Hikubho 5

Anania na Asafila bhatendakutemba

1Kukibha na mundu jumo jwaakemitwa Aanania na hanu bhabhe Asafila na bhenaangota hela hela bhakauchanga ng'oonda gwabhenji. 2Nambo, hanu bhabhe abhikuhimanya, Aanania akaapula chehemu ja mbiya hibhaakapata na kuhiya na mbiya yengi hihikaigalila akapeleka kwa akaandundame. 3Bahi, Apetulo akaakonya, “Aanania, mboni ntekwaajeketela lichetani kujingila muntima gwinu na kuntenda muntembe Mboomo jwa Annoongo kwa kuchibhekela mbiya muipatite kubhokela kwa kuucha nng'oonda? 4Mmi tangu kuguhucha gukibha gwinu, na pamukaguucha, tangu yene mbiya ikibha yinu muitumie chimpala. Kwa niki, nkahamua muntima gwinu kutenda chikubho handa chenjeni? Mwangantemba mundu, mwaatembite Annoongo!” 5Aanania pabhakajoa genago, akagwehe pahi, akajomoka. Bhandu bhoha pabhakajoanga ngani ya chikubho hecho bhakajogopanga muno. 6Akanangwendu bhakakemwanga, bhakaguigilila mmele gwabhe sanda, bhakagupia panja, bhakaachika.

7Pagakapeta machaa gatatu, hanu bhabhe, pangaimanya chikubho chichibhokile, bhakajingilanga monimola nkati. 8Apetulo akaalobholela, “Ngongolele! Bholi, heye mbiha nga mpatitinge kwa kuuchanga ng'oonda?”

Jonojwe akajangula, “Kweli, nga yenjeni.” 9Nabhenabho Apetulo akaalobholela, “Mboni mpala kwaajiga Mboomo jwa Hangwana? Nnyohanikie! Bhenibhala bhandu bhabhakajaulanga kwaachika hangwana bhinu, nangocheni bhabhilinge panniango bhapakuntola namwenga.” 10Popopo Asafila akagwehe nnoongi ja makongono ga Apetulo, akajomoka. Bhenibhala akanangwendu pabhakajingilanga, bhakaakolela ajomwike, bhakaapia panja, bhakaachika kubhandikila na hangwana bhabhe. 11Bhoga ngolongwa gukaajingila bhandu bhabhaahobhalela Akilisito bhoa bhabhakajoanga ngani ja chikubho hecho.

Akalondoi bhatendanga yakangachika hilolelo hijingi

12Akandundame bhakatendanga hilolelo na yakangachika gajingi pakati ja bhandu. Bhandu bhabhahobhalela Ayesu bhabhakibhanga bhatendakongananga pamo mpa lubhanja lwa Aselemani. 13Mundu johajola jongi jwangabhe pamo na chibhoga hecho. Hata henela, bhandu bhangi bhangahobhalela lenelyo bhakaalumbalilanga. 14Bhandu bhabhakahobhalelanga Hangwana, bhakapunda kujonjokeka muno akanalome kwa akaikege 15Bhandu bhakibhanga bhatendakwapelekanga akaatamwa nndela na kwagonekanga nnaani ja hindanda na mmakahi ili Apetulo handa apetite, chiheka chabhe chakwaange bhangi pakati jabhenji. 16Bhandu bhajingi bhakaikanga kubhoka mu hilambo ya nngulugulu ja ku Yelusalemu, bhakaaletanga akaatamwa bhabhenji na bhenibhala bhabhabhilinge na mahoka gabohu, nabhena bhoha bhakaalamianga.

Akandundame bhatendakulagiwanga

17Ngapena, akung'i akolo na akaajabhe bhabhakibhanga bha chibhoga cha Masadukayo bha penapo, bhakaabhonelanga akandundame bwihu.

18Bahi, bhakakamulanga, bhakaatabhanga nkati ja nyuumba ngolongwa ja kutabhila bhandu. 19Nambo kilo akaatumichi bha kunani kwa Annoongo bhakajijogolanga milyango ja nyuumba ja kutabhila bhandu, na kwapianga panja, bhakaalobholelanga, 20“Nnyabhulange, nkajemange pa Nyuumba ja Annoongo nkaalobholelange bhandu malobhe goha ga umomi hogo guyono kwa kulondanika na Ayesu.” 21Akandundame bhakajeketelanga, bhakajingilanga mu Nyuumba ja Annoongo kundabhi tupupu, bhakajemekanga kwaajigananga.

