Kodampaya 27

Pawloosi akka katama Roomi opa aane

1Akkan piita Taaliya opa markapan anno ete piisamteeyye motoloqittase Yuuliyoosi kidammo ka kita a xelase a oranna a Awkistoosi kara co'e, Pawloosi isho orra hidame a xata hase sarakkapen. 2Anka markapase a Adiramitiiyyooni a kamkamadda pakateeta Issiya mina ca opa anno oppa fayyanne ka anne; Aristirokoosi Meqedoonittase Teseloonqe kalo ka ino olli ca. 3Ka parraytaadiiyyi Sidoona kayne. Yuuliyoosi qoota Pawloosi nama fayya kodde malla, akka moottadaadi kapopa aano ikka isha qaarqaarsa a parpaaccisno kodane'e ishi faqqate. 4Ka eyye xaaneew ka qoota puppeeta ino mina desa deenito malla, piitase pakateeta kara kitto a Qoppiroositi tultan oorre ka markapan antinno kammaaw caanne. 5Ka eten pakateetase Kiliqiya isho Binfiliya kapa kitto tuulline kammaayye, Mura katamasene piita Liiqiya kara ca kayne. 6Eyyeeyye motoloqittase ka markapa a Iskindiriya, a piita Taaliya opa anno akke ka oppa ino fayyishe. 7Anka kuyyawwa lekaya lokkooti anne. Ka rakkoota kuttatin katama Qeniidoosi kapa kayne. Qoota xayxayta akkan itturan desa an annini ino dawre malla, piitase pakateeta mina kitto a Salmoona kapan tarpine ka piitase pakateeta kara kitto a Qertesiti tultan oorre ka anne. 8Eten qinda quda oorre ka rakkoota kuttatin tarpine kammaayye, porase “Kamkama paxaara” Kidammo ka katama Laasiya kapa co kayne.

9Qootan anta quda etaa a kutta pirre etaa damta musatta ka tarpite malla, etoosenetiiyyi pakateeta qaran anta ka rakkoota a kutta qeetto malla, Pawloosi tura desaaw orroseti' lele ka kide, 10“Orraayti! antinno a arepa desa hase oppaayye, akka rakkoota a kutta kinnaatto ana akkaanni, markapa isho fe'isaadi patta qara'en ma caatta nama kuli qara'e miiddota a kutta isho pateetta kayta.” 11Motolaqasene xoori, dehaamta Pawloosi kapaayye wa aappa a markapa qullo isho wa aappa a markapa kiinaane'ew dakayni. 12Kamkammoosen soroora tarpissa'e qoota in ettaninni malla, orra lekayta assaapa dehayshe ka kide, “Ino antinno kammaaw caanno ka oton i'ino koddiniiyyi, kamkamasene a Qertesi Finqe kidamma ka xarrase a qutatta dumaata isho a tupatta dumaatatin ca kayna ka eyye soroora tarpisanna.”

Akkima pakateeta qara puppeeta xaate

13Ete xayxayta tupatta nukkulla xa'e, ikka akkeneeyye a wa dikadene ishootta koddene pahanaatte, ikka siplase markapan qa'atinnaane mayshen ka anta xa'en. Ka kamkamasene qara xa'en ka Qertesiiyyi qinda quda qapaden ka tarpen. 14Ma xoori, eta shakkaya kammaayye xayxayta kokkooka “Apuppeeta qutatta a qinda piirtota.” Kidammo piitase pakateeta kara kittooyye xa'e ka qinda pakateeta oppa ishootta qaropa de'e. 15Qoota markapase tuukammo ka xayxaytase tura qa'atta malaale malla, jawin kiine ka xayxaytasetin tuukamaan anne. 16Ka eten piita takka otanta pakateeta kara kitto Qeeda kidammitto kamman oorre ka anninnooyye, rakkoota a kuttatinnin koonkasene a markapa qapanne ka isi kelopa oorissa ettaninne. 17Orrase markapa qara co ete koonkasene markapa qaropa titen ka fayyishen kammaayye, markapase quda'e wataroota maren. Ka akka markapase pora takka a tahayta, Surtiisi kidammo opopa in pi'inini'i, fuuren ka sharaadi lekkishen. Ka xayxaytasetin tuukamen ka aanen. 18Qoota puppeetase ino qara koopaan ante malla, parraytaadiiyyi, mehaddasene markapa qara' fe'ame takka takka pakateetoppopa dakka paayyen. 19Ka kuyyaata sessattatiiyyi mehaddasene markapa qara kodaan koonaane harkaassotin alle dakken. 20Kuyyawwa lekaya kara'e, qootan piirtota isho hikka an akkaannin malla, xayxaytase ka ino qara koopaan aane malla, xasan murre ka kiine, “Arepa desa paha an ettaninno.”

