Mataafa Sooketa 2
2
Akkima Muuse dalade ka qohame
1Sitiiyyi kafa Lewi oppaayye nama takka ka aane ka Lewitteeta heme. 2Isheetta ka hitte ka inna diirta' xaayte ka akka xarjaalliyya inna' kodden akkite ka leya sessa dekte. #koda 7:20; Ip 11:23 3Ka ete leya sessa qaropa deka malaalteeyye, satara hammayla' qeette ka wa jaqqallaatin kara litte ka innasene kara' mukkisse ka kirra Appaayi kapa'e, xaasha kara' xaayte. 4Alawta innaseneti ka lake desa qa'atte ka wa isha qara' kaya' tooyni.
5Enenta Feri'ooni ka pisha jaqatta kirroppopa lekkatte; orxayaadi a tuparra ka kirrase kapandesa anni. Isheetta ka xaasha kara satarasene akkite ka akka ishin ishi' deeto'e, orxayteetaadi erkite. 6Ka ete satarasene tura panteeyye, innasene akkite; innaseene ka pooyni, ikka suraysatte ka kiite, “Ha hellaasene a Iproota oppaayye takka.”
7Alawta innaseneti ka enentase a Feri'ooni' kiite, “Hela in aana ka iskatta Iproota oppaayye iskatteeta innoosen ke' luukisso ke' hala?”
8Enenta Feri'ooni ka alawtase a innaseneti' kiite, “Aane hale.” Alawta innaseneti ka ante ka aayya opa innaseneti' haleete. 9Enenta Feri'ooni ka iskatteetaseti' kiite, “Innoosen qeede ka ana' luukshe, xaayyaattin ke' daashaay.” Iskatteetase ka innasene' qeette ka luukissa paayyite. 10Innasene ka kuttaden; Aayyaasso ka qeette ka Enenta Feri'ooni kapopan deete; ikka inna Enentase a Feri'ooni kodde. Isheetta ka kiite, “Pishaappan isha qeede” ka “Muuse” kiite ka maxxa ishi' koote. #koda 7:21 #2:10 “muuse” kideeta afa ipurutinni, “sookissa” kideeta
Akkima Muuse piita Midiyaami opa paqe
11Muuse ete kuttadeeyye, kuyyaata takkaayye orraaysho oppopa aane ka akkima orra Kipsi irreetan koda kokkoka ishootta kodacciisno akke ka a Kipsitta takka orraaysho oppaayye nama takka qiino akke. #Ip 11:24 12ka iskapandesa tooye, nama ka isha kapa in kinnin; ikka Kipsittase ishshe ka tahaayta kara' juute. 13Kuyyaata lammattati ete aaneew, Iproota lakki oli peeqni ikka akkeew. Ka a ishin dape' kide, “Maana'e innaassin qiini?” 14Namase ka ishi oorshe ka kide, “Ata ayno ino qara' mukissampayta ka taanynya ke kode? Hela akkima Kipsittase ikasse mina'e ana ikassaawwe?” Muuse ka tammaqe ka dikade ka kide, “Into waasene an kode i'upnaysamene?” #koda 7:23-28 15Feri'ooni ete sede dakayeeyye, Muuse ikassa fade; Muuse ka oori Feri'ooni tura alle' qahe ka piita Midiyaami opa alle' paqe. #koda 7:29; Ip 11:27
Ka eeyye kala ka takkaayye ela pisha kapa' qaa'e. 16Qeesitta takka a Midiyaami tuparra tappa qapa; tuparrasene ka xelloota a kahirra ka a telalla a aappaayshoti pisha ikissa elase opa de'en. Ka pisha oraapen ka mirkoppa immaken. 17Sikmaya takkan ka de'en ka tuparrasene alle' daanni. Muuse ka xa'e ka tuparrasene qara sikmayasene' dawre; ka kaharraasso isho telallaassoti pisha ikshe. 18Ete aappaaysho Raaku'eeli kapopa tiitaaweneeyye, isha i'ishootta' kide, “Awwe atta irra qara kalten?”
19Ishootta ka ishi' kidene, “Kipsitta takka sikmaya kela inon pahe ka pisha ino' oraape ka xellootinno kuli ino' ikshe.” 20Aappaaysho ka ishootta' kide, “Ka kuli namoose ayshaayye ca? Maana'e alle isha diissen? Hala ikka ino olli damta damo.”
21Muuse ka Raaku'eeli olli kallaatta owsade. Isha ka Enentaadi Sibbaara Muuse' hemitta' daashe. 22Sibbaara ka ishi inna diirta' xaayte. Muuse ka kide, “Anti piita hapta oppa an kalayta” Ka innaseneti maxxa kode ka kide, “Kerishoomi.” #2:22 “kerishoomi” kideeta afa iprutinni, “kalayta” kideeta.
23Parra lekaya kamma, nuqusa Kipsi ka to'e, Isira'eeleta ka karpishshumase ishootta qara' kaye minan quujanni. Ka qaarqaarsa akkatta' ullupni. Ullupittaaysho a karpishshuma malla ullupnaan ka Waaqa kapa' dakaade. 24Waaqa ka quujattaaysho' dakaye ka kodayteetase' xaadi a Aprihaami ka Hisaaqi isho Yayqoopi olli kodade, matte oorsade. #uuma 15:13-14 25Waaqa ka samayta Isira'eeli akke ka qootaayshoti desa dikade.
Currently Selected:
Mataafa Sooketa 2: MaQu
Highlight
Copy
Compare
Share
Want to have your highlights saved across all your devices? Sign up or sign in
