Mataafa Sooketa 27
27
Akka pora kalisoota koonaan
sooka 38:1-7
1“Pora a kalisoota a moontandela dikla sessa kayno, derumtaadi ka dikla keni, paldumaadi ka dikla keni kayno, qindaddaadi afuri piisa ka olimina caan jeela kolalta oppa kode. 2Ka jeeloose a oppaayye pora kalisoota kooteppaayyew qeppeelliyyasene afuri a pora kalisoota qara'e kaassa kode; porase a kalisoota isho kaassaasene pora takka kode ka sipla pooran porose a kalisoota qara uwwishe. 3Ka mehaddaadi piisa tistewwa a karopa tara kattinaane ka paallawwa apitta ka kolobbawwa saahinna ka qaptowwa isho wa a kara dila qaptinnaane piisa sipla poora oppaayyeew kode. 4Ka porose a kalisoota kara'e, sipla a poora oppaaw kinkilsha a karan tara seehno kode ka kinkilsha qeppeelliyyosen afuri piisa quda'e sipla a poora oppaayye xoorrawwa afuri kode. 5Kinkilshose akka pora kalisootati'i surraappa de'o'e, kamaara kela xata qinda karatin xaaye. 6Ka porose a kalisootati'i, jeela kolalta oppa molookadda kode ka sipla a pooran quda uwwishe. 7Ka oto porose a kalisoota haanaaneeyye, akka paka pisan caadane'e molookaddasene qeede ka xoorrawwasene paka pakan ca karopa kalshe. 8Ka akkan irroota qara ke akkishe qara'e, porose a kalisoota shammoppaayye kode ka lulle afaan qaawwe diishe.
Pora a paapahose a tukkana Waaqa oppa ooro
sooka 38:9-20
9“Tukkanase xayyo'e paapaha kode; qinda tupattatinni xeela paapahoseti qara'e kaarantadda a xaynaata paxaara a qora talpa oppa shippen oppa dawen, a derumtaaysho dikla dippa kaynaan kode. 10Ka kaarantaddoseneti'i, tuudda kunda lakki a isi kela kiriyya sipla poora oppa kodame kunda lakki qapa kode; Tuudda tarkowwa isho rakkumaya xoorrawwaadi dakara pirreeta oppa kodeew. 11Ka asseew qinda qutattatinni tuudda kunda lakki a kela kiriyya kunda lakki a sipla poora oppa kodame qapa kodeew ka dedderuma a kaaranttaddaassoti a asseew dikla dippa kodden. Tuudda tarkowwa isho rakumaya xoorrawwaadi xoori a dakara pirreeta oppa kodamen. 12Qinda dumaatatinni, tuudda kudani a kela kiriyya kudani qapa kodeew; dedderuma a kaarantaddaassoti ka dikla kunda keni kodden. 13Qindase a piirtota a kullaysuma caanetinni, palduma a paapahoseti a dikla kunda keni koddeneew. 14Kullaysumaappaayye paka takkanne kaarantadda a derumaasso dikla kudanka keni kaynaane a dawamen ka tuudda sessa ka kiriyya sessa qapnaaden. 15Ka qinda pilaatin tuudda sessa a isi kela kiriyya sessa qapnaaden; dedderuma a kaarantadda ka asseew a dikla kudanka keni kayna kodden. 16Kullaysuma paapahati'i, kaaranta a derumtaadi dikla kunda lakki kayno a rufta moonta pahato ka a awla ka tiima ka xaynaata paxaara a qora talpa oppa shippamten dawamte, harmitta ka oppa sira puje a kinnaatto ka tuudda afuri a kiriyya afuri qara dishame qara xata raa'ito. 17Tuudda a paapahose kapandesa ca piisa ka rakkumaya xoorrawwaasso isho tarkowwaasso, a dakara pirreeta oppa kodamen, kiriyya a qara dishamene xoori a sipla poora oppa kodamen. 18Deruma a paapahoseti dikla dippa, paldumaadiiw dikla kunda keni, deruma a kaarantaadi moontandela dikla keni a koddito. Kaarantaddaadi a xaynaata paxaara a qora talpa oppa shippamten dawamen ka kelaayye kiriyya a sipla a poora qapnaaden. 19Mehadda a tukkanose kela koda ika lekaytan koonaane piisa ka shikaalla a tukkana isho a paapaha piisa a sipla poora oppaaw kodamen.
Akkima ipsa qara tooynaan
Lewi 24:1-4
20“Ipsa akka in libbinin ka opaya quda tawane'e, samayta Isira'eeli akka sayteeta ekerta a diipen ka miilshen a paxaaratin ke de'o'e ishootta ajaje. 21Arooni isho hellaadi a ipsaasene qeeden ka tukkanase xayyo kela kaarantase taapotase a maakkitta tura kittooyye laka tulan kaata kara xaayen ka akka shishshipe paayyatte haka parinitto a fuula Yaahiwwe tura opayane koden; sede ka samayta Isira'eeliti taanteta a parapara koddito ka xelte desa xeltopa tooytaama quda tawto.
Currently Selected:
Mataafa Sooketa 27: MaQu
Highlight
Copy
Compare
Share
Want to have your highlights saved across all your devices? Sign up or sign in
