Bhaefeso 6

Majigano kwa ngani ja bhaana na akaabhelei

1Mwangota bhana, mwaajeketelange akaabhelei bhinu mu Hangwana, kwa kubhee heche nga chikubho chammbone. 2Lilagilo lya kujemeka libhakalobhola Annoongo nga, “Mwaatopeange atati na anyongo bhinu, 3ili, nchipatile umbone gwabhe na ntame kwa machobha gajingi pachilambo.”

4Mwangota akaatati, nnekange kwaatendelanga hikubho hibohu bhana bhinunji, nambo mwaalelange mu kupangana hikubho yammbone na majigano kubhoka kwa Hangwana

Majigano kwa akaabhanda na akaakolo bhabhe

5Mwangota akaabhanda mwaajeketelange akaakolo bhinu pamba pachilambo kwa kujogopa na kulendemela, ntendange henela kwa ntima gwambone handa chimwatumikila Akilisito. 6Ntendelange henela ngabha tu penipala pabhannolanga bhandu ili nkombolange kuchipendekea pendea kwabhenji ili mmonekane kubhee bhammbone, nambo ntumikange kwa ntima handa chibhapala Annoongo kwa kubhee mwangota nga akaabhanda bha Akilisito. 7Ntendange mahengo ginunji kongo mmi kuhangalala handa henela chintendakwaatumikila Hangwana na nga mwaatumikilange akaakolo bhuinu. 8Nkombokelange kubhee kila mundu jwaapangana gammbone, handa nga abhanda au mundu jwanga abhanda, apakupokela ngwahupa jabhe kubhoka kwa Hangwana.

9Mwangota akaakolo, mwaatendelange helahela akaabhanda bhinu, na nnekenge kwaajogoanga. Nkombokelange mwangota na bhenangota mmi na Hangwana jumo tu jwaabhii kunani, na jonojwe ngaagula mundu.

Ngondo ja chimboomo

10Ngapena, ndendakuntakianga mmangange bhakuhimalikanga mu kulondanika na Hangwana na kwa kujangatilwa na machili gabhee makolo. 11nhwalange hilebhe ya kupotanila mu ngondo hibhatekunpekeanga Annoongo, kupala nkombolange kukana hikubho hibohu ya Lichetani. 12Maana ngoondo yitu ngapotana na bhandu, nambo tupotana na mabhoga mabohu mu chilambo cha mboomo, tupotana na akaatabhala bhakwetinge machili na akaakolo bhabhatabhala chilambo chenjeni cha lubhendu. 13Ligongo helyo muwalange hilebhe ya kupotanila mu ngoondo hinpatitinge kubhoka kwa Annoongo ili palipakuhika lichobha lya kulaga nkombolange kugapeta gena machili ga jono abohu, pampakujomolanga kupotana mpakombola kubhee na machili. 14Bahi mmangane tiyali. Ukweli na gubhee handa nkanda pachibhuno chinu, kondekwa nnoongi ja Annoongo kubhee handa chiwalo cha kuchilenda patandala, 15ndendakulokolila kutangacha Ngani Jammbone ja kuhengwa jibhee handa hilatu mu makongono ginunji. 16Kuhobhalela kwinu machobha goa kubhee handa chilebhe cha kuchihibhila muuda gwa ngoondo mmabhoko ginunji, ibhatendange kuhima nkoha gwa mooto gwa jonijola Lichetani. 17Mpokelange kukombolewa handa kopia jinunji ja chiano, na lilobhe lya Annoongo handa upanga ntekupewanga na Mboomo ja Annoongo. 18Nnyopange machobha goa handa Mboomo jwa Annoogo chibhantandaanga mu muuda gwa kujopa, muuda goa mmangange tiyali kwaajopelanga bhandu bhoa bha Annoongo. 19Hela hela nnyopalange na nenga kabhele ili Annoongo akombole kumbekea malobhe ga kulongela na nenga ngombole kunnobholelanga genigala gagatekuchiiya mu Ngani Jammbone pangali lipamba. 20Annoongo andumite kutangacha Ngani Jammbone hata handa ngocheni ndekutabhwa. Nyopange, ili ngoto kubhee na lipamba ndangache handa chiipalikwa.

Chalaamu ja kujomolekea.

21Tukiko, anung'una jwitu tutumpala muno na antumichi jwa kuaminika mu kulondekana na Hangwana, apakunnobholelanga ngani yangu yoa ili nkombolange kumanya chiimbangana nangocheni. 22Ndekwaatuma jonojwe kwaachinunji ampekeange ngani yitu ili mkombalange kumanya ngani yitu na kulekelwa ntima.

23Henela akaanung'una bhangu ndendakwaajopa Atati Annoongo na Hangwana bhitu Ayesu Kilisito ampekeange mwangota kuhengwa na upaliho na kuhobhalela. 24Ndendakwaajopa Annoongo ampekeange umbone mwangota mwabhoa mumpalanga Hangwana bhitu Ayesu Kilisito kwa upaliho gwangali kupela.

Currently Selected:

Bhaefeso 6: NTNHBL

Highlight

Copy

Compare