Hikubho 17

17 Ukomu gubhokela ku Tesalonike

1Apaulo na Asila pabhakibhanga ku ulendo bhakapetelanga mu hilambo ya Amfipoli na Apolonia, bhakajendanga mpaka ku Tesalonike, konokwe kukibha na nyuumba ja konganilanga Bhayahudi. 2Handa chaayobhalile Apaulo, akajaula mu mu nyuumba ya konganila Bhayahudi na akalongela nabho kwa Machobha gatatu ga Kupomolela, abhikutumia Majaandiko ga Annoongo. 3Atendandita kulongela nabho na kulangia kubhee ipalikwa Akilisito kulaga, kujomoka na kuyoka. Akaalobholelanga, “Akilisito juntendakwatangacha kwaachinu nga Ayesu.” 4Pakati jabhenji Bhayahudi bhakakondanga na kuchilondanika pamo na Apaulo na Asila. Kabhelae, bhandu bha kubhoka ku Ugiliki bhabhakahobhalela Annoongo pamo na akaahikege bhabhakatopelwa mu chilambo hecho, bhakachilondanika nabho.

5Nambo Bhayahudi yakubhee bhangabhalelanga bhakibha na bwihu, bhakaatumanga bhandu bhangali mmbone kubhoka kuchoko, bhakakonganianga nkutuli gwa bhandu na bhakatandubhanga ukomu pannyini. Bhakabhutukanga lubhelo mpaka ku nyuumba ja Ayasoni bhabhi kwaloleanga Apaulo na Asila ili bhaapiange panja papabhile na nkutuli gwa bhandu. 6Nambo pabhakaapelelanga bhakautanga Ayasoni na akaanung'una bhangi bhabhakahobhalela Akilisito nnongi ja akanachilongola bha chilambo, kongo bhabhikupotanga nyenye na kulobholanga, “Bhandu habha bhabhatendita kuchipendekula chilambo choa ngocheni bhaikitinge pambani kwaachitu, 7Ayasoni atekwapokelanga ku nyumba jakwe. Bhoha bhatendanga mpendeku cha amuli ja Akaisali bhabhikulobhola, Abhile amwenye bhangi jwaakemwa Ayesu.” 8Akaakolo bha pannyini na libhoga lya bhandu bhakibhanga na lipamba muno kwa malobhe hago. 9Bhenaangota pabhakajomola bhakaatochanga mbiya Ayasoni na akaajabhe, ngapena bhakaalekanga bhajaulange.

Apaulo na Asila konokwe ku Belea

10Kilo, bhenibhala bhandu bhabhakahobhalela Ayesu bhakaapelekanga Apaulo na Asila bhabhokange bhajaulange ku chilambo cha Belea. Pabhakaikanga konokwe, bhakajaulanga ku nyuumba ja konganilana Bhayahudi. 11Bhandu bha ku Belea bhakajoanikianga maha kupeta bhenibhala bha ku Tesalonike, kwa kubhee bhakalipokelanga genigala malobhe kwa kuhangalala muno. Bhakagalolekea maha Majaandiko ga Annoongo kila lichobha, bhalole yakubhee handa genigala gabhakalongelanga Apaulo na Asila gakibha ga kweli. 12Bhajingi bhabhenji bhakahobhelelanga pamo na akaikege na akanalome bha Chigiliki bhabhakatopelwa muno.

13Nambo, Bhayahudi bha ku Tesalonike pabhakahimanyanga yakubhee, hele hela Apaulo atendita kutangacha lilobhe lya Annoongo konokwe ku Belea, bhakajaulanga konokwe, bhakajemekanga kwaatendela ukomu na kwelekea mabhoga ga bhandu. 14Palapala bhandu bhabhakahobhalela Ayesu bhakaachapalia Apaulo ajaule kumbwani nambo Asila na Atimotheo bhakaigalilanga ku Belea. 15Bhenibhala bhandu bhabhahobhalela Ayesu bhabhaakachapalia Apaulo bhakajendanga pamo nabho mpaka ku chilambo cha Atene. Ngapena, bhakaaleka Apaulo na bhakabhujanga na malagilo kubhoka kwa Apaulo kubhee Asila na Atimotheo bhaakagule chindema.