21Orrase ka a damta in dammin mali kuyyawwa lekaya pire. Pawloosi ka otantaaysho oppeela qa'ade ka ishootta kide, “Ishina orraayti, kati waan ishina lele dakayten ka Qerteesi a xaanin kiiteeyye, miiddose isho pateetose piisa ishin qara kayni in heenne. 22Amma nefo markapase patta pata diisheey, ishin oppa nama takka nefo qara pateetta in kayto; semmalla japaada in fuuraan in kiini ka ishin dehaammi. 23Maana malla halkeesse tarpiteeyye, Waaqase an xaadi kodde ka isha Waaqaysanno, erkampattoose a erke, ana kapa'e qa'atte. 24Ka ana' lelte ka kiite, ‘Atti Pawloosi! in fuuran, Qeesaari nuqusase kutta a Roomi tura qa'atta ke parpaaccisni. Waaqa ke malla kida ka, tin sene ke olli anna piisan toota kela ishoottan paha.’ 25Semmalla ishina orraayti, japaada. Waaqa wessin a ana lele piisa akkima kodo in amanniiy.” 26A koddito ma xayxayse piita takka pakateeta kara kitto qudopa inon aana ka eyye ino tuqa.

27Halkeetta kudanka afrattatiiyyi, eten pakateeta a Diriya#27:27 “pakateeta adriiya” pakateeta mediteraaniya quda paka takka. qaraayye xayxaytan daddaysamminno ka anninnooyye, olli qootta halkeettatiiyyi, orra markapa oppa co, a piita kapa dehaadene ishootta pahanaatte. 28Semalla ete watarootase, sekuma pakateetatin karan xata ekkaysannaane kateneeyye, pakateese karanxata metireeta kunda afur mina kitto'e seki. Ete shakkayteeta jaren ka wataroose ishin ekkaysannaan kateneeyyew, karan xata metireeta kunda sessa mina kitto'e seki. 29Akka markapinno dakada pakateeta mina ca in toommini'i ifuuren ka markapeeyye tultanne, silpa “asene markapan qa'atinnaane afur pakateetoppopa lekkishen ka akka halkeesse tarpito kuyyaata ka ishootta deeto qinsatta paayyen. 30Orrase markapa kara koda koono, qoota markapoppa lekkatta ka alle qaheeta fade malla, a markapeeyye fuula turan silpallasene markapan qa'atinnaane'e pakateetoppopa lekkinna'e pahanaaden ka koonkasene markapa qara ca pakateetoppopa lekkishen. 31Sitiiyyi Pawloosi ka motolaqasene isho xelase a orannaati kide, “Orroose markapoppa anno oton markapa qara'e tawni in kinniniiyyi, ishina paha a ettanissan.” 32Xelase a oranna ka watarootase koonkaan hidden muren ka koonkasene pisha qara diishen.

33Ete para qinnooyye, akka pisanti damta damane'e Pawloosi ishootta naappade ka kide, “A unta a immannin mali a asatta quda kittan, awwe kuyyaata kudanka afratta; 34Semalla akka damta damtane'en ishin naappanni. Damtose nefo ishina kokkonnassa. Umma rakkoota takka nefo ishin qara'en kayto.” 35Ka ete asse kide kammaayye, laaqqoota qeede ka ishootta piisa tura Waaqa kalataysade ka moossade ka damta paayye. 36Sitiiyyi, ikka piisanti xasa oorsaden ka damta damen. 37Markapa karaayye ino piisanti olloppa'e, an nama dippa lakki kunda tappa lehi. 38Ete piisanti damen ka duttanen kammaayye, kappase fe'ame pakateeta karopa dakken ka markapa sholla'ayshen.

Akkima markapase qeqqepe

39Ete pariteeyye, pora a oppa kayen in upnaanne ma, pora oppa tahayta co pakateeta ka karandela kalte akken ka oton i'ishootta koddiniiyyi, markapase eyyepa tuukeeta ka qinda qudopa sookissa dikaden. 40Ka silpallasene markapan qa'atinnaane furen ka pakateeta karopa diishen ka sitiiyyiiw watarowwa a meehase pishaan pullinaane furen. Ka sharasene fuula tura qate xayxaytoppopeela heeqishen ka pakateeteeyye torkopa sookissa aanen. 41Ma xoori markapase qoota tahayta ollopa tuulame quda toommade malla, kumpaappe pi'e ka fuula turan kumpaappe jikkame, ka lellehni in kinnin; kammeela xoori qoota puppeeta isha tuuknitto malla qeqqepa paayye. 42Orrase hidame oppaayye takka nefo akka pisha in daannin ka in dekannini'i xelase a oranna ishootta lessaata dikade. 43Motolaqittase xoori, qoota Pawloosin paha fade malla, dikattaaysho in teyyanne ma, laadi orra a pisha daana saho akka tura qatto ka markapoppaayye pakateetoppopa shoshshoro ka piitoppopa sooko'e ajaje. 44A ata hase'ew, akka shamma isho qora markapa a qeqqepeetin sookane'e ajaje. Saantosetin piisa ka nakaytan piitoppa kayen.

Currently Selected:

Kodampaya 27: MaQu

Highlight

Copy