Mataafa Sooketa 14
14
Akkima Isira'eeleta pakateeta a tiima tuullite
1Sekkammaayye Yaahiwwe ka Muuse kide, 2“Isira'eeleta akka alle tiitaawto ka otanta Mikitooli isho a pakateeta tiima karaayye Pihahirooti mina desa Pa'alsefooni kapa safarto'e ishootta lele; ikka eeyye kara safaren. 3Feri'ooni idikanni ka kiini, ‘Isira'eeleta esse koommaytoppa'e tura ollin patta ikka pora rarrataawta.’ 4Anti ka karitta Feri'ooni kokkonnaysha; isha ka ishin kamma awla; anka putama a Feri'ooni isho xelaadi putamonne, issi'i ulfeena akkada. Kipseeta ka akkiman anti Yaahiwwe kodde upnaatta. Isira'eeleta ka akkima ishootta lelamte qara koote.”
5Ete akkima Isira'eeleta tawte Feri'ooni leleneeyye, isha isho saarraadi, dikatta a Isira'eeleta qapan ka pursame; ikka kidene, “Isira'eeleta kamma xatan diinne ka orxumaaysho dapneey, ata koda maana'en koone?” 6Feri'ooni ka sarkellaadi qobbeessade ka xelaadi a oranna qapade. 7Ka sarkella kokokkoka dippa lehi ka sarkella a ata hase a piita Kipsi isho ajajampayaasso a oranna ollin qeede. 8Yaahiwwe ka karitta Feri'ooni kokkonnayshe ikka Isira'eeletase maxanyumaan Kipsi kara sooknitto kamma awle. 9Feri'ooni ka fartadaadi isho sarkelladdaadi ka a fartan kulufna isho xelaadi a oranna qapade ka Isira'eeleta kamma awle ka isheetta pakateeta a tiima minaadesa piita Pihahirooti kapa Pa'alisefooni minaadesa safarte qara kaye.
10Ete Feri'ooni ishootta kapa dehaannooyye, Isira'eeleta ka tooyyatta ka Kipseeta a ishootta kamma awlinitto akkite ka a kuttati tammaqte ka Yaahiwwepa ullupte. 11Ka Muuse kiite, “Hela pora hawla'e piita Kipsi kara dapade? Akka koommaytoppa ino pira inon deete? Kipsi kara ino sookissaanne wa ino qara koote tooye! 12An Kipsi kara kinnooyyeew an sede ke a lelli an kinno ka an kiini an kinno, ‘Ino diishe anka Kipseeta piddammo’ An koommaytoppa pirammo kapaayye, kadan Kipseeta kela'ew orxumme wayyi.”
13Muuse ka samaytaseti kide, “In fuuran kokkonnaada! ka Yaahiwwe akkima awwe ishinan pahado tooya! Kipseese a awwe akkinittan lammatta a akkitaneey. 14Yaahiwwe ishina torpaay, xaayshin jaw kida patta ishin qara fadammi.”
15Kammadesa Yaahiwwe ka Muuse kide, “Maana'e anopa ullupni? Akka itturandesa anto'e Isira'eeleta lele. 16Akka samayta Isira'eeli pakateeta karan piita kokte oppan tarpo'e, atti uleetaayti xaashe ka pakateeta qaropa qapado; lakki'i qootamtaay. 17Anti karitta Kipseeta'en kokkonnaysha ikka samayta Isira'eeli kamma xata pisha karopa muran; anka putayma Feri'ooni isho a xelaadi a oranna ka sarakellaadi isho a fartadan kulufina qara akkadaatin ulfeessama. 18Oton Feri'ooni isho xelaadi a oranna piisa putooyye, Kipseeta ka akkiman anti Yaahiwwe kodde upnaatta.”
19Erkampattootase a Waaqa xela Isira'eeleta tura annitto ka tiitaawte ka ishootta kammopa oorte; tuudase a oraarta ishootta tura anno ka tiitaaweew ka ishootta kamma qatte. 20Ka otanta Isira'eeli isho a Kipsi kara qatte ka Kipseeta tura tukkanshe ka Isira'eeleta la'ayta daashe; halkeesse kumma xeloose a Isira'eeli isho a Kipsi ka olli in kayyinin.
21Muuse ka harkaadi pakateeta qaropa derayshe; Yaahiwwe ka halkeesse piisa xayxayta a qinda piirtota a kokkokan pishasene iskammopa oorshe; pishasene ka lakki qiten, pakateetase ka piita kokte koddite. 22Pishasene ka qinda qindopa a kawwatta mina qa'aden; samayta Isira'eeleta ka pakateetase karan piita kokte oppan tarpe. #Qoro 1ta 10:1-2; Ip 11:29 23Kipseeta ka ishootta kamma daante ka fartada a Feri'ooni ka sarakelladdaadi isho xela ishin kulufno piisa ka pakateetase karopa xata ishootta kamma kullen. 24Ete parinittooyye, Yaahiwwe ka tuudase a apitta isho a oraarta kara xata xelase a Kipseeta tooyyade ka ishootta ririkkayshe. 25Ka akka xoorrawwa a sarkellaassoti qaqqapamane kode ikka qula malaalen; Kipseeta ka olli kiite, “Yaahiwwe Isira'eeleta qara qanni ka ino torpiniiy, alle Isira'eeleta tura qahana!”
26Yaahiwwe ka Muuse kideewwe, “Akka pishosen ooran ka Kipseeta ka sarakelladdaasso ka a fartadaan kulufna qara pirane'e, pakateeta qaropa harkaayti derayshe.” 27Muuse ka pakateetase qaropa harkaadi derayshe; ete para qinnooyye, pakateese ka poraadi a xatta opa tiitaawte. Kipseeta ka pishasene tura alle qahani. Yaahiwwe ka Kipseeta pakateetase kara dakke. 28Pishasene ka ooren ka isasene Isira'eeleta kamma daanna sarakelladdaasso ka a fartadaan kulufina isho xelase a Kipsi piisa qara piren; umma nama takka nefo kela in pahane. 29Isira'eeleta xoori pishaasene qinda qindopa a kawwatta mina qa'ade karanne piita kokte oppan pakateetase karan tarpite.
30Awsetiiyyi Yaahiwwe ka harka Kipseeta kelaayye Isira'eeletan pahe. Isira'eeleta ka pukka Kipseeta a kamkama pakateeta qarandesa seehe akkite. 31Isira'eeleta ete hupnase kutta a Yaahiwwe Kipseeta qara akkishe akkite, Yaahiwwe fuurte ka Yaahiwwe isho orxaytase xaadi Muuse amante.
Currently Selected:
Mataafa Sooketa 14: MaQu
Highlight
Copy
Compare
Share
Want to have your highlights saved across all your devices? Sign up or sign in
