1 ISamuel 9
9
ISamuel A ye fan Isol
1I mang yi r'unyiche a mu inyie gbaa ng' i ba yè k'iBenjamin, e kuo he de iKish unwa Abiel, ng'i yi unwa iJero, unwa iBekorat, ng'i yi unwa Afia ng'i ba yè k'ityang iBenjamin. 2Ehe i yi r'unwan unyiche ng'e kuo dee iSol, iSol a hum unung gbaa k'i yi r'uni k'Ijirel ng'a hum unung bii he re, ehe a kan irikuo fu eni woo k'Ijirel. 3K'unyang ana ityokaba iKish ide iSol e mang nyim, iKish a ka de iSol dee, <<Kuo unwantung ichom kin k'amin e ye ten chaa ityokaba abana.>> 4Nang ana, ehe a chaa gbe k'itang ityang Efram ng'i yi agaagoo jung gbe k'iShalisha, ayini abe e ne ityokaba abana re. Abe e ye k'uchu gbaje k'iyia iShaalim, ayini abe e ne ityokaba abana ka re. Nang ana ehe mang chaa gbe k'itang ityang iBenjamin ayini abe e mang niniine ityokaba abana re. 5K'unyang ng'abe e gbaje k'iyia iJuf, iSol a de unwatung ichom ang'a ye n'ahe dee, <<Be k'abere e tum itum ye k'uchu, ha re ide iyi i ba tyang abo r'ajimini gbe r'ityokaba ne bá uhung iten.>>
6Ayini unwatung ichom ana a hara dee, <<Ne ngin, i yi r'uni Atabuchi k'udyara angin kin ng'i yi aheni-uch gbaa, iyem ang'kung-kung-kung ng'ahe a kang i cha nang. K'abere e ye ka, o ne re, ehe i da ti ukwo ang'abere e chaa gbe k'e ne ityokaba abana.>>
7ISol a bii unwatung imin dee, <<K'abere e ye ka, i bang h'abere e kwa kin e ba ka unwachie yen? Iriji ang'ukere iten kin, a mia ma. Abere e yi r'uke kin k'e ba kwa ya ka uni Atabuchi ana re. Ibang h'abere e kwa kin?>>
8Unwatung imin a hara ahe dee, <<M yi r'iSiliba kin k'ígum ishekel m'ba kung ka uni Atabuchi ana k'i da ti ukwo ang'abere e mang ba chaa gbe.>> 9Gburu-gburu k'Ijirel, k'uni a nuo ya bii Atabuchi iyem, ehe i kang dee, <<Be k'abere e pom uni ang'i na ine,>> k'ucheche dee, eni ab'e yuo yè k'unwu Atabuchi kang, e yi kuo abe dee, e ne-ine.
10ISol a de unwatung imin dee, <<Ataanung, be k'abere e ye ka.>> Nang ana abe e tang ukwo nuo k'irihung uchu k'ipi uni Atabuchi ana i yi.
11Ng'abe e kwa muo k'agoo nuo k'irihung-uchu ana, abe e kpere r'ebwatung enyinye b'e nuo ya tuo umo, ab'iSol e ka bii abe dee, <<O ne-ine i yi k'irihung uchu kìn a?>>
12Abe e hara dee, <<I yi kin, i yi k'uchú ana ka. Amin e ye achiche, ehe a be k'udyara iten onyin angin, k'ucheche de e yi r'ukum ashangani k'ipi e shang ukum ngana ka. 13Ukuukwo ng'amin e nwia k'udyara ana, amin e ba na he mokpang ehe i ka ya iriji ajini k'ipi e shang ukum. Eni e ba kpa iku iriji ajini re kpemm k'ehe i gbaje ka, k'ucheche de, ehe i yi k' i ka iriji abana ukwun mokpang eni abe e kuo be k'ipam iyen e ka ja. Amin e ye yee ngin, amin e ba na he ka.>>
14Nang ana, abe e ye k'irihung uchu. K'unyang ang'abe e kwa e nwia k'udyara ana, abe e ne iSamuel nga kpere r'abe kwa nuo k'ipi e shang ukum.
