Mataafa Sooketa 13
13
Akkima qaramma piisa Waaqa' xawwi reexamen
1Yaahiwwe ka Muuse kide, 2“Inna a diirta a kuuta dalade piisa xawwi ana reexe, wa diirta kodde ka paayyota namoppa delade ka a xorma kodde ka paayyota horeettoppa delade piisa xayyowweey.” #dikoota 3:13; Luqa 2:23
Xaysonessuma a laaqqota
3Muuse ka samayta kide, “Kuyyaase a oppaayye piita Kipsi kara karpishshuma kela sookten matte oorsada; Yaahiwwe hupnaadi a kokkokanne piita Kipsi kara ishin sooksheey; laaqqota a oppa haddaya qapto in daman. 4Ishina awwe leyoose a paayyota Apiipi kidammo oppaayye piita Kipsi kara sookten. 5Akka ishina daasho'e, piisse a Yaahiwwe turan aappadaassina a xattati xaxade ka kippeeta daashe qara'e, oto piitase a oppa takma isho aanna puren a Kene'aaneta ka a Hittaata ka a Amoorata ka a Hiwwata ka a Yapuusata oppopa ishin kalshooyye, leyoose oppaayye xaysonessumoosen ulfeessitan. 6Kuyyaata tappa kara'e laaqqota kara haddaya in qapnini damtan ka kuyyaata tappattatiiyyiiw Yaahiwwe ulfeessa'e xaysonessuma kodattan. 7Kuyyaata tappa kara'e laaqqota a kara haddayan qapnin damtan; umma laaqqota kara haddaya qapto ishin kapa in kinnaannin; umma haddaya takkan nefo piitaayshin piisa kara in kinnaannin. 8Kuyyaatosetiiyyi akka hellaassina leltan ka kiitane, ‘waan malla asse kooninna, wa Yaahiwwe kuyyaata Kipsi kara ino sooksheeyye, ino kode malla.’ 9Qoota Yaahiwwe hupnaadi a kokkokan piita Kipsi kara ishin sookshe malla, akka seerose a Yaahiwwe afaassin oppa in dapannini'i, xaysonessumosen milikkita a harka ka a loqqa isho a fuuloppa hiddame mina ishina koddan. 10Semmalla xaysonessumoosen para piisa mina'e xooraadi a qapame oppa ulfeessa.”
Qoota hellaa a qaramma koddeeti desa
11Yaahiwwe akkima ishin isho aappadaassina a xattati xaxade ka kippeeta daashe qara'e, oton piita Kene'aani oppopa ishinan kalo ka piitose ishina daashooyye, 12Namoppaayye inna diirta a paayyota dalanna ka horeetoppaayye wa xorma kodde a paayyota delanna piisa, Yaahiwwe'e xawwi reexxitan. #sooka 34:19; Luqa 2:23 13Innayya harreeta a xorma kodde ka paayyota delade, koori harka Waaqa oppaayye laahanne furattan; Oton a furanni a kinniniiyi innayyosen a harreeta qara xolma quua; hellaassina a dirra a paayyota dalada piisa furada. 14Eta itturopa deena oppaayye, hellaassin ishin kaassannaan ka kiinaane, ‘Sede maana kapa'e asse ulfeessiniiyyi?’ i'ishootta kiitane, ‘Yaahiwwe hupnaadi a kokkokan piita Kipsi kara karpishshuma kela ino sookshe. 15Ete Feri'ooni karittaadi kokkonnayshe ka ino diissata tiiteeyye, Yaahiwwe piita Kipsi karaayye namoppaayye diirta a paayyota dalade ka horeetoppaayye wa xorma kodde ka paayyota delade piisa pire. Semmallan horeetoppaayye wa xorma kodde ka paayyota delade piisa Waaqa'e kalisoota kalinninna ka namoppaayye diirta paayyota delade harkaadippa furanninna.’ 16Qoota Yaahiwwe hupnaadi a kokkokan Kipsi kara ino sookshe malla, taantese akka milikkita a harka taaki a fuuloppa hiddame mina'e ishina kodda.
Tuuda oraarta isho a apitta
17Ete Feri'ooni samaytase a Isira'eeli diisheeyye, kadi punu qattaamura koddeeyye, Waaqa pora piita Filisteemi oppan tarpino oppan ishoottanne in anne; wa malla asse kode, nefo oto oranna poroppa ishootta qara kaynaaneeyye, akka dikattaaysho'en purinnin ka piita Kipsi opa in oorrin malla. 18Ma xoori Waaqa porase a koommayta pakateeta tiimatin xata annoppa'e ishoottan oore. Isira'eeleta ka oranna harmisatte ka piita Kipsi kara sookte.
19Qoota turan xatta Yoosefi Isira'eeleta kokkonnayshe ka xaxacciise ka kide, “Waaqa i'ishin tooyyadaay, oto are kara sooknittaneeyye, lafaayyo kuli qeeda” malla Muuse ka lafa Yoosefi ittura qeede. #uuma 50:25; Iyya 24:32
20Ishootta ka katama Suukooti xa'en ka xeela koommayta minaayye piita Eetaami oppa safaren. 21Akka kuyyaateeyye ka halkeetteeyye antaaw aanane'e, Yaahiwwe ka saanta ishootta akkissa'e kuyyaateeyye tuuda oraartatin ishootta tura aane ka halkeetteeyye ishootta la'assa'e tuuda apittaatin ishootta tura aane. 22Umma kuyyaata a oppaayye tuuda oraarta samayta tura dapade taaki halkeetta a oppaayye tuuda apitta samayta tura dapade in caanne.
Currently Selected:
Mataafa Sooketa 13: MaQu
Highlight
Copy
Compare
Share
Want to have your highlights saved across all your devices? Sign up or sign in
