Mataafa Sooketa 26
26
Tukkanase a Waaqa
sooka 36:8-38
1Tukkanose kaaranta kudani a xaynaata paxaara qora talpa oppa shippamte ka rufta moonta pahato ka a awla isho a tiima oppa dawamtenne koota. Harmitta ka pahana kirupeeli kaarantaddosen quda sira. 2Kaarantaddosen piisa a olimina caaden. Derumtaaysho a dikla kunda lakki sette koddo paldumtaaysho a dikla afuri koddo. 3Kaaranta keni oli quda heeddishe ka kaaranta keni a ata hase oli quda heeddisheew. 4Ka kaarantaddasene olquda heddisheneti kaamara qarandesa ohaata moonta pahatoppa jifeewwa rakkumaya qara heddishe ka a ata hase a pila qarae asseew heeddishe. 5Ka kamaara kaaranta takka minandesa jifeewwa rakkumaya kunda ken heeddishe ka a lammatta minandesa asseew jifeewwa rakkumaya kunda keni heeddishe ka jifeewwosen oliminopa kattishe. 6Ka tukkanose akka takka koddo'e, rakkumampaya xoorrawwa kunda keni warqeetoppa kode ka kaarantaddosen qaqqapsiisampayaan ollopa qaqqapsiise.
7Ka akka tukkanase qaraxata ishin dekane'e nyirfa tela oppa kaarantadda kudanka takka kode. 8Kaarantaddosen piisa a oli mina'ew caaden; deruma kaaranta takka dikla kunda sessa ka paldumtaadi a dikla afuri koddo. 9Kaarantadda keni pora takka olquda heeddishe ka kaarantadda lehi olquda heeddishe ka tukkanaseti fuula tura kaarantase a lehatta qeppishe ka qarandelaaw uwwishe. 10Ka tukkanaseti paka takkanne kamaara a kaarantaseti minandesa jifeewwa rakkumaya kunda ken kode ka qinda pilaatinni kamaara minandesa asseew jifeewwa rakkumaya kunda ken kodeew. 11Ka sipla a pooroppa rakkumaya xoorrawwa kunda keni kode ka akka kaarantadda a tukkanoseti takka kodane'e, ishootta lakki piisa sipla a pooran qaqqapsiise. 12Paka kaarantase tukkana qara haseeti qeede ka tulta tukkanoseti qara xata raa'ishe. 13Kaarantose a tukkanoseti qaraayye a xawwi hasno ka dikla takka takka a paka paka kayno, a qinda qindan rarra'en ka tukkanose uwwishen.
14Ka tukkanose qara deka'e kollaya laahadda a pahashene ka qalameeta tiimatin daatene kode ka asseew kollaya a tela a pahashen kode ka qaran dekeew.
15Ka tukkanose kela'e, tuudda kolalta kode. 16Tuuda takka derumtaadi a dikla kudani koddo; kappuma tiitaawwataadi a dikla ka paka koddo. 17Tuuddosen akka ollopa qapamane'e, a kara qotamen ka saantosetin tuuddosen a tukkanoseti piisa asseew kode. 18Ka tukkana karaayye qinda tupattatinni tuudda kunda lakki kode. 19Ka ishootta kela'e dakara pirreeta oppaayye kiriyya kunda afuri kode ka akka tuudda olkaropa kalane'e, ishootta piisa kela'e, loqqa lakki lakki kode. 20Ka tukkana karaayye qinda qutattatinni tuudda kunda lakki kodeew. 21Ka tuuda piisa kela'e loqqa lakki lakki kode ka dakara pirreeta oppaayye kiriyya kunda afuri kode. 22Ka tukkana karaayye qinda dumaatatin tuudda lehi qa'ew. 23Ka tukkanaseti qeppeelliyya lakki a tuultan caati'i, tuuda takka takka qa'ew. 24Tuuddosen a qeppeelliyya lakki, xati paayyatte haka illiti'i, a oli quda caaden ka jifeeta takka takkan mattexata qaqqapsiisamen ka qinda lakki piisan asseew kode. 25Semmalla tuudda sette a kinnaaden ka tuuddosen sette mina'ew kiriyya lakki lakki olloppa'e kiriyya kudanka lehi a dakara pirreeta oppa kodame ka caadenew.
26Ka tuuddasene tukkana kela paka takkan caati'i jeela kolalta oppa tarkowwa keni kode. 27Ka tuudda a paka takkan caati'i, tarkowwa keni kode ka tuudda xati kamman paka qinda dumaatatin qateeti'i, tarkowwa keni kodeew. 28Tarkoota otanta, a paka takkaayye desa a pila opa arta tuudda qarandesa deraatto. 29Tuuddadosen quda warqeetan uwwishe ka akka tarkowwasene qapane'e, tuuddosen quda xoorrawwa a warqeeta kodeew; ka tarkowwosen nefo warqeetan uwwisheew. 30Tukkanose akeekase an irroota qara ke akkishe qara daape.
31Rufta moonta pahato ka a awla ka a tiima isho xaynaata paxaara a qora talpa oppa shippamteppaaye kaaranta dawe; harmitta ka pahana a kirupeeli qara pujo. 32Ka tuuddasene kolaltoppa kodame afuri a warqeetan quda uwwishene ka qaqqapsiisampayaan qaqqapsiisene ka kiriyyasene afuri a dakara pirreeta oppa kodene kara dishene qara xata rarraa'ishe. 33Ka kaarantaddasene rakkumampayasene a xoorrawwa qara xata rake ka taapotase a maakkitta qeede ka kaaranta kamman tultoppan xaaye; kaarantose ka porase qulqullaawe isho kaatasene akata qulqullaawe olikela reexo. #Ip 6:19; 9:3-5 34Ka kaatasene akata qulqullaawe karaayye taapotase a maakkitta qara'e dufanasene a diissata xaaye. 35Ka tukkanase kelaayye kaatasene akata qulqullaaweti lakoppanne qinda qutatta oppa tarabbeesa xaaye ka qinda tupatta oppa wa a qara ipsa xaaynaane xaaye.
36Ka xarrase a tukkana tura'e, rufta a moonta pahato ka a awla ka a tiima isho xaynaata paxaara a qora talpa oppaayye kaaranta dawe ka oppa sira puje. 37Kaarantoseti tuudda a kolalta keni kode ka warqeetan quda uwwishe ka qaqqapsiisampaya a warqeetoppa kodame kaarantoseti kode ka kela kiriyya keni sipla a poora oppa kode.
Currently Selected:
Mataafa Sooketa 26: MaQu
Highlight
Copy
Compare
Share
Want to have your highlights saved across all your devices? Sign up or sign in
