Ayohana 9
9
Ayesu annamia mundu jwaabhelikwe ngalola
1Lichobha limo Ayesu pabhatendita kupeta, akammona mundu jwangalola kubhokela chibhelekwa. 2Bhabhachigana bhabhe bhakaakonya, “Bhannyigana, nga ganiki jwatendite mabohu mpaka hojo mundu kubhelekwa ngalola, bholi jwatendite mabohu nga hojo mundu au akaabhelei bhabhe?” 3Ayesu akajangula, “Ngabha jonjoni wala akaabhelei bhabhe bhabhatenditinge mabohu. Akabhelekwa henela ili ukolo gwa Annoongo gabhonekane mu umomi gwabhe. 4Tupalikwa kutendeka mahengo gakwe jonojwe jwandumite kukibha tangu muhi. Lubhendu lutendakuika na jwakwa mundu jwaapakombola kutenda lihengo. 5Mmi tangu pachilambo, nenga nga nhana gwa bhandu bha pachilambo.”
6Ayesu pabhakajomola kulongela genago, akauna mata pahi, akaalakia mandope kwa mata genigala na kwantyeka jwangalola jonijola mmiho. 7Ngapena akalobholela, “Nnyaule nkakuhe mu litanda lya Siloamu.” Siloamu maana gakwe nga jonijola jwatumitwe. Ngapena jonijola jwangalola akajaula, kuha machi, na akabhuja abhikulola.
8Akaandami ajabhe na bhandu pabhakaabhona abhi kujopajopa bhakachikonyanga, “Bholi, mundu hojo nga jonijola jwatendita kujopajopa?”
9Bhangi bhakalobholanga, “Jonjoni nga jonojwe.”
Bhangi bhakalobhola, “Ngabha jonojwe atekulandana tu.”
Nambo mwene akalobhola, “Nenga nga jonijola jundendita kujopajopa.”
10Bahi, bhakibha bhatendakwakonya, “Bholi, nangocheni miho ginu gakombwilebholi kulola?”
11Jonojwe akajangula, “Jwajola mundu jwakemwa Ayesu jwakaalakia mandope, akandipaha mmiho jangu akanobholela. Nyaule mu litanda lya Siloamu. Ngakue na popopo ngakombola kulola.”
12Bhakaakonya, “Mundu jonojwe abhi koji?”
Akaajangulanga, “nenga ngamanya.”
Mafalisayo bhatendakulolekea maha jwangalola alamikwebholi
13Ngapena bhakaapeleka kwa Mafalisayo jonijola mundu jwakibha ngalola kubhokela pena kandai. 14Lichobha helyo Ayesu pabhaalakia undopi na kugalamia miho ga jonijo mundu likibha Lichobha lya Kupomolela. 15Pena Mafalisayo bhakaakonya kabhele jono mundu chibhatekombola kulola. Jonojwe akaalobholelanga, “Akandipaa mandope mmiho jangu, ngakuha na ngocheni ndendakulola.”
16Mafalisayo bhangi bhakalobhola, “Hojo mundu ngabhoka kwa Annoongo, ligongo ngakamula Malagilo ga Lichobha lya Kupomolela.”
Nambo bhandu bhangi bhakakonya, “Mundu jwaakweti mabohu akombolabholi kutenda hilolelo handa yenjeni.” Henela bhakametunikanga. 17Henela Mafalisayo akaakonya kabhele jonijola mundu, “Mwenga nga junnamikwe miho, nkombolabholi kwaakongolela mundu jonojwe?” Ligongo miho ginu galamite.
Jonojwe akaajangulanga, “Jonojwe nga alondohi bha Annoongo.”
18Akachilongola bha Bhayahudi bhangahobhalelanga kubhehe mundu hojwe akibha ngalola ngocheni atendakulola, mpaka pabhakaakema akaabhelei bhabhe. 19Bhaakonyanga akaabhelei bhabhe, “Bholi, hojo nga mwana jwinunji, jwaakibha ngalola kubhoka chibhelekwa? Ngocheni atekombolabholi kulola?”
