Mataafa Sooketa 15
15
Masmuureta Muuse
1Sekkammaayye Muuse isho Isira'eeleta ka Yaahiwwe masmuurese dawaden ka kidene,
“Putaymaadi a kutta a ulfeena malla
anti Yaahiwwe'en dawanni;
farta isho a qara kulufno, pakateeta karopa kateey. #kele 15:3
2Yaahiwwe kokkonnumaayyo ka
masmuuretiyyo kodde;
ka anan paheey,
ini Waaqiyyo
anka isha kalataysada; isha Waaqa aappadaanno'ey ishan kukuttisha. #mas 118:14; Issa 12:2
3Yaahiwwe xorma oranna;
maxxaadi nefo Yaahiwwe.
4Ha xela feri'ooni isho sarakeelladdaadi pakateeta karopa tuqe;
saarrasene a piita Kipsi kukutta ka Pakateeta tiima karopa tawen.
5Pakateetase karan xata seka ka ishootta qara pirte
ikka a daka mina xati kelopa jimmen.
6Oo Yaahiwwe, harkaayti a akkita ka a kuttati kokkonnaade
oo Yaahiwwe, harkaayti a akkitta ka nyaapa yooqe.
7Kuttumaatti a koopetinni, a ke qara xa'e pirte;
atti miirase xaayti opayno xa'isse; ikka a irma mina ishootta kupe.
8Nessaayti a miira a soonaattippa sooknonne pisha ollopa tuulamen,
pishadda ka akka kawwatta mina qa'aden. Pisha pakteeta a karanxata sekati ka olqapaden ka apteenta kodden.
9Nyaapa ka kide, “Ishootta kamman daana ka ishootta qapa
ka poojetaaysho qootada ka teyantaaysho piisa paka;
ka koraatetiyyo yukada;
ka harkiyyon ishootta pira.
10Atti xoori nessaayti a oorsatte takka tupaayye,
pakateeta ka ishootta qara pirte;
ikka pisha kutta kelopa akka sipla mina jimmen.
11Oo Yaahiwwe,
Waaqaddaappaayye, a ke paho ayno ca?
A qulqullumaan kuttade; ka kodaddaadi a orra qawwannaatin fuurammo;
ka daxxowwa koono; a ke paho ayno ca?
12Harkaayti a akkitta'e derasse; piita ka ishootta loqte.
13Samaytase xaayti a furatte; jaalalasene xaayti pirama in qapninitinni, tura qattini;
ka piitaayti a qulqullaawtepa, hupnaaytin ishoottan anni.
14Mankstewwa ka sede dakayan ka fuuraan xaran.
Samayta Filisteemi ka yetattan qapama.
15Saarra Etoomi ka ririkkaawan;
a Mo'aapi ka xaran;
Samayta Kene'aani ka puulaawa.
16Oo Yaahiwwe, haka samaytaayti tarpino'e,
haka isasene a furatte tarpinaan kara'e
tammaqta ka riirikkaawa ka ishootta qara kaya,
Hupnase xaayti kutta minanne, a dakadda mina'e eeyye jaw kidan.
17Oo Yaahiwwe,
porase xaayti a kallaata a kodatte,
oo poqlo, porase xaayti qulqullaawe a harkaattin koote,
qaropa ishootta kalissa
ka irroota lehnaatti qara ishootta dishta.
18Yaahiwwe ka haka paraparati nuqusuma.”
Masmuureta Maariyaami
19Ete fartada a Feri'ooni ka sarakeelladdaadi isho a fartaddaadin kulufna pakateeta karopa kulleneeyye, Yaahiwwe pishasene a pakateeta'e ishootta qaropa oorshe; Isira'eeleta xoori pakateese karanne piita a kokiteppan tuullite.
20Sekkammaayye alawta Arooni xuumampayteetase Maariyaami ka timpa qedatte; iskatta piisa ka timpada qapade ka kirpan isheetta kamma sooke. 21Maariyaami ka ishootta masmuureta qeette ka dawte ka kiite,
“Yaahiwwe, putayma ulfeena'e puteey,
ka farta isho a qara kulufno pakateeta karopa kateey,
ishi dawada.”
Pishasene a maara haddaawna
22Sekkammaayye Muusi ka samaytase a Isira'eeli pakateetase tiima kapa qeede ka koommayta Suuri oppanxata ishoottan aane ikka haka kuyyaata sessaati koommayse oppa aanen; umma pisha nefo in teyne. 23Ete pora “Maara” kidammo kayeneeyye, pisha Maara qoota haddaawnaan malla ikka imalaalen. Porose ka sede minan “Maara” kidame. #15:23 maara kideeta, “haddawtoota” kideeta. 24Samayta ka Muuse qara qoojqooje ka kide, “Ata kuli maanan ikna?” 25Muuse ka Yaahiwwepa ullupe; Yaahiwwe ka qoyra takka ishi akkishe, ikka qoyrase qeede ka pishasene oppa kate; pishasene ka me'aawen.
Yaahiwwe ka eeyye'e tampeeta isho taanteta ishootta kode ka porose oppa ishootta ekkaysade. 26Ka kide, “Oton qanqannisso nessiyyo a Yaahiwwe a Waaqaayshina dakaynittaneeyye ka wa ana turaayye paxaara koonittaneeyye ka ajajaayyo ka taantetiyyo piisa tooytannittaneeyye, paaqaddasene an Kipseeta qara qeede takkan nefo an ishin qara an qeedo. Anti Yaahiwwe an dinshampaytaashinaay.”
27Sekammaayye Isira'eeleta ka Eliimipa ante; eeyye karaayye ellada a pisha kudanka lakki ka qora Sampaapa/kunjula/ kunda tappa ca. Ishootta ka eeyye pisha kapa safaren.
Currently Selected:
Mataafa Sooketa 15: MaQu
Highlight
Copy
Compare
Share
Want to have your highlights saved across all your devices? Sign up or sign in