15Mokpang irite ang'iSol a be ngana, Onyua-Iye a tyung iSamuel dee: 16<<Ufo k'unyang angin, m ba chom unyiche kin yè k'ityang iBenjamin fan awo. Kwa he ushe k'i negbe r'eni iyi Ijirel. Ehe i ba pang eni iyi tyang yè k'abo eni iFilistia. Ma shiri achi fan eni iyi ma, k'ucheche de uchie ibere a gbaje k'atyung iyi ma.>>
17Ukuukwo ng'iSamuel a ne iSol, Onyua-Iye a kang n'ahe dee, <<Uni ang'm kang na awo gbe r'ahe ngin h'a nung ngin.>>
18ISol a ten ye fan iSamuel k'unwu ityang kung bii he dee, <<Chuchu i nyin wo k'o tyung mi uchom uni ang'i na ine a?>>
19ISamuel a hara dee, <<Ami h'm yi one-ine ngin, chaauchu iyi noti k'ipi e shang ukum, k'ucheche de onyin angin o ba ja iriji gwa abo ha n'ami, ufo r'ite m ba da wo iyem woo ab' i yi wo k'irityem ka tyang wo k'o ya. 20Jim gbe r'ityokaba iwon ab'e nyim k'igbaje k'ate achia ma ngin re; e ne abe ma. Ayung h'ujim eni Ijirel woo e shiri n'ahe ngin, awo ha r'ikurifen ide iwon nga re a?>>
21ISol a kung hara he dee, <<Ami h'm ba yè k' iBenjamin, ityang ang'a jun fu woo k'Ijirel ngin re a? Ikaa-ubang iyi h'a yi kwee fu woo k'ityang iBenjamin ngin re a? I bang h'o kang ugba irikang nangg n'ami ngin?>>
22Nang ana, iSamuel a be r'iSol ahe n'unwatung imin be k'aha uchom, ke abe inang k'e chi k'ipi aheni-uchi k'iriwu eniga ab'e kuo, b'e yi k'e gbaje k'eni irichi r'ahe irifo. 23ISamuel a kung de oshi-iriji dee, <<Kung item-inyam ang'maa ke wo de o naa atyitye ana be r'ahe.>>
24Nang ana, oshi-iriji a kung unam-inyam r'itém-inyam ang'a pom r'ahe be naa k'abia iSol. ISamuel a dee, <<Inyam ang' e naa wo h'a yi ngin. Kung k'o ji, k'ucheche de e wam angin naa wo k'uchikpakpa k'ipam angin yè k'unyang ng'm maa kang dee, <M ba cha r'eniga.> >> Nang ana iSol a ji iriji gu abo he n'iSamuel k'irite ana.
25K'unyang ng'abe e hum iye yè k'ipi e shang ukum be k'irihung uchu, iSamuel a muo r'iSol ye k'irikwie uchom imin kang irikang n'ahe. 26K'achi irite, iSamuel a kuo iSol k'irikwie uchom ka kung de he dee, <<Gung ufo, M ba chom wo tum ya k'uchu.>> K'unyang ng' iSol a gung ufo mia, abe n'iSamuel e hum iye he abia. 27Ng'abe e ten naa achi nuo k'ujung udyara ana, iSamuel a de iSol dee, <<De unwatung iwon, de i chaa-uchu iten no ti, ayini, awo o chi ngin k'unwa-unyang, k'm de wo ichom ang'Atabuchi a chom.>> Unwatung ana a ka chaa-uchu ibere ye k'uchu kwee.
Currently Selected:
1 ISamuel 9: BKV
Highlight
Copy
Compare
Share
Want to have your highlights saved across all your devices? Sign up or sign in
©2024 The Nigerian Bible Translation Trust
