Mataafa Sooketa 32
32
Pahana innayya a warqeetoppa kodameeti
ooreta 9:6-29
1Samayta ete akkima Muuse irroota qara jare ka lekkanni in kinnin akkeeyye, Arooni kapopa ollopa aane ka ishi kide, “Wa Muusese piita Kipsi kara ino sookshe qara kaye an upnooy, waaqadda ino tura aana ino kode.” #koda 7:40
2Arooni ka ishootta kide, “Sira warqeeta nappaappa a iskattaayshina ka a hellaassin a diira isho a tuparra ollopa poha ka ana kapopan xooya.”
3Samayta piisa ka nappaasso oppaayye sirasene a warqeeta sossookshe ka Arooni kapopan aane. 4Ikka ishootta qara warqewwasene qeede; ka liilshe ka pahana innayya okkattati kode;
Samayta ka kide, “Isira'eleteeyye, waaqaddasene piita Kipsi kara ishin sookshe tooy sene.” #nuqu a 1ta 12:28; koda 7:41
5Arooni ete sede akkeeyye, pahanasene a innayya okkatta tura'e pora kalisoota kode ka salishe ka kide, “Parriyyi kuyyaata a xaysonessuma Yaahiwwe.” 6Parraytaadi paraappan samayta ka xa'e ka kalisoota kupnnitto isho a takkumta kalshe ka damta ka ikkayta kuti'e ka oori kirpa'e piite xa'e. #Qoro 1ta 10:7
7Yaahiwwe ka Muuse kide, “Samaytase xaayti a piita Kipsi kara sookisse juppoota kodeey, lekkado. 8Saanta an ishootta ajaje qara jarjartan alle maqen ka pahana innayya okkatta a liilsame issi kodaden ka ishootta sakataden ka ishootta kalisoota kalshen ka kidene, ‘Isira'eleteeyye waaqaddasene piita Kipsi kara ishin sookshe tooy sene.’ 9Anti samayse in akke; tin ishootta kan samayta a xolma kokshe. 10Amma miiriyyo a kuttati ishootta qara opaye, Anti ishoottan pashshaay, qaraayye anan dawran.” Anka samayta kuttayta ke kara sooksha.
11Muuse xoori Yaahiwwe Waaqase xaadi naappade ka kide; “Oo Yaahiwwe, samayse xaayti a hupnase xaayti kutta ka harkase xaayti kokkokan Kipsi kara sookisse qara'e maana'e miiraayti asse opaya? #dikoota 14:13-19 12Kipseeta maana'e kiita, ‘Ha qoota neequmta ishootta qapo malla irrowwa qara ishootta pira'e ka piita qara ishootta patissa'e ishootta sookshe.’ Aarase xaayti a apitta mina opaye alle harfisado ka ishootta diishe ka samaytaayti qara'e wa neeqa an qeedan. 13Akka orxayaasene xaayti Aprihaami ka Hisaaqi isho Yayqoopi mattaayti issin xaate ka kiite, ‘Sanynyeetaaytin akka hiikka moonta mina leksha ka piisse are kitto an ke kippeeta daashe sanynyeetaayti daashe, ikka haka paraparati lehnaatta’ matte oorsado.” #uuma 22:16-17; 17:18 14Yaahiwwe ka pateettase a samaytaadi qara qeeda dikade alle diishe.
15Muuse ka tiitaawe ka dakaddasene lakki qaqqaaha a maakkuma a harkoppa qapadetinni irroota qara lekkade; dakaddasene nefo paka lakki piisanne qara taafamen. 16Dakaddosen nefo koda Waaqa; a taafese qara pojamte taafe nefo Waaqa.
17Iyyaasu ete nessa a samayta horro dakayeeyye i Muuse kide, “Ha safaroppa nessa oranna'e dakaanni.”
18Muuse ka ishi kide, “Ha ini nessa kirpa diisheey, uuyata a putayma'en umma ullupitta a putamitta'en.”
19Muuse ete safara kapa dehaadeeyye ka pahanasene a innayya okkatta isho kirpase akkeeyye, a kuttati miirode ka harkoppaayye dakaddasene qaqqaaha alle dakke ka irroota kela pappaqshe. 20Ka pahana innayyasene a okkatta a kodadene apittan kupe ka yooqe ka daamma kode ka pisha qara fide ka samaytase a Isira'eeliti ikishe. 21Ka Arooni kide, “Samayse maana ke kode akka juppoota asse neeqa karopa ishootta kalisse?”
22Arooni ka ishi kide, “Poqallaayyo a kuttati assen miiroodan, samayse akkima neequmta qaropaaw kammo i'upta. 23Ishootta ana kide, ‘Wa Muusese piita Kipsi kara ino sookshe qara kaye ino an upnooy, waaqadda ino tura aana ino kode.’ 24Anka ishootta kide, ‘Nama piisa sira warqeeta a qapa a furo ka ishin de'o’ ikka ana daashen; anka apittoppopa tuqe ikka pahana innaayya okkatta koddite.”
25Muuse akkima Arooni samayta tupadesa diishe ikka xaadi qara anno ka nyaapaaysho tura jeere ete akkeeyye, 26xarra safaraseti oppa'e qa'ade ka kide, “Nama a Yaahiwwe kodde a ana kapopa de'o.” Lewaata piisa ka isha kapopa ante. 27Ikka ishootta kide, “Yaahiwwe Waaqa Isira'eeli i'ishina kiini, ‘Ishina piisantiiyyi surraappa koraatetaayshin hidada ka safara karaayye nama ishin mina kale innaassin ka xelittaayshin isho kantittaayshin piisa leysha ka safara piisa ollin kaya.’” 28Lewaatase ka akka Muuse ishootta ajaje qara koote; kuyyaasetiiyyi samaytoppa nama kuma sessa mina co ka pirame. 29Muuse ka ishootta kide, “Ishina piisaniiyyi qoota hellaassin a diira a xaaytene ka a ollin dalattene qara xaaten malla; awwe koda Yaahiwwe'e i'issi reexxiten; semmalla awwe Waaqa i'ishina sake.”
30Parraytaadiiyyi Muuse ka samayta kide, “juppoota kutta'e kooten; ma ana Yaahiwwe kapopa fayyado; takka punu diissatan ishina teyaay.” 31Muuse ka Yaahiwwe kapopa tiitaawe ka ishi kide, “Oo, samayse juppoota kutta'e kode ka waaqadda warqeeta issi kodade. 32Semmalla amma juppootaaysho ishootta diishe, a taakiti maskapase xaayti a kara maxxada orraayti taafatte kara maxxiyyo alle haqe.” #mas 69:28; kele 3:5
33Yaahiwwe ka Muuse kide, “Nama ana ishin dape maxxaadin maskapiyyo kara haqa. 34Amma xa'e ka aane ka porase an ke lele opa samayse marra'e; tin erkampattootiyyo ke turan desa anta. Ma xoori kuyyaata an samayse qatta'a deenooyye, juppootaaysho minannen ishootta qatta'a.”
35Pahanasene a innayya okkatta a warqeeta a Arooni kode tura'e wa samayse kode minanne Yaahiwwe ka samayse qara'e erkannaata qeede.
Currently Selected:
Mataafa Sooketa 32: MaQu
Highlight
Copy
Compare
Share
Want to have your highlights saved across all your devices? Sign up or sign in
