Bhagalatia Nnongolelo
Nnongolelo
Chitabu cha Bhagalatia chikajandikwa na andundame Apaulo mu 1:1. Jenje nga Balua jibhakajandika Apaulo kwa mabhoga ga bhandu bhabhahobhalela Akilisito bha konokwe ku Galatia kwa muuda pakati ja chaaka cha 48 na 57 baada ja kubhelekwa Ayesu Kilisito. Jitendakulobholeka kubhee Bhalatia bhakibhanga bhandu bhabhakatamanga chilambo cha ku Galatia chichikabhee mu mamulaka ga utabahala gwa Chi Loma. Akaachomi bha ngani ja Bibilia bangahobhalelanga penipala pabhakabhee Apaulo muuda pabhatenditakujandika balua jenjeni, nambo bhandu bhajingi bhatendakuganikia kubhee jikajandikwa mu chilambo cha ku Efeso au ku Kuolinto. Apaulo akajaandika balua jenjeni kwa bhandu bhoa bhabhahobhalela Akilisito bhabhabhilinge ku mabhoga ga bhandu bhabhahobhalela Akilisito bha ku Galatia, nga bhenibhala bhabhkibhanga Bhayahudi na bhanga Bhayahudi. Balua jenjeni jikaajandikwa kwa maana ngolongwa ili kukanangana na lijigano lya unami lilyaakapala bhandu bhabhahobhaloela Akilisito bhakagulange malagilo ga Chiyahudi gagabhile mu Lilagalo lya lolo handa chikubho cha maana muno mu kuhobhalela, kupunda muno nga lijigano lya kwaakina bhandu. Kukibha na libhoga lya bhandu nkati ja libhoga lya bhandu bhabhahobhalela Akilisito bhabhakachikemanga Bhayuda bhabhakaakulumikianga bhandu bhabhahobhalela Akilisito bhainwange. Kabhele bhandu bhenabho bhakakonyanga kwa ngani ja mamulaka ga chindundame ga Apaulo. Apaulo akatetela undundame gwabhe kwa kukongolela ngani jabhe mu nniango gwa 1:11-2:14, na akatetela Ngani Jammbone ja Ayesu abhikuatambula kubhee ukomboi gukombola kupatikana kwa ndela ja kwaahobhalela Ayesu Kilisito, mu nniango gwa 2:16. Nga mabhokeo ga umbone yakubhee Annoongo atendakugulangia kwa bhandu na wala ukomboi ngakulupalila hikubho ya bhandu.
Gagabhile
Apaulo ajemeka kujandika balua jabhe kwa kwaachalimianga bhandu bhabhahobhalela Akilisito bha ku Galatia, mu nniango gwa 1:1-5.
Ngapena Apaulo atendakongolela hikubho hichoko yabhe nweene, ili kuhitetela hikubho yabhe hiikondekwa ya kujigana na kulangia kubhee akajiga kutama kwa kukagula malagilo nambo akalepela, mu nniango gwa 1:6-2:21.
Hela hela atendakongolela muno kwa ngani ja upenyo gwa malagilo na umbone mu ukomboi, mu nniango gwa 3-4
Ngapena atendakukongoelala kachoko kwa namuna ja kutama kwa umomi gwammbone ya kwaahobhalela Akiisito, mu nniango gwa 5-6:10.
Apauloatendakujomolekea balua jabhe kwa kubhoa chalamu na lijopelo lya kupela abhikwakombokea kubhee kutindiganwa na Annoongo na kupanganwa kubhee mundu nnyono nga chilebhe chammbone muno kupeta malagilo na chelia ya panja, kulandana na jenijela chelia ja kukinwa, mu nniango gwa 6:11-18.
Currently Selected:
Bhagalatia Nnongolelo: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.