Hikubho Nnongolelo
Nnongolelo
Chitabu chenjeni cha Hikubho chikongolela namuna lilubhalo lya bhandu lilyahobhalela Akilisito chibhakajemekanga ku Yelusalemu na kujenela ku Uyahudi na ku Samalia mpaka ku hilambo ya kutali, handa malagilo ga Ayesu Kilisito kwa bhabhachijigana bhabhe tangu kujaula kwaachabhe kunani kwa Annoongo Hikubho 1:8. Chitabu heche chikajaandikwa na Aluka na nga jwaakajandika chitabu cha Ngani Jammbone handa chiikajandikwa na Aluka. Jonojwe akibha ang'anga, na jonojwe atendita kulolekea muno abhi kulolekea kujandika melobhe gayene. Jwaakajandikilwa hitabu heye ya hibhele yaani Injili na chitabu cha Hikubho akibha Agiliki jumo jwakemitwa Ateofilo. Nambo komboleka hitabu heye hikajandikwa kwa bhandu bhoa bhabhakahobhalela Akilisito, bhabhakibhanga Bhagiliki na Bhayahudi 1.1.
Na komboleka chitabu cha Hikubho chikajandikwa mu yaaka ya 60 hadi 64 baada ja kubhelekwa Ayesu Kilisito, ligongo chitabu chitendakujomoka tangu Apaulo jwangajogolekwa kubhoka mu nyuumba ja kutabhila bhandu. Kabhele Aluka akibha mu ulendo pamo na andundame Apaulo, na komboleka akachijandika chitabu heche akibha mu chilambo cha ku Antiokia. Chitabu cha Hikubho nga nnyendelelo gwa chitabu cha Ngani Jammbone ja Aluka, chijemeka kukongolela kuhomba kwa Ayesu kujaula kunani kwa Annoongo. Aluka akajandika chitabu heche komboleka kubhee lyela lyela libhakibhanalyo, atendita kujandika Ngani Jammbone jabhe. Akapala Ateofilo, na bhandu bhabhakibhanga Akaakilisito bhatendita kujonjokekanga ili bhakombolange kumanya maha chenichela chibhatendita kujiganangwa, na henela akajandika ngani ja kweli ja umomi gwa Ayesu na kujonjokeka kwa bhandu bhabhahobhalela Akilisito.
Chitabu cha hikubho chitendakutulangia twenga kulandanakia kwa lilubhalo lya bhandu bhabhahobhalela Akilisito palikajema, na namuna bhandu chibhatamitinge mu kuhobhalela kwa Ayesu. Kulandanikia kwa akaandundame hitendakutulangia twenga namuna ja kuhobhalela machili ga Mboomo ja Annoongo mu kujenela malobhe ga Ngani Jammbone kwa bhangi.
Gagabhile nkati.
Mboomo ja Annoongo jitendakwajangatila bhabhachijigana na lilubhalo lya bhandu lilyahobhalela Akilisito likajemaka kukola na kujonjokeka, mu nniango gwa 1:1-8:1.
Kabhele lilubhalo lya bhandu lilyahobhalela Akilisito lipeta mu chipindi cha kulaga na hibhini, na lilubhalo lya bhandu lilyahobhalela Akilisito litendakujenela mpaka nnyenje ja mipaka ja ku Yelusalemu, mu nniango gwa 8:2-12:23.
Apaulo pabhakajomola genago akajemeka ulendo gwabhe gwa kutangacha Ngani Jammbone, mu nniango gwa 12:24-14:28.
Ngapena chikomiti pachikakongana ku Yelusalemu kuamua nga hikubho niki yammbone hiipalikwa kwa bhandu bhabhahobhalile bhayono, mu nniango gwa 15:1-35. Ngapena
Apaulo akajaula ulendo gwabhe gwa bhele gwa kutangacha Ngani Jammbone, mu nniango 15:36-18:22.
Pabhakabhoka penapo akajaula ulendo gwabhe gwa tatu gwa kutangacha Ngani Jammbone mu nniango gwa 18:23-20:38 Ngapena
Apaulo akamulikwa abhi ku Yelusalemu, mu nniango gwa 21-26
Kupela kwa yoa Apaulo apelekwa ku Loma, mu nniango gwa 27:28.
Currently Selected:
Hikubho Nnongolelo: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.