Kodampaya 19

Pawloosi wa a Efesooni kara kode

1A Appiloosi Qorontoosi kara cooyye, Pawloosi piitase ela qatto oppanne tarpe ka Efesooni kaye ka eyye kiristaana lamayyta akke. 2Ka ishootta kaassade ka kide, “Hela ete amanteneeyye Hapura Qulqulloota itteytene?” Ishootta ka ishi oorshen ka kidene, “An teyyane, umma akkima Hapura Qulqulloota co nefo an dakayne.”

3Pawloosi ka ishootta kide, “Ka asseeyye, jaqqatta a atta paho jaqqatten?” Ishootta ka ishi kidene, “Yohannisise pishaan ino jaqqe.”

4Pawloosi ka ishootta kide, “Ha pishaan jaqqettose a Yohaannisi juppootoppa ooreeta malla koddite. Isha wa samayta' haasawade nefo ikiini ‘A ana kamma desa de'o amana’ isha nefo Yesuusi. #Maati 3:11; Maari 1:4, 7-8; Luqa 3:16; Yoha 1:26-27 ”

5Ete sede dakayeneeyye, ikka maxxa Yesuusinni jaqqamen. 6Ete Pawloosi harkaadi ishootta qara qapadeeyye, Hapura Qulqulloota ka ishootta qara lekkade. Ikka afa pilaatin haasawaden ka xuuma haasawatta kuli paayyen. 7Ishootta nefo olloppa'e, nama kudanka lakki mina'e caan.

8Pawloosi ka tikase a qinseeta a orra Yihuta kelopa aane ka a leya sessa mina kitto kara'e, qoota mankisteeta Waaqati desa shiishshaanne ka samayta oli kela la'assane maxanyumaan kollinni. 9Ma xoori ete a demo kamtoollaya kodden ka samayta tura saanta Poqalla onnaan ka an amanno kideneeyye, ishootta kapa alle sekaade ka orra amanno xawwi qeede ka tika takka kutta a Tiranoosi kelaayye awta piisa ishootta kollinni. 10Pawloosi haka para lakki mina kitto kara'e kodoose kode. Sitiiyyi Yihutaata isho orra Yihutaata in koddinin a Issiya kara kalo piisa ka qaaleta Poqalla dakaya ettanshe.

Wa orra qawwanna a Waaqa Pawloosi qudan kode

11Waaqa wa a kuttati orra qawwanna'e Pawloosi qudan kooni. 12Se minan otoo ohaata isho japara a dakinta Pawloosi quda kaye qeedan ka, paaqolaya qudan kayaneeyye paaqolaya idinni. Hapurra nenneeqa kuli ka sookni.

13Yihutaata demo a pora annitto ka hapura nenneeqa orra kara sookinnitto ka kiini “Akka maxxase a Poqalla Yesuusi a Pawloosi torrinon sooktane'en ishin ajajininna!” Ka hapurra a nenneeqa orra kara sookissa ekkanni. 14Hellaa Asqeewwa a qeesittase kutta a Yihuta tappa ka asseew kooni;

15Ma xoori hapurase neeqa i'ishootta kide, “Yesuusi in upa ka Pawloosi nefo upaay, ata ishina a opa ayno?” 16Namase hapura neeqan qapame ka shore ka ishootta qara kokkonnaade ka ishootta pute. Ikka ka lulle tikase kara qahen.

17Qoota sede Yihutaata isho orra Yihutaata in koddinin a Efesooni kara kalo' dakaatte malla, pisani fuuren. Maxxa a Poqalla Yesuusi nefo ka akuttaati ulfeessame. 18Orra amanno oppaayye lekayta ka kodaaysho a neeqa laka' sookissa ka lelattaan deeni. 19Tipanpaya lekaya ka mataaffaasso a tipa ollopa oorshen ka samayta piisa tura' kupen. Hera mataaffoseneti, ete kammateneeyye, ikka dakara pirreeta#19:19 “dakara pirreeta” pirreeta sitiiyyi, kira akuyyaata takka. kuma kunda ken kayen. 20qaaleta Waaqa ka seden akata paldaatta ka hupnan anni.

Horayta akka Efesooni kara xa'e

21Ete sede piisa koddite kammaayye, Pawloosi piita Meqedooniya isho a Akayiyya oppan tarpeeta ka Yursaalamipa anta isi karan xata dikade ka kide, “Oton eyye kayo kammaayye, katama Roomi opa anta ana faani.” 22Ka semmalla orra isha qaarqaarro oppaayye nama lakki, Timotoosi isho Erastoosi Meqedooniyaapa erke ka isha mattaadi piita Issiya kara shakkayteeta' jare.

