Hikubho 21

Apaulo ajaula ku Yelusalemu

1Patukajomola kutabhukana nabho kwa kiha, tukakwela meeli kujaula mpaka ku Kosi. Malabhi jakwe tukaika ku Lode, na kubhoka konokwe tukajaula ku Patala. 2Konokwe tukajikolela meeli jikibha jijenda ku Foinike, henela tukakwela, na tukajaula. 3Patukahika mahali patukakombola kukulola kuchining'ina cha Kupulo, tukapetela upande gwa kuchini kujaula ku Silia. Tukahika chilambo cha ku Tilo pajikabhee jenijela meeli jijikibha jituluha mihigo jakwe. 4Konokwe tukaakolelanga bhabhachijigana bha Ayesu, tukatama pamo nabho kwa muda gwa lijuma limo. Bhabhachijigana bhenabho bhakibha bhalongelanga kwa machili ga Mboomo, bhakaalobholelanga Apaulo akotokujenda ku Yelusalemu. 5Nambo muda gwitu pagukajomoka tukabhoka. Bhabhachijagana bhenebho pamo na akaahanu na bhana bhabhenji bhakatuchapalianga mpaka nnyenje ja chilambo. Patukaika kumbwani, twabhoha tukatindibhala majugwa tukaajopa Annoongo. 6Ngapena tukatabhukana, twenga tukakwela meeli, nabhena bhakabhujanga kwachabhenji.

7Twenga tukaendelea na ulendo gwitu kubhoka ku Tilo na tukaika ku Tolemai kwa meeli yakubhee tukajaula kwalolanga akanung'una bhitu bhabhahobhalela Ayesu, tukatama nabho lichobha limo. 8Malabhi jakwe tukabhoka tukajaula kuchilambo cha Kaisalia. Konokwe tukajaula ku nyumba ja mundu jwaatangacha Ngani Jammbone jwakemitwa Afilipo tukatama kwaachabhe. Jonojwe akibha jumo jwa bhenibhala saba bhabhaakagulikwa konikola ku Yelusalemu. 9Akibha na bhaali ncheche akaahenja bhakibhanga na ukolo gwa kubhee akaalondoi bha kutangacha ngani ya Annoongo. 10Patukatama konokwe machobha kachoko, alondoi jumo jwa Annoongo jwakemitwa Agayo akatuluka kubhoka ku Yudea. 11Akahika kwaachitu, akatola nkaanda gwa Apaulo, akachitabha mmabhoko na mmakongono gabhe, akalobhola, “Mboomo jwa Annoongo akita henela, ‘Bhayahudi konikola ku Yelusalemu bhapakwatabha namuna jenjeni mundu akola nkanda hogogo na kwaakamua kwa bhandu bhanga Bhayahudi.’”

12Patukajoha genago, twenga na bhenibhala bhandu bhangi bhabhakibhanga penapo tukaapembelea muno Apaulo akotokujenda ku Yelusalemu. 13Nambo Apaulo akajangula, “Nng'utanga chiniki? Au mpalanga kunhengelanga ntima gwangu? Mbii tayali ngabha tu kundabhalila munyuumba ja kutabhila bhandu kunokwe ku Yelusalemu, nambo hata kujomoka ligongo lya Ayesu.” 14Paakalepela kutujoanikia tukaaleka, tukalobhola, “Libhapala Hangwana litendeekwe!”

15Patukatama penipala kwa machobha kachoko, ngapena tukatabha mihigo jitu, tukaendelea na ulendo gwa kujaula ku Yelusalemu. 16Bhabhachijgana bhangi bha Ayesu bha ku Kaisalia, bhakatupelekanga kunyumba ja mundu jwakemitwa Amnasoni yakubhee tukibha tukajaula kutama nabho kwa muda. Jono akibha mundu jwa kubhoka ku Kupulo na jonjojwe akibha jwachijigana jwa Ayesu kwa machobha gajingi.

Apaulo atendakwatyangila Ayakobo

17Patukaika ku Yelusalemu, akaanung'una bhabhahobhalela Ayesu bhakatupokela maha muno. 18Malabhi jakwe Apaulo akajaula pamo na twenga kongoloka na Ayakobo, na akanaota bhoha bha nyuumba ja Annoongo bhakibhanga kabhele. 19Pabhakajomola kulongela nabho, Apaulo akajemeka kwalobholelanga maha chikubho chimo kwa chengi yakubhee Hangwana Annoongo akapangana kwa bhandu bhanga Bhayahudi kupetela ukolo gwabhe. 20Bhenibhala bhandu pabhakajoanga genago, bhakaalumbalila Annoongo. Kabhele bhakaalobholela Apaulo, “Anung'una bhitu Apaulo, nkombola kulola kubhee pabhile na nkutuli nkolongwa muno gwa Bhayahudi yakubhee nangocheni bhatendakwahobhalela Ayesu na bhoa bhabhakamulilanga Malagilo ga Amusa. 21Bhatekujoanga kubhee ntendakwajigananga Bhayahudi bhoa bhabhatamanga pakati ja bhandu bhanga Bhayahudi kubhee bhakotokamulanga Malagilo ga Amusa, bhakotokwahinanga bhana bhabhenji na kubhee bhakotokagulanga hibhatenditanga Bhayahudi. 22Nangocheni, bhatekujoanga mwenga mmi pambani pa Yelusalemu henela hikubho hipakubheebholi? 23Bahi, ntende handa chitunnobholile. Pambani tubhi nabho bhandu ncheche bhabhatekuchilapila kwaabhokea Annoongo. 24Nchilondanike nabho mu kwalepela mu kulapila kwabhenji, nkalepelele goa gagapalikwa kubhoa, ngapena bhachekulwange majunju gabhenji. Henela bhandu bhoa bhapakumanyanga kubhee ngani yeniyela hibhalobholilwe nnani jinu nga ya unami, na kubhee mwenga tangu ntama handa chigapala Malagilo ga Amusa. 25Ngani ja bhenibhala bhandu bhanga Bhayahudi nambo bhaapokile Ayesu bhakaapelekelanga balua tubhi kwaalobholelanga hikubho tuitendite, bhakoto kulyanganga choachela chibhabhekile minnoongo ja unami, bhakotokulyee mihai, bhakotokulyehe nyama jakupopotolwa, na bhachibhekange kutali na ngongola.” 26Bahi, malabhi jakwe Apaulo akaatolanga bhenibhala bhandu na bhakachibhekanga ili bhakondekwange handa chiiyobhalilike ligongo lya kwaajopa Annoongo. Ngapena akajingila mu Nyuumba ja Annoongo na kwakongolelanga kupela kwa lichobha lya kuchibheka maha ili kondekwa nnoongi ja Annoongo na ngani ja yadaka hiipakubhokekwa ligongo lya kila jumo jwabhenji.

