Tito 3
3
Ya bet na manga utaw na nyangintu-u sa Tyumanem
1Gayed pa-anenganengan sa manga mangintu-uway na ka͡agadan nilan ya manga migdumala kanilan aw kadég na awun katundanan dun ni gubirnu aw tumanen ya manga suguꞌ nilan. Pa-anenganengan uman kanilan na gayed silan makatagilan sa pag-imoꞌ sa pangkay unu na madyaw na imo-unun, 2aw diliꞌ silan maglong sa malatay adti pangkay singalan, aw diliꞌ magpa-ayil, manang gayed nilan pagpakadyawun ya kadég na utaw aw magpadalem silan.
3Kay kitadun uman, idtu na muna walaꞌ tadun kalabeti ya Tyumanem aw walaꞌ tadun daluga ya manga suguꞌ nan. Nyakasuway kitadun aw nya-allang na pangkay unu na pagkaliman na pagka-utawun tadun. Yan oloꞌ ya gayed tadun pig-anenganeng ya makapagkalat sa dengeg na manga eped na utaw, aw mig-inga-inga-ay ya kadég tadun aw migkakalatay kitadun sa ginawa. 4Manang dyumateng ya allaw na pigbukasan na Tyumanem na kanaten Magpaluwa-ay ya kanan kadyaw aw ya kadakulaꞌ na pagginawa nan. 5Pigpaluwaꞌ kitadun nan, bekeꞌ na asuntu sa mangkadyaw na pigpan-imoꞌ tadun manang asuntu baling sa kanan kallat. Aw ya pagpaluwaꞌ nan kanaten, magi saba sa paglinis na Ispiritu Santo aw pagbagu nan sa ginawa tadun. 6Ya Ispiritu yeiy pig-atag na Tyumanem kanaten magi kan Jisu-Kristu na Magpaluwa-ay tadun 7pada dawaten kitadun na Tyumanem kasiling na walaꞌ da ya salaꞌ, magi sa kanan kallat. Aw asuntu sa pagdawat nan kanaten, awun pig-iman tadun na matagtun tadun ya ginawa na walaꞌ ya katigkasan.
8Ya piglong ku kanmu asini sulat ini, alag yeiy matinaw, aw umbaꞌ tadun saligan. Yanagaw kaliman ku na palna-u mu yeiy adti manga utaw na nyangintu-u la sa Tyumanem, pada to-o silan magkaseb sa pag-imoꞌ sa mangkadyaw na imo-unun. Ya palna-u yeiy alag madyaw, aw dakulaꞌ ya ma-untung na kadég na utaw.
9Manang diliꞌ kaw magpasambuk sa manga utaw na magpanubbuk sa ayil na walaꞌ ya ma-untung, aw sa manga Judiyu na gayed migtultulanen sa kasampetanen na muna utaw, dala ya pag-ayil sa kanilan Uldin, kay walaꞌ ya guna na maynan aw walaꞌ ya un na utaw makamang dun. 10Aw kun awun utaw dun ni kamayu na yan ya du-an na awun pagkatenga-tengaꞌ na manga mangintu-uway, pagsagda͡an ya utaw yan. Kun diliꞌ sakanan tumeneng sa pig-imoꞌ nan, pagsagda͡an pa uman. Aw kun kenneꞌ pa nan imo-un, diliꞌ da kamu magpasambuk kanan, 11kay kya-ede-an da mu na ya utaw yan nyakasalaꞌ sakanan adti Tyumanem aw nyakasuway lekat adti matinaw. Aw ya utaw yan, nya-edeꞌ saba na malatay ya pig-imoꞌ nan.
Ya katigkasan na palna-u ni Pablo kan Tito
12Na, diliꞌ madugay padala ku adti kanmu ya sambuk na inulug tadun, kun bekeꞌ ni Artémas, si Tikiko. Pagdateng nan, tibagsegi na maksay kaw madtu ni syudad na Nikapolis aw dun da kita pagkitaꞌ, kay yan ya pagbayaꞌ ku na adtu pa aku pag-eyaꞌ dun ni manga bulan na manikiꞌ.
13Na, si Apolos aw ya abugadu na si Zénas, tibagsegi na tabangan mu silan dun ni kanilan pagpanaw pada malingeb ya manga kapelekan nilan. 14Aw palna-uwi ya kadég na mangintu-uway na magkaseb silan aw matibulluk dun ni mangkadyaw na imo-unun, pada mabatug nilan ya pagtabang sa manga utaw na migkapelek. Kay kun imo-un nilan ya maynan, awun saba ma-untung dun ni manga pigpan-imoꞌ nilan.
15Ya kadég na eped ku idi nyangumusta kanmu. Aw pangumusta͡an kami uman sa manga mangintu-uway dun na gyuminawa kanami.
Ayin pa aku galu na gayed awun ni kadég mayu ya grasya na kanaten Matas na Pangulu.
Currently Selected:
Tito 3: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
