1 Bhakolinto 9

Mahengo gagapalikwa kupekewa andundame

1Bholi, nenga ndekutabhwa? Bholi, nenga nga naandundame? Bholi, nenga nangaabhona Ayesu Hangwana bhitu? Bholi, nenga ngabha jundekunnongoleanga kwahobhalela Ayesu? 2Hata handa kwa bhandu bhangi nenga ngabha andundame, nambo nenga nga naandundame kwaachinu! Ligongo umomi gwinunji gutendakulangia undundame gwangu kwaachinu, ligongo lya kulondanika kwinunji na Hangwana.

3Kwa bhenibhala bhandu bhabhandauka ndendakuchitetea henela. 4Bholi, nenga ngapalikwa kupekewa chakulya? 5Bholi, ngapaalikwa kulongana na hanu jwaatekuhobhalela Akilisito mu ulendo gwangu, handa chibhatendanga akaandundame bhangi na akaanung'una bhabhe Ayesu na Akefa kwa lihina lyengi nga Apetulo? 6Bholi, nenga na Abalinaba nga bhatupalikwa kutenda mahengo ili tukombole kutama? 7Bholi, nga linyemba niki lilijenda kungondo kwa kuchilepela mweene? Alemi niki jwangalyee matunda ga ng'onda gwabhe gwa mzabibu? Achungi niki jwangang'wee mabhele ga hilangwa yabhe?

8Bholi, ndendakulongela hikubho heye kwa kuganikia chimuundu? Au bholi, Malagilo ga Annoongo gabhaapekie Amusa ngalongela henela? 9Tuchoomite mu Malagilo ga Annoongo gabhaapekie Amusa, “Nkotokuntabha ng'oombe pabhatendakutumika kupukuchula ngaano.” Bholi, pambani Annoongo alongela kwa ngani ja ng'oombe jika? 10Bholi, Annoongo pabhakalongela malobhe genago ngalongela ligongo litu? Kweli gajaandikwe ligongo litu, kwa kubhee jwaalema na jonijola jwahuna, bhoa bhabhele bhatendakulupalila kubhee bhapakupatanga chakulya. 11Ikabhii twenga tutekuntangachianga malobhe ga Annoongo pakati jinunji, bholi, chipakubhee chikubho chikolongwa ikibha tupakupata hilebhe ya pammeele kubhoka kwaachinu? 12Handa bhangi bhatendakondekwa kulolekea genago kubhoka kwaachinu, bholi, twenga ngakondekwa kuliko bhenaangota?

Nambo, twenga twangakondekwa mu genago. Nambo tupalikwa kuchitimalika kwa kila chilebhe ili tukoto kuhibhila Ngani Jammbone ja Akilisito. 13Bholi, ngaimanyanga kubhee bhandu bhabhatumikila Nyuumba ja Annoongo bhapatanga chakulya chabhenji kubhoka mu Nyuumba ja Annoongo, na bhabhapianga chadaka paamecha ja kubhokea mbeeko bhalyenganga chenichela chichibhokekwa pameecha jenejo? 14Hangwana akanagikia hela hela, bhabhatangacha Ngani Jammbone bhapatange chenichela chibhapalanga kubhoka mu Ngani Jammbone jenejo.

15Nambo, nenga nangatumia hata kachoko kondekwa konokwe. Na nenga nangannyandikilanga hikubho heye kongo mii kuhobhalela kubhee mpakundendelanga hikubho yeneyo. Mbaya nyomoke kuliko kuntenda mundu joajola abhone kubhee ndendakuchilumbalila. 16Nambo pandenda kutangacha Ngani Jammbone ngakombola kuchilumbalila kwakubhee mbalikwa kutangacha. Na kulaga kupakubhee kwaachangu handa ngatangacha Ngani Jammbone! 17Handa mbakutangacha kwa kupala namwene, bahi, ndendakulupalila kulepwa, nambo kwa kubhee ndenda kupanga handa lihengo lyangu namwene, ligongo Annoongo atekumbekea lihengo helye mbangane. 18Bahi malepo gangu nga chiniki? Malepo gangu nga upenyo gwa kutangacha Ngani Jammbone pangali kulepwa, pangali kulonga kondekwa kubhokana na lihengo lya kutangacha.

19Handa chiibhile, nenga ngabha mmanda jwa mundu joajola, nambo ndekuchitenda kubhee mmanda bha kila mundu, ili ngombole kwaajangatilanga bhandu bhajingi bhakombolange kwaahobhalela Akilisito. 20Kwa Bhayahudi ngibha handa Ayahudi, ili ngombole kwapatanga Bhayahudi. Kwa bhandu bhenibhala bhabhabhilinge pahi ja malagilo, ngibha handa jwabhile pahi ja malagilo, ili ngombole kwapatanga bhandu bhabhabhii pahi ja malagilo. 21Kwa bhandu bhanga Bhayahudi, ndekutama handa bhenaangota, ili ngombole kwaajangatilanga kwahobhalela Akilisito. Jenjeni jilangia kubhee nenga ngajoanikia na malagilo ga Annoongo, ila ndendakulongolelwa na malagilo ga Akilisito. 22Kwa bhandu bhanga chilebhe nanenga ngachitenda handa mundu jwanga chilebhe ili ngombole kwaajangatilanga bhenibhala bhanga chilebhe bhakombolange kwahobhalela Ayesu. Ndekutenda kila chilebhe kwa bhandu bhoa ili ngombole kwaaokoanga bhangi pakati jabhenji kwa kila ndela.

23Ndendite haga goa ligongo lya Ngani Jammbone, ili nenga na bhaoa bhabhapakwahobhalela tupatange gammbone ga Ngani Jammbone. 24Bholi, ngaimanyanga kubhee, mu lubhanja lwa kukinila, bhandu bhabhabhutukanga nga bhajingi, nambo nga jumo tu jwaatola ngwahupa? Henela mmutukange ili mkombolange kupatanga ngwahupa. 25Bhabhabhutukanga bhachibhekanga maha kwa machobha gajingi ili lichobha lyela lya kuchindana, ili bhalombolange kupokela ngwahupa jijihalibika! Nambo twenga tupangana hela hela ili tukombole kupata ngwahupa jangahalibika. 26Henela nenga ngabhutuka handa mundu jwabhutuka ili kupokela ngwahupa, ngapotana handa mundu jwapota penipala pangali chilebhe. 27Bahi, ndendakugulagia mmele gwangu na kugutumikicha ili penipala panaatangachianga bhandu bhangi Ngani Jammbone, ngotokubhee mundu jwakanikwa.

Currently Selected:

1 Bhakolinto 9: NTNHBL

Highlight

Copy

Compare