Apaulo atendakamulikwa

27Muda machobha genago saba pagakajomoka, Bhayahudi bhabhakibha bhabhokitinge mu chilambo cha ku Asia bhakaabhona Apaulo mu Nyuumba ja Annoongo. Bahi, bhakakolekeanga lilaka mu libhoga lyoha lya bhandu, bhaakaakamula. 28Bhakalongelanga kwa lilobhe likolongwa bhabhikulobhola, “Mwabhandu bha ku Isilaeli, ntujangatilange! Hojojo nga jonijola mundu jwabhajigana bhandu kohakoha hikubho hiitaukana na bhandu bha ku Isilaeli, gagakana Malagilo ga Amusa na Nyuumba ja Annoongo. Hata nangocheni atekwajingia bhandu bhanga Bhayahudi mu nyuumba ja Annoongo na kupalekela uhakwa mahali papakondekwa mu kwaajopa Annoongo.” 29Ligongo ja kulobhola henela nga yakubhee Atolofimo mundu jwa ku Efeso akibha pamo na Apaulo kunnyini. Bhakaganikianga kubhee Apaulo atekwajingia mu Nyuumba ja Annoongo.

30Chilambo choha chikajenela ukomu, bhandu bhakaika kubhoka pande yoha bhakaakamula Apaulo, bhakautanga, bhakaabhoha panja ja nyumba ja Annoongo, na popopo milyango ja nyumba ja Annoongo jikajigalikwa. 31Lilubhalo lyela lya bhandu palikapala kwakoma Apaulo, nambo ngani jikaikila akolo bha manyemba bha ku Loma kubhee kuchilambo choa cha Yelusalemu kutwelile ukomi. 32Gunakamo, jonijola akolo bha manyemba akaatolanga manyemba gakwe pamo na akaakolo bha manyemba kujaula kupotana na lyenelyo lilubhalo lya bhandu. Nabhena pabhaakabhona akolo bha manyemba, bhakalekanga kwaapota Apaulo. 33Akolo bha manyemba akaajendela Apaulo, akakamula na kukulumikia atabhikwe minyololo jibhele. Ngapena akakonya, “Hojo mundu nga aganiki na atendite chiniki?”

34Kila jumo akibha alongela lyakwe, bhangi bhalobhola henela na bhangi bhalongelanga chilebhe chengi. Ligongo lya ukomu hogwe, akolo bha manyemba bhangakombola kumanya ngani hejo maha. Henela, akakulumikia bhandu bhabhe bhaapeleke Apaulo nkati ja ngoome. 35Apaulo pabhakahika pangaachi ya kujingilila nyuumba ya manyemba, manyemba bhakapalikwa kwaapapa ligongo lya ukomu gwa bhandu. 36Kwa kubhee lilubhalo lya bhandu likaakagula na kupotanga nyenye, “Mwakome, mwakome!”

Apaulo atendakuchitetea

37Manyemba pabhatendita kwaajingia Apaulo nkati ja ngome, Apaulo akajoopa akolo bha manyemba akalobhola, “Ndendakombola kunnobholela chilebhe?”

Jonijola nkolo jwa manyemba akajaangula, “Bholi, ntendakuchimanya Chigiliki? 38Mwenga ngabha jwajola mundu jwa ku Misili yakubhee machobha kachoko gagapetitite akatandubha ukomu na kwaatandaanga matimbanyundo elupu ncheche mpaka kulikonja?”

39Apaulo akajangula, “Nenga nga Ayahudi, melikwe ku Taliso mu chilambo cha ku Kilikia, nenga nga mundu jwa chilambo chichimanyikana muno. Choonde ndendakunyopa nongele na bhandu.”

40Jonijola nkolo jwa manyemba akaaleka alongele na bhandu. Henela Apaulo akajema nnani ja ngaachi kwa pungilanga lubhoko lwakwe bhandu, na bhandu bhakatama jii, akajemeka kulongela nabho kwa chilongelo cha Chiebulania.

Currently Selected:

Hikubho 21: NTNHBL

Highlight

Copy

Compare