Mataafa Sooketa 24
24
Kodayteetase a Waaqa samaytaadi olli kodade akka kokkonnayshe
1Sekammaayye Waaqa ka Muuse kide, “Ke isho Arooni ka Nataapi isho Appihu ka qimayasene a Isira'eeli kunda tappa, ana Yaahiwwe turopa xooya ka lake desa ana sakatada; 2Muuse atti patta ana Yaahiwwe kapopa dehaado; ma a taakane ana kapopa dehaatta ishootta faani in kitto; umma samayta nefo ke olli ana kapopa deena isha parpaaccisni in kitto.”
3Muuse ka samayta kapopa oore ka ajajadda isho tampewwa a Yaahiwwe piisa samayta lele. Samayta ka afaa takkanenne kide, “Wa Yaahiwwe ino kide piisa in koona.” 4Muuse ka ajajaddasene a Yaahiwwe piisa taafe ka parraytaadiiyyi paraappan xa'e ka irrootase kela'e pora kalisoota kode ka kaffaa Isira'eeli kudanka lakki kapa'e, dakada kudanka lakki diddishe. 5Ka hella diira a xayya qapa a Isira'eeli erke. Ishootta ka kalisoota kupannitto dehayshen ka xormada qaleneew ka Yaahiwwe kalisoota a takkumtati koden. 6Muuse ka diikase quda paka takka qeede ka saahinna kara pippiishe ka paka takka qeedeew ka porase a kalisoota qara fide. 7Ka kammaddesa mataafase a kodayteeta qeede ka samayta tura nappape. Samayta ka kide, “Wa Yaahiwwe haasawade piisa in koona ka ishi ajajamma.”
8Muuse ka diikase qeede ka samayta qara fide ka kide, “Qaalewwosen a haasawade qara'e, diika a kodayteetase a Yaahiwwe ishin olli kodade tin sede. #Maati 26:28; Maari 14:24; Luqa 22:20; Qoro 1ta 11:25; Ip 9:19-20; 10:29
9Sekammaayye Muuse isho Arooni ka Nataapi isho Appihu ka qimayasene a Isira'eeli kunda tappa ka irrootase qaropa fayyaden. 10Ka Waaqase a Isira'eeli akken; loqqaadi kelaayye daka takka senperi kidammo ka olimina afame ka moonta paho ka la'ayno ka ca. 11Umma isha saarra samayta Isira'eeli qaropa harkaadi in xa'inne; ma laaddi ishootta Waaqa akke ka fuulaadi tura dame ka ikke.
Akkima Muuse irroota Siina qara co
12Yaahiwwe ka Muuse kide, “Irroota qaropa ana kapopa xooye ka are asado; anti seera isho ajajaddaayyo an akka samayta kollissa malla dakadda qaqqaaha qara taafe'en ke daashaay. 13Muuse ka Iyyaasuse isha qaarqaarro isi quda ollin aanen, Muuse ka irroota Waaqa qaropa fayyade. 14Qimayaseneti kide, “Hakan ishin kapopa oorrinno'e, areppa ino asa; Arooni isho Huuri tin are ishin olli caaneey nama a deexa qapo a ishootta kapopa aano.”
15Sekammaayye Muuse ka irrootase qaropa fayyade; urratta ka irrootase qara uwwishe. 16Ulfeena Yaahiwwe ka irrootase a Siina qara lekkade, urrattase ka kuyyaata lehi kara'e irrootase qara uwwishe; kuyyaata tappattaatiiyyi Yaahiwwe ka urrattase kara xata Muuse hale. 17Ilda samayta Isira'eeli turaayye, ulfeena Yaahiwwe, a kuuta ka irrootase qara apitta a paata kupno paha ka akkaanni. 18Muuse ka irrootase qara opeela fayyade ka urrattase karopa kulle ka irrootase qara'e kuyyaata kunda afuri ka halkeetta kunda afuri pire. #ooreta 9:9
Currently Selected:
Mataafa Sooketa 24: MaQu
Highlight
Copy
Compare
Share
Want to have your highlights saved across all your devices? Sign up or sign in