20Akaabhelei bhabhe bhakajangulanga, “Tuimanyi kubhee hojo nga mwana jwitu, na tuimanyi abhelikwe ngalola. 21Nambo twenga ngaimanya akombwilebholi kulola, wala ngammanya jwannamie miho. Mukonyange mwene jono nga nkolongwa na atendakumanya kuchikongolela mwene.” 22Akaabhelei bhabhe bhakalongelanga henela ligongo bhatendita kwajogopanga akaakolo bha Bhayahudi, ligongo Bhayahudi bhakalobholanga mundu joajola jwatendakwakonda Akilisito apakuhibhilwa kuchalila mu nyuumba ja konganila Bhayahudi. 23Henela akaabhelei bhabhe bhakalobholanga, “Jono mundu nga nkolongwa, mukonyange mwene.”
24Bahi, bhakaakema kabhele jonijola jwakibha ngalola, bhakaalobholela, “Mwapekee Annoongo ukolo gwabhe! Twenga tuimanyi kubhehe mundu hojo jwannamie atekola mabohu.” 25Mundu jonojwe akaajangulanga, “Handa mundu jonojwe atekola mabohu au jwanga mabohu nenga ngaimanya. Nambo chikubho chimo chinichimanya, ngibha ngalola nangocheni ndendakulola.”
26Bhakaakonya, “Akantendela chiniki? Atekunnamiabholi miho ginu?”
27Jono mundu akaajangulanga, “Nyomwile kunnobholelanga, mwangota ngapalanga kunyonikiha. Kwa niki mpalanga kujoanikia kabhele? Bholi, mwangota hela hela mpalanga kubhehe bhabhachijigana bhakwe?”
28Ngapena bhakaatukana na kwalobholela, “Mwenga nga bhanchigana bha mundu jonojwe, twenga nga bhabhachijigana bha Amusa. 29Twenga tutendakuimanya kubhee Annoongo akalongela na Amusa, nambo hojo mundu ngakumanya kwaapitila.”
30Jonijola mundu akaajangulanga, “Mbwito ndendakunkangachanga! Ngaimanya kwaabhoka, na jonojwe atekunamia miho gangu! 31Tuimanyi yakubhehe Annoongo ngaajonikia mundu joajola jwatekola mabohu, nambo kunnyoanikia mundu jonijola jwankonda na kutenda genigala gabhagapala. 32Kubhokela kuhalakikwa kwa chilambo, jwangajoanika kubhee abhi mundu jwannamie mundu jwabhelikwe jwangalola na jonojwe akalola. 33Handa jono mundu jwangabhoka kwa Annoongo, akakombwilehopo kutenda choachela.”
34Bhakaajangula, “Mwenga mmelikwe nkibha mmi na mabohu, nkombolabholi kutujigana twenga?” Henela bhakammenga apite panja ja nyuumba ja konganila Bhayahudi.
Mafalisayo bhatendakulepelanga kugumanya ukweli
35Ayesu pabhakajoha kubhehe jonijola mundu bhatekummenganga panja ja nyuumba ja konganilana Bhayahudi, akaakonya, “Bholi, mwenga ntendakunhobhalela Mwana jwa Mundu?”
36Jonijola mundu akajangula, “Mwe mwa akolo jono mundu nga ganiki? Nnobholele nahobhalele.”
37Ayesu akaajangula, “Ntekwabhona, na hojo junnongelanabho, nga jonojwe.”
38Jonijo mundu akalobhola, “Mwe Hangwana, ndendakuhobhalela ngapena akatindibhala majugwa na kwachalila.”
39Ayesu akalobhola, “Ndekuika pachilambo pani ligongo lya kuhukumula, ili bhenibhala bhangalola bhapatange kulola, na bhabhalola bhakotokulolanga.”
40Mafalisayo bhangi pabhakibhanga pamo na Ayesu pabhakajoanga alongela henela bhakaakonya, “Bholi, alongela hela hela na twenga ngalola?”
41Ayesu akaajangulanga, “Handa nkabhilinge ngalolanga, nkalimwitingehopo, nambo kwa kubhee nnongelanga. Twenga tutendakulolanga tangu ntendanga mabohu.”
Currently Selected:
Ayohana 9: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