Apaulo alongela na bhandu konokwe ku chilambo cha Atene

16Apaulo pabhatenda kwaalenda Asila na Atimotheo konokwe ku chilambo cha Atene, akatumbala muno kwa kubhoka kujimbika kwa hidimu ya minnoongo, pabhakabhona henela akaabhina muno mu ntima gwabhe. 17Henela akakonyananga na Bhayahudi na bhandu bhangi bhanga Bhayahudi nambo bhabhahobhalela Annoongo mu nyuumba ja konganilananga Bhayahudi. Hela hela kila lichobha atendita kulongela na bhandu bhabhakakongana nabho palugwinjili pamo na bhoa bhabhakahikanga. 18Bhandu bhangi bhatendita kukagala majigano ga Bhaepikuleo na Bhasitoiki bhakataukana na Apaulo. Bhangi bhakalongelanga, “Hojo mundu jwa lobholobho apala kulongela chiniki?”

Bhangi bhakalobholanga, “Ibhonekana alongela ngani ja minoongo ja chigeni.” Bhakalobholanga gangani ligongo Apaulo akibha atendakutangacha ngani ja Ayesu na kuyoka. 19Henela bhakaatola Apaulo na bhakaapela pachebule jijikemwa Aleopago, bhakalobholanga, “Bholi, tupakombola kugamanya majigano haga gayono gajigana chiniki? 20Tutekujoa mmikulongela hilebhe higeni, henela tupala kumanya maana gakwe nga chiniki.” 21Bhandu bha ku Atene na akaageni bhoha bhabhatamanga monomwe, kwa machobha gabhenji goha bhatendita kupala kukongolelananga na kujoanikia ngani hiyono.

22Ngapena Apaulo akajema nnongi ja chebule jenejo ja Aleopago, akalobhola, “Bhandu bha ku Atene! Komboleka mwangota nga bhandu bhankotimilanga kwa kutopea muno minnoongi jinunji. 23Panakibha ndendakujeenda pannyini na kulolekea kwa kwakuchimila hidimu yinunji, nakalola litatali lya kubhokea mbeeko, jijaandikwe, ‘Kwa annoongo jwangamanyikana.’ Bahi Annoongo juntendakunkotimilanga kwa kutopea pangali kuimanya, nga jonojwe jundendakuntangachianga kwaachitu. 24Jonojwe nga Annoongo, jwahalakihe chilambo na yoha hihibhile nkati jakwe, jonojwe nga Hangwana bha Kunani kwa Annoongo na chilambo, ngatama mu nyuumba jijichengitwe na bhandu. 25Ngatumukiwa na bhandu na ngapala chilebhe choachela kubhoka kwaachabhenji, ligongo jonojwe bhene nga jwaapekea bhandu bhoha umoomi na mboomo na kwapekea hilebhe yoha. 26Kubhoka kwa mundu jumo, bhena akatukuhalakia bhandu bhoha na kutama pachilambo, nabhena akabheka nga lii na koji bhena bhandu kubhapakutamanga. 27Annoongo akatenda henela ili bhandu bhaalolee hata kwa kupaapaa kupala bhammone. Henela Annoongo jwangabhee kutali na kila jumo jwitu, 28handa chibhalongile mundu jumo,

‘Nkati jabhe jonojwe twenga tutendakutama,’

Tutendakuchikombola, na tubhile!

Nga handa bhandu bhinu bhangi chibhalongilinge.

‘Twenga nga bhana bhabhe.’

29Twenga nga bhana bha Annoongo, ngapalikwa kuganikia kubhee Annoongo nga handa chidimu cha bhuunyu madini ga mbiha au liganga lilibhachitwe kwa umanyo na kulikulungila kwa bhandu. 30Annoongo akachitenda handa ngalola machobha genigala yakubhee bhandu pabhakibhanga ngaamanya Annoongo bha kweli. Nambo nangocheni bhatendakunkulumikia bhandu bhoha bhalekange kulemwa kwabhenji na kwabhujila bhenabho, 31kwakubhee atekubheka lichobha yakubhee apakuukumula chilambo handa chiikondeekwa apakuntuma mundu jwaabhanhagwile, kwa jonojwe jwatekutulobholela bhandu bhoha kwa kwayoha Akilisito.”

32Pabhakajoanga ngani ya uyoho kubhoka kwa Apaulo, bhangi bhakaabheluha, nambo bhangi bhakalobholanga, “Tupala kunnyoanikia kabhele mmikongoloka ngani ja chikubho hecheche.” 33Henela, Apaulo akabhoka akaalekanga. 34Nambo bhangi bhakalongana na jonojwe, bhakaahobhalela. Pakati jabhenji bhakibhanga Adionisio, jumo jwa chebule cha Aaleopago, hela hela akibha mwikege jumo jwakemitwa Adamali na bhangi bhajingi.

Currently Selected:

Hikubho 17: NTNHBL

Highlight

Copy

Compare