Mataafa Sooketa 33
33
Waaqa akkima Isira'eeleta Siinaayye xaato ka anto ajaje
1Yaahiwwe ka Muuse kide, “Ke isho samayse xaayti a piita Kipsi kara sookisse areeyye xa'a ka piitase an Aprihaami ka Hisaaqi isho Yayqoopi xaxade ka kide, ‘sanynyeetaayshin'en daasha’ oppopa aana. #uuma 12:7; 26:3; 28:13 2Anti erkampattootan ke turandesa erka ka Kene'aaneta ka Amoorata ka Hittaata ka Feresaata ka Hiwwaata isho Iyyapuusata ishin tura daana. 3Piitase a oppa takma ka aanna puren oppopa aana; ma xoori ishina qoota samayta xolma kokkonnanno kodditen malla, akkan poroppa ishin an pirrini'i, anti ishin olli an aano.”
4Samayta ete leloose neeqa dakayeeyye, inyarrahe; umma nama takka nefo sira isiquda in koddanne. 5Yaahiwwe ka Muuse kide, “Samayta Isira'eeliti kide, Waaqa ikiini, ‘ishina qoota samayta xolma kokkonanno kodditen malla, oton shakkayta'en ishin olliiyyi aanaayye, in ishin pira; semmalla siraassin isiquda sooksha, waan ishin qara koda'en piisadaay.’” 6Semmalla samayta Isira'eeli ka a irroota Siinaati xa'e kammaayye, alle'e sira isiquda sookshe.
Tukkana Waaqa
7Muuse ka tukkanase qeenni ka safareeyye laka tulan pora seka oppa daapni ka ishootta kiini, “Tukkana Waaqa.” Nama Yaahiwwe faanoo ka tukkanase safareeyye laka tulan pora seka daapen opa anni. 8Oto Muuse tukkanase a Waaqa opa anno piisaayye, samayta Isira'eeli piisa ka tukkannaasso kara sookni ka xarra tura qaqqa'anni ka haka Muuse tukkanase a Waaqa kelopa kullino'e isha tooyni. 9Oto Muuse tukkanase kelopa kullooyye, tuuda urratta ka lekkanni ka tukkana tura qa'anni. Yaahiwwe ka Muuse haasawanni. 10Oto tuudase a urratta lekkado ka tukkanase tura qa'ado ikka akkaneeyye, samayta Isira'eeli piisa ka tukkannaasso tura qaqqa'anni ka sakatanni. 11Akka nama moottaadi olli haasawanno mina'e, Yaahiwwe ka Muuse olliiyyi fuuloppa desa haasawanni. Oto Muuse safaropa tiitaawnooyye, inna Newe Iyyaasuse shakka isase Muuse qaarqaarro, tukkana kela aparipa anni in co.
Waaqa akka samaytaadi kapa in maynini'i kippeeta a daashe
12Muuse ka Yaahiwwe kide, “Samayse marra'e ana kiite ma; nama ana olli erkinitto ana'e a upnaanne; ka ana kiiteewwe, ‘Fayya'en ke upa akka fuuliyyo tura teyyatama teyte.’ 13Semmalla amma oton in fuulaayti tura teyyatama teyeeyye, akkan ke upnaado'e ka fuulaayti tura teyyatama teyo'e, saantadaatti ana kollishe ka samayse akka samaytaayti kodde matte qapnaado.”
14Yaahiwwe ka ishi kide, “Ana mattiyyo ke olli aana ka ke nessisha.”
15Muuse ka oorshe ka kide, “Oto atti mattaayti ino olli a anni a kinniniiyyi, areeyye inon xaashan. 16A taakkati akkan ana isho samaytaayti fuulaayti tura teyyatama teyne, maanaanne upnaysamta? Waan ana isho samaytaayti, samayta piita kapa ishin pursamminna, ino olli aanetaaytinni?”
17Yaahiwwe ka Muuse kide, “Qootan fayya ke upo, akka fuuliyyo tura teyyatama teyte malla, wossen a kiite asu in koda.”
18Muuse ka ishi kide, “Atara ulfeenaayti ana akkishe.”
19Yaahiwwe ka ishi kideewwe, “Paxaarumtiyyo piisan ke turopa qattisha ka maxxiyyo Yaahiwwe ke turan desa salisha. Ka an suraysanno suraysada! ka an ishi diinno diisha! #Roomi 9:15 20Ma xoori nama ana akko caanni in cooy; fuuliyyo akka a ettanisso.” 21Yaahiwwe ka ishi kide, “Tin atti pora ana kapa cooyye; shila qara'e qa'atta; 22Ka oto ulfeeniyyo a eyyen tarpinooyye, an ka paqitta shila kara ke xaaya; ka hakan eyyen tarpino kara'e harkiyyon ke qara deka. 23Ka harkiyyo ke qara maysha akka tultiyyo akkita! Ma fuuliyyo in akkaado.”
Currently Selected:
Mataafa Sooketa 33: MaQu
Highlight
Copy
Compare
Share
Want to have your highlights saved across all your devices? Sign up or sign in