23Sitiiyyi qootose a saant Poqalla minanne, horayta kuttayta ka Efesooni kara' xa'e. 24Nama takka sipla pirreeta liilinno Dimetiroosi kidammo ka sipla pirreeta oppaayye pahana a tika qulqulloota a killoota a artemiisi tummi ka tookta kuttayteeta liilissampaya kalinni. 25Semmalla namase ka liilissampaya isho orra pila a kodaaysho paho koono ollopa oorshe ka ishootta kide, “Orraayti ! Akkiman kodoosetin teyanta akkanninno i'uptan. 26namoose Pawloosi kiinaan xoori, ikiini ‘Pahanadda a nama harkan kode, waaqaddaan.’ Ka a Efesooni patta in koddinin maliiyyi, akka piitadda lamaya mali, piitadda a Issiya pisa oppa, samayta kuttayta a atta co isi kelopa tiitaysade ka amansiise, ishina mattaayshin i'akkiten ka dakayten. 27Oton asseeyye kodinno oori ituffatama. Asede patta in koddinin mali, tikase a qulqulloota a waaqase kutta a artemiisi, isase a Iissiya isho piita pisa oppa orra isheeta Waaqaysanno patta'e hasta; kuttumaadi nefo ka patan.”

28Orrase ete sede dakayeeyye, imiiroode ka nessa kuttan kide, “Artemiisise a Efesooni kuttayteeta!” 29Katamasene piisa ka yaaqyaaqen. Samayta ka Kaayiyoosi isho Aristirokoosi isasene Meqedooniya kara dalade ka moottada Pawloosi kodde ka isha olli pora anna lakki qape ka tinni ka pora oppopa samayta ollopa sooke opa ishoottan hire. 30Pawloosi samaytoppopa anta fade ma xoori orra amanno akka in annini isha dawre! 31Ukkumampaya a piita Issiiya oppaayye, a moottadaadi kodde takka takka ka Pawloosi kamma nama erkeneew ka isha naappaden ka kidene, “Pora orra ollopa anno oppopa in aanan ka in akkaadan.” 32Qoota horayta samaytoppa ollin koope malla, orra kutta wa malla eyyepa de'e nefo in upo. Seminan otoo takka we takkan kiino ka ullupnooyye apila wa pila'e kiini ka ullupniiw. 33Yihutaatoppa orra demo ka nama takka Iskindiri kidammo samaytoppa tutuuken ka fuula turopa isha sookshen; samaytoppa orra demo ka akka a kuttati ishootta' tamaakkado'e isha dehaamen. Iskindiri ka akka samayta jaw kido harkan akkishe ka akka haasoosen mina tamaakkado harmisade. 34Ma xoori orrase ete, akkima Iskindiri Yihutitta kodde upnaadeeyye, saateta lakki mina kitto kara'e piisanti nessa takkan ullupen ka kidene, “Aartemiise a Efesooni, kuttayteeta!”

35Piraampira qaraayye waanna taafitta a katamaseneti ka orra jaw kiishe ka kide, “Ishina orra Efesoonitiiyyi! akkima orra katama Efesooni kara kalo piisa tikase a qulqulloota a artemiisise kutta isho pahanasene 'xaadi moonte lekkade tooytino, nama piisa upa. 36Nama sede marmanno qoota in kinnin malla akka di'i kiitan ka jarjartan wa neeqa kodeeta tooytaattane ishin parpaaccisni. 37Orra mehadda a tika a qulqulloota'en sarrin ka waaqinnon in onnini'i qapten ka arepan deeten. 38Dimetiroosi isho liilissampaya a isha olli ca, oton nama xasasnaane caayye, kuyyawwa a oppa firteeta daasammitta'e ca. Ukkumampaya nefo, icaaneey a eyye oli xasasen. 39Oton xoori wa faanittane a pila'e caayye, firtishoonkota a seeran qa'attene tooyyatamta. 40Ataakkiti wa awwe kodde minanne, ‘Akka ino a' kiinini, ‘Horayta xaashen ka ino a' xasasninin fuurrinna.’ Kati ino kiinaane, ‘Horaytose maana minanne xa'eyye,’ Wa an mina oorsanna an qapno.” 41Ka asse kide ka orrase ollopa oore akka paso kode.

Currently Selected:

Kodampaya 19: MaQu

Highlight

Copy