Akung'i Akolo na ajabhe pabhakaikanga, bhakaakemanga pamo chikomiti cha Chebule ja lilubhalo lyoa lya akanahota Bhaisilaeli, kabhele bhakaatumanga bhandu ku nyuumba ja kutabhila bhandu bhaletange bhenibhala akandundame. 22Nambo bhenabho akaatumichi pabhakaikanga konokwe bhangaakolelanga monimola mu nyuumba ja kutabhila bhandu. Henela bhakabhujanga, kwalobholelanga akanahota bha Chebule, 23bhakalobholanga, “Patukahika pa nyuumba ja kutabhila bhandu tukakolela milyango ja nyuumba ja kutabhila bhandu jitabhitwe kohakoha na akaalendei bhabhi kulendelela milyango. Nambo patukajogola twaangankolela mundu johajola nkati.” 24Akolo bha akaajemelei bha Nyuumba ja Annoongo na akakung'i akolo pabhakajoanga ngani hejo bhakibhanga na bhoga, bhakotokuimanyanga kubhapatitinge bhenibhala akaandundame. 25Akaika mundu jumo, akaalobholelanga, “Bhenibhala bhandu bhamwatabhitinge mu nyuumba ja kutabhila bhandu, nangocheni bhabhilinge pa Nyuumba ja Annoongo, bhatendanga kwaajigana bhandu.” 26Penapo akakolo bha akaajemelei bha nyumba ja Annoongo pamo na bhandu bhabhe bhakajaulanga ku nyumba ja Annoongo, ili bhaaletange. Nambo bhangaakamulanga kwa machili, ligongo bhakajogopanga bhandu bhapakwapootanga maganga.

27Bahi, akaandundame bhakapelwakwangwa, na kwaajemeanga nnoongo ja Chebule. Akung'i Akolo akaalobholelanga, 28“Tukankakianga kujigananga kwa lihina lya mundu hojo, nangocheni nntendanga kujeneanga majigano ginunji pohapoha mu Yelusalemu na mwangota mpalanga kutukokoleka twenga ligongo lya malilo ga mundu hojwe.”

29Penapo Apetulo, akibha pamo na akaandundame bhangi, akajangula, “Tupalikwa kwaakoonda Annoongo, na ngabha bhandu. 30Annoongo bha ahokolo bhitu akaayoa Ayesu jonijola mwaangota pankankoma kwa kwabhamba pa nchalaba. 31Jonojwe nga Annoongo jwakaakwelea mpaka upande gwabhe gwa kunnelo, akabhee nkolo na Jwatukomboa, ili bhakomboleange bhandu bha ku Isilaeli bhakotimange, bhapatange kulekelelwanga kulemwa kwabhenji. 32Natwenga nga bhatulolite chikubho hecho, Mboomo jwa Annoongo yakubhee Annoongo bhatekwaapekeanga bhenibhala bhabhaakonda, nabhombe atendakulola chikubho hecho.”

33Akaajumbe bhoha bha jenijela Chebule pabhakajoanga genago, bhakatumbalanga muno, hata bhakapalanga kwakomanga akaandundame. 34Nambo Mfalisayo jumo jwaakemitwa Agamalieli yakubhee akibha amundu bha kujigana malagilo na jwaakatopelwa muno akajema nnoongi ja bhandu bhoha, akajema nnongi ja Chebule, akapala bhenibhala akandundame bhaapiange oti panja kachoko. 35Ngapena, akaalobholelanga bhenibhala akaajumbe bha Chebule, “Bhaisilaeli akaajangu, nkombokelange oti tangu mwangatendanga chenecho chimpala kwatendela habha bhandu! 36Yaaka kachoko jijipetite, akabhokela mundu jumo lihina lyabhe Ateuda. Jonojwe akachitangacha kubhee akolo na bhandu handa mia ncheche bhakaakagula. Nambo akakomekwa, ngapena bhandu bhoa bhabhakakaagula bhakapwilinganikanga na chibhoga chabhe chikawee. 37Kabhele, machobha gala ga kubhalanganwa bhandu, akabhokela Ayuda amundu bha ku Galilaya. Jonojwe akautanga bhandu bhakaakagula, hela hela na jonojwe akakomekwa, na bhenibhala bhandu bhabhaakagula bhakapwilinganika. 38Nangocheni na nenga ndendakunkelebhuanga, habha bhandu nkotokwaatendalanga choachela, mwaalekange, kwakubhee, handa gubhi mpango ngongoni au lihengo lyabhenji lijemikwe na bhandu, ngajaula kutali lipakuwehe.

39Nambo handa lijeemikwe Annoongo, ngakombola kwakanikia habha bhandu, nambo mpakuchikolelanga mmikwakana Annoongo.”

Henela, bhandu bhoa bha Chebule bhakaondanga chenichela chibhakalongela Agamalieli. 40Henela bhakaakemanga bhenibhala akandundame bhajingilange nkati, bhakaakulumikianga bhapotwangwe hiyakato na kwakanikia bhakotokwajigana kabhele kwa lihina lya Ayesu, ngapena bhakaalekanga bhajaulange. 41Bahi, akaandundame bhakapitanga panja ja jenijela Chebule bhabhikuhangalalanga muno, kwakubhee Annoongo akatenda bhatopelwangwe kwa kupatanga honi ligongo lya lihina lya Ayesu. 42Bhakajaulanga kila lichobha kujigana na kutangachanga Ngani Jammbone pa Nyuumba ja Annoongo na mmajumba ga bhandu kubhee Ayesu nga Akilisito.

Currently Selected:

Hikubho 5: NTNHBL

Highlight

Copy

Compare