Mataafa Sooketa 25
25
Daassawwa tukkana Waaqati' daasamma
sooka 35:4-9
1Yaahiwwe ka Muuse kide, 2“Akka daassatan ana de'ane'e, samayta Isira'eeliti lele ka nama wa karittaadi kara jaalada ka daassatan ana deeno piisa qaraayye daassawwa ana qeede. 3Daassawwa a ishootta qara qeetta nefo, warqeeta ka dakara pirreeta ka sipla poora 4ka ohawwa a moonta paha ka a awla ka a tiima ka ohaata paxaara a qora talpa oppa kodamte. Ka ohaata nyirfa tela oppa dawamte. 5Ka kollaya laahadda a pahashene ka qalameeta tiimatin daatene ka kollaya a pahasame ka jeella qora. 6ka sayteeta ekerta a ipsa opannaan ka qimaamewwa ka sayteeta a daatannaan isho a tankarta kara lahannaane 7ka furoota merekiti kidammitto ka furoota heraan kokkoka a oyleeta qeesewwa isho akalaaysho a kessoppa qara kalinnaan 8ka akkan otantaaysho oppa kallaado'e, akka tukkana qulqullaawe ana daapane'e ishootta lele. 9Ka tukkanase isho meeha a kara caado piisa akkan ke akkisho qara koda.
Taapotase a kodayteeta Waaqa
sooka 37:1-9
10Taapota a derumaadi dikla lakki ka paka ka paldumaadi dikla takka ka paka ka moontandela dikla takka ka paka koddite qoyra jeela oppaayye ana koden. 11Ka karanne isho laka tulanne warqeeta paxaaratin quda uwwishe ka kamaaraadi minandesa qeppa warqeeta ishi kode. 12Ka warqeetoppa jifeewwa afuri kode ka lakki paka takkan ka lakki paka pilaatin qindaddasene loqqa afurtin ca quda qaqqapsiise. 13Ka kolalttoppaayye molookadda kode ka warqeetan quda uwwishe. 14Ka akka taapotasetin haadane molookaddasene jifeewwasene qindadda taapota quda ca kara kakkalshe. 15Molookaddasene nefo a jifeewwosen ataapota kara tawen diisheey, karaayyen sooksammin. 16Ka seerase xayyo maakkitta kodde an ke daasho, taapotese kara' xaaye.
17Ka qara'e warqeeta paxaara oppaayye dufana a diissata a derumtaadi dikla lakki ka paka ka a paldumtaadi dikla takka ka paka kayno kode. #Ip 9:5 18Ka pahana erkampattoota a kirupeeli lakki warqeeta tumamteppaayye kode ka dufanasene a diissataatiiyyi paka pakan kutiishe. 19Ka pahana kirupeeleta takka qinda takkan kode ka a kirupeeleta pilaati qinda pilaatin kodeew ka pahana kirupeelese lakki isho dufanasene a diissata olloppa takka' kode. 20Pahana kirupeelewwasene lakki a fuulaaysho dufanase a diisata opadesa ollopa tiitayshen ka xoollaasso lakki opeela pappaldishen ka dufanasene a diisata qara deken. 21Ka dakaddasene qaqqaaha a maakkitta an ke daasho taapotase kara xaaye ka dufanasene a diisata taapotase qara' xaaye. 22Taapotase qaraayye dufanasene a diisata arta a kirupeelewwosene lakki kara co qara'en ke akka; ka ke' haasawada ka ajajase an hella Isira'eeliti qapo, ke' daasha.
Tarabbeesa a qara laaqqotase kalisoota kalinnaan xaaynaan
sooka 37:10-16
23Tarabbeesa a derumaadi dikla lakki ka paldumaadi dikla takka ka moontandela derumaadi dikla takka ka paka kayno jeela kolalta oppa kode. 24Ka warqeeta paxaaratin quda uwwishe ka siibaadi minandesa kamaara warqeeta ishi kode. 25Ka kamaara a paldumtaadi laabbota takka kaynitto kode ka kuuta kamaaraseti kapan desa warqeeta ishi kode. #Lewi 24:5-8 26Ka tarabbeesoseti'i warqeetoppa xoorrawwa afuri kode ka loqqasene a tarabbeesa afuri quda'e, qeppeelliyya afuri quda qaqqapsiise. 27Akka molooka karandesa kullishan ka tarabbeesosetin haadane'e, xoorrawwosen kamaara kelopeela heheqqishe; 28ka akka tarabbeesose ishin haadane'e, jeela kolalta oppaayye molookadda kode ka warqeetan quda uwwishe; 29ka akka ishin kalisoota ikkayta dehayshane'e, warqeeta paxaara oppaayye saahinna ka jilfada ka moqorqoradda isho kolobbawwa saahinna kode. 30Ka awta piisa laaqqotase qulqullaawte tarabbeesose qara fuuliyyo tura xaaye.
Wa qara ipsa xaaynaane akka kodaman
sooka 37:17-24
31Warqeeta paxaara oppaayye meeha a qara ipsa xaaynaan kode ka kirittaadi isho quduppattaadi warqeeta a tumamteppa kode ka porase kara ipsa xaaynaan nefo, a pisa paqqe ka haashshaadi isho kultaadi ollin co pahanaaden ka pora takka'ew kodamen. 32Ka qudupattase quda'e, paka takkan taama sessa ka paka pilaatini taama sessa olloppa taama lehi kode. 33Taammoosen lehi a qudupatta ipsa quda ca matta mina'e, a pahana pisa tiwwa paho sessan quda siramen. Pisose matta mina'e, a pahana pisa lawseeta a in paqqinin ka dankatta qapo pahanaado. 34Qudupattaadi qara'e, tiwwa a pahana pisa lawseeta afuri a in paqqinin ka dankatta qapo paho kode. 35Ka qudupattose qudaayye himina a oppaayye taammosen lehi fujuqene kela'e, taama lakki lakki mina'e, pahana pisa a in paqqinini sessa kode. 36Qudupattaadi ka taammaadi isho pisaddosen in paqqinini pisa, warqeeta paxaara ka a tumamteppaayye a pora takka kodamen. 37Ka ipsa tappa kode ka pora a qara ipsa xaaynaan qara xa'aayye, ikka pora fuula tura co oppa la'ayen. 38Wa kara apitta libbinnaane ka saahinna a kela xaaynaane, a warqeeta paxaara oppa kodamitto. 39Wa a qara ipsa xaaynaane isho mehaddoosen piisa warqeeta paxaara a mekliteeta takka kaynitto oppaayye koota. #25:39 mekliteeta takka kiilota kunda sessa keni kayni. 40Pahanasene an irroota qara ke akkishe qara'e akka kooto'e qalpeeffado. #koda 7:44; Ip 8:5
Currently Selected:
Mataafa Sooketa 25: MaQu
Highlight
Copy
Compare
Share
Want to have your highlights saved across all your devices? Sign up or sign in
