaqannaan ka meehaadi a kara xaaynaan 17ka kaarantadda sene a paapaha ka tuuddaasso ka kiriyyaasso ka kaaranta kullaysuma xarra paapaha 18ka shikaalla a tukkana isho a paapaha ka watarowwaasso 19isho mehaddasene a qeesewwa qanqanissa dawame a pora qulqullaawe kara ishin koda koonaane; sene nefo mehaddasene a Arooni qeesitta kalsanna ka a hellaadi a diira oto koda qeesuma koonaane kalsannaane a koden.”
Daassawwa a samayta ishin de'e
20Sekkammaayye samayta Isira'eeli piisa ka fuula Muuse tura xa'e ka aane. 21Nama wa karittaadi kara daasatta dikade a hapuraadi isha xaxxaashe piisa akka tukkanase a Waaqa ka koda kela kodammo isho mehaddasene qulqullaawe kalsannaanetin kodane Yaahiwwe daassatan de'e. 22Diira isho iskatta a karittoppeela daassata heennaade ka siraasso a xolma kela ka a nappaappa ka a qupiyya mina isho siraasso a warqeeta ika lekayta Yaahiwwe xawwi reexxen ka kalshen. 23Nama rufta moonta pahato taaki a awla taaki a tiima taaki xaynaata qora talpa oppa shippen qapo taaki a ohaata nyirfa tela oppa dawen qapo taaki kollaya a kahirra a qalameeta tiimatin daaten qapo taaki a koka pahasame qapo piisa ka ishin de'e. 24Nama kalisoota a dakara pirreeta taaki a sipla poora qapo piisa ka daassata Yaahiwwe kode ka ishin de'e; ajeela kolalta qapo piisa ka akka koda parapaaccisno qara nakayo'e ishin de'ew. 25Harmoota iskatta a shippa sahato ka rufta moonta pahato ka a awla ka a tiima isho a xaynaata qora talpa oppa shippammitto harkaassotin shippo ka ishin de'e. 26Harmoota iskatta a karitta kareela shippa heennaade ka nyirfa tela shippoow. 27Saarra ka dakadda heraan kokokkoka a merkidi kidamma isho sira a efuudi isho akala kessoppa qara kallaatin de'en. 28Ka akka sayteeta ipsa isho a qulqullaawte ka tankarta akata alaawnittoppa kodamto'e saytewwa isho qimaamewwaan de'en. 29Diira isho iskatta a Isira'eeli piisa ka kodase a Yaahiwwe Muuse ajajeeti akka karittaaysho ishootta xaxxaashe qara'e heennasotinni Yaahiwwe Waaqa'e daassatan de'en.
Harmoota a tukkanase a Waaqa qupnitto
sooka 31:1-11
30Muuse ka samayta Isira'eeliti kide, “Tin Yaahiwwe kafa Yihuta oppaayye Paasili'eli innasene a Uuri oopase a Huuri reexade. 31Ka akka koda harmuma ika lekayta'e ettanissa ka ookuma isho upna qapnaado'e, hapura Waaqa ishoppa immake. 32Ikka koda harmuma a warqeeta ka a dakara pirreeta isho a sipla pooroppa koda'e akeeka sookshe. 33Ka dakadda sira xefa ka qora laaja ka koda harmuma ika lekayta piisa koda'e, ishi ettanissa daashe; 34Waaqa ka isha isho kafa Taani oppaayye Oholi'api inna Hisamaaki akka orra pila kollishane'e ishootta ettanissa daashe. 35Ka akka koda harmoota koonitto piisa kodane'e, taaki a akeeka sookinna kodane'e, taaki akka puja orra a rufta moonta pahato ka a awla ka a tiima ka xaynaata qora talpa oppaayye shippamte a dawampayta olloppan pujino ka dawno mina dawane'e ka koda ika lekayta kodane'e ka akeeka lekayta sookshane'e, ookuma ishootta daashe.
Currently Selected:
Mataafa Sooketa 35: MaQu
Highlight
Copy
Compare
Share
Want to have your highlights saved across all your devices? Sign up or sign in
