Mataafa Sooketa 1
1
A Isira'eeleta kipsi kara kittooyye miiddota ishootta qara' kayte
1Maxxada hellaa Isira'eeli a toollaasso ollin Yayqoopi olliiyyi piita Kipsi opa paqe sene. 2Roopeeli ka Simooni ka Lewi ka Yihuta 3Yisaakoori ka Saapilooni ka Piiniyaami 4Taani ka Niftaalemi ka Kaati isho Aseeri. #uuma 46:8-27 5Sanynyeeta Yayqoopi olopa dikootaaysho kunda tappa; ma xoori Yoosefi' turanneew piita kipsiti ca. 6Yoosefi isho hellaasso ka le'en; xeltose ka piramte. 7Ma xoori sanynyeeta Isira'eeli olli dalte ka horte ka a kuttati kokkonnaatte ka piita Kipsi piisa immakte.
8Kipsi kara'e nuqusa haaraya a qoota Yoosefi desa in upnin ka xa'e; #koda 7:18 9ka samaytaadꞌ kide, “Tin Isira'eeleta a kuttati lekte ka dikootan ino qara jaalte; hupnaaysho ka ino fuurinniiyy; 10semmalla akka qara'ew in leknin ka oto orana ino qara' xa'ooyye nyaappinno quda in koddinin ka ino in torpinini'i ka ennoow piitoppa alle'en tawnini'i, xooya ka mala takka ishootta' dawna (faana)” #koda 7:19 11Ka oori koda hupnatin ishootta miidda'e saarra a ishootta kodacciisa ishootta qara' shuumen; Isira'eeleta ka katamadda Fitoomi isho Raamise kidamma a kara meeha kattinaane Feri'ooni' qupte. 12Ma xoori oto Kipseeta a kuttati Isira'eeleta miiddinittooyye, Isira'eeleta a kuttati sekapa lekiniiw ka piita qara koopaan anni. Kipseeta ka a kuttati ishootta fuurte. 13Ka karpuman Isira'eeleta kodacciisa paayyite. 14Ka dooqqeta diitaccisaanne ka tuupeta laaqacciissaanne ka koda dullaappa ika lekayta kodacciissaanne koda kokkokan ishootta payyahisse ka kodaaysho piisa oppaayye suraysatta mali karpuman ishootta kodacciisen.
15Nuqusa Kipsi ka xaaysattowwa Iproota a Siibaarra ka Fuuha kidammaati' kide, 16“Oto iskatta Iproota' xaaysannittaneeyye, oton inna diirta'e dalada alle ishsha; oton enentaayye a caatto.” 17Xaaysattowwasene xoori Waaqa fuuren ka waasene a nuqusa Kipsi ajaje koda diishen ka hellaasene a diira akka caadane' koden. 18Nuqusase a Kipsi ka xaaysattowwasene hale ka ishootta' kide, “Maana'e akka hellaasene a diira caadane' kooten?”
19Xaaysattowwasene ka kidene, “Ha iskatta Iproota iskatta Kipseeta minan, ishootta' qoota kokokkoki malla a xaaysattowwa ishootta kapa in kaynin turanne xaayni.” 20Semminan Waaqa ka xaaysattowwaseneti wa paxaara' kode. Samaytase ka lekaatta ka kokkonnaattaan aane. 21Qoota xaaysattowwasene Waaqa fuuren malla, Waaqa ka ishootta' toolla daashe. 22Nuqusa Kipsi ka samaytaadi piisa ajaje ka kide, “Hella diira a Iproota a dalanna piisa kirra Appaayi karopa kata. Hellaa iskatta' xoori a caaden.” #koda 7:19
Currently Selected:
Mataafa Sooketa 1: MaQu
Highlight
Copy
Compare
Share
Want to have your highlights saved across all your devices? Sign up or sign in
