Mataafa Sooketa 19
19
Akkima Isira'eeleta irroota Siina kapa' safarte
1A Isira'eeleta piita Kipsi kara sookite kammaayye, leya sessattati ka kuyyaata paayyotatiiyyi, koommayta Siina oppa kayte. 2Ka ete Refidiimi xaate ka koommayta Siina kayteeyye, koommayse oppa'e irrootase a Siina mina desa safarte. 3Muuse ka Waaqa kapopa fayyade; Yaahiwwe ka irrootase qara xata Muuse hale ka ishi kide “Sanynyeetase a Yayiqoopi samaytase a Isira'eeliti lele ka kide, 4Anti Waaqase co ka kallaanno waan Kipseeta qara kode ka akkima kawwaarayta jiwjiwaadi xoollaadin haano mina'e ishin haade ka iskapan ishin kaye i'akkiten. 5Semmalla amma oto dukaatan ana ajajammittan ka kodayteetiyyo tooytannittaneeyye, kadi punu piita piisa xayya kodditeeyye, samayta piita piisa oppaayye ishina samayta xawwi reexxame ana kodditan. #ooreta 4:20; 7:6; 14:2; 26:18; Tiito 2:14 #Peti 1ta 2:9 6Ka ana qeesewwa a mankisteeta ka samayta qulqullaawe kodditan; semmalla hellaa Isira'eeliti qaalese lelta.” #kele 1:6; 5:10 7Muuse ka tiitaawe ka qimaya samayta ollopa hale ka qaalese a Yaahiwwe isha ajaje piisa ishootta lele. 8Samayta piisa ka takka kide, “Wa Yaahiwwe kide piisan koona.” Muuse ka wa samayta kide qeedeew ka Yaahiwwe lele.
9Yaahiwwe ka Muuse kide, “Oton anti ke olli haasawannooyye, samayta akka dakayo'e ka awta piisa ke amano'e, anti oraarta pooratinnin ke kapopa de'a.”
Sekkammaayye Muuse ka wa samayta kide Yaahiwwe lele. 10Yaahiwwe ka Muuse kide, “Samayta kapopa aane ka awwe ka parri kara'e, ishootta jaqqe ka akka mehaddaasso diipadane'e ishootta lele. 11Anti Yaahiwwe qootan kuyyaata a sessattati irroota Siina qara samayta tura akkaado malla, a kuyyaata sessattati dikkisaden. 12Ka irrootase kapandesa ishootta xeela kode ka kide, ‘Akka irroose opeela a fayyannini, taaki xeelase oppa a kaynini tooytada; oton nama irroose quda kayaayye dukaatanne alle ishshama. 13Umma opani harkan quda in kayan ma dakaanne dakkan taaki lawaanne pokkan; umma nama koddite taaki horeeta koddite opa in diishan ikka in caatto. Ma xoori oto kaasa nessa kuttan dawammo pattaayye samayta irroota qaropa fayyatta ettansha.” #Ip 12:18-20
14Muuse ka irrootase qara lekkade ka samayta kapopa tiitaawe ka ishootta jaqqe; ishootta ka mehaddaasso diipaden. 15Ka samayta kide, “Kuyyaata sessattati dikkisada ka iskatta qudopa in aanan.”
16Kuyyaata sessattati teykanteeyye, qaqawwa ka irrootase qara dakaanni; hankaada isho oraarta poora ka akkaanni; nessa kaasa ka kuttumtan dawammi; samayta safaroppa co piisa ka xarri. #kele 4:5 17Kammaddesa Muuse ka samayse safara kara qeede ka Yaahiwwe turopan sooke ka irrootase kela qa'ade. 18Qoota Yaahiwwe irrootase a Siina qara apittan lekkade malla, qayya ka irroota a Siina qara pire; qayyase ka akka qayya a kupaanaappa xaano mina'e, tullupaytini; irroota piisa ka a kuttati lellehte. #ooreta 4:11-12 19Nessa kaasase dawammoti ka koopaanneew anni, Muuse ka hasawade; Waaqa ka a haasawanno piisa mina'e nessan isha oorshe. 20Yaahiwwe ka kuuta irroota Siina qaropa lekkade ka kuuta a irrootaseti qaropa Muuse hale ikka fayyade. 21Yaahiwwe ka Muuse kide, “Samayta akka ana Yaahiwwe akko'e, xeeloose in tarpinin, lekaya ka ishoottopa in pirammini'i, lekkado ka turadesaaw ishootta lele. 22Qeesewwa ana Yaahiwwe turopa dehanna nefoow anti Yaahiwwe akkan ishootta an qattaanini'i a isi jaqqen.”
23Muuse ka Waaqa kide, “Qoota atti mattaayti ana kokkonnasse ka kiite, ‘Irrootose kapandesa xeela kode ka qulqullayshe malla,’ samayta irrootose a Siina qaropa fayyatta in ettansho.”
24Yaahiwwe ka ishi kide, “Lekkado ka Arooni isquda qeede ka ollin xooya; ma xoori akkan ishootta an qattaanini'i akka qeesewwa isho samayta xeeloose tuullo ka ana Yaahiwwe kapopa de'o in kodan.” 25Semmalla Muuse ka samayta kapopa lekkade ka ishootta lele.
Currently Selected:
Mataafa Sooketa 19: MaQu
Highlight
Copy
Compare
Share
Want to have your highlights saved across all your devices? Sign up or sign in
