Tito 2

Ya matinaw na palna-u

1Manang ikaw, kay Tito, yan ya gayed mu palna-u ya bet na umbaꞌ na nyaka-unawa sa matinaw na palna-u.

2Ya manga eseg na unud da ya ginawa, palna-uwi silan pada katagenan nilan ya kanilan pagka-utawun aw madyaw ya kanilan dengeg, aw una nilan pag-anenganengen ya umbaꞌ nilan imo-un. Aw paglonga na pakasaligen nilan ya kanilan pagpangintu-u aw to-o nilan ginawa͡an ya kanilan manga eped aw magpadeleg silan pangkay unu ya un dumateng.

3Maynan uman ya manga ka͡ubayan na unud da ya ginawa, palna-uwi silan sa umbaꞌ na bet na alag maka-unawa sa pagpangintu-u nilan sa Tyumanem. Diliꞌ silan maglong sa makapagkalat sa dengeg na eped na utaw aw diliꞌ silan pala-inem sa magpakalangulangu. Manang yan baling ya imo-un nilan ya pagpalna-u adti eped sa madyaw na makatutuk sa Tyumanem. 4Imo-un nilan yeiy pada magagad nilan ya manga ka͡ubayan na bagu pa ya ginawa na un nilan ginawa͡an ya kanilan manga eseg aw manga mangayseꞌ, 5aw una nilan pag-anenganengen ya umbaꞌ nilan imo-un, aw madyaw ya pagdala nilan sa kanilan pagkaka͡ubayan, aw maseb silan sa manga imo-unun dun ni balay, aw madyaw ya kanilan bet adti kadég na utaw, aw pagka͡agadan nilan ya kanilan manga eseg. Aw kun maynan ya bet nilan, walaꞌ ya makapaglong sa malat adti tingeg na Tyumanem.

6Maynan uman ya manga eseg na bagu pa ya ginawa, to-o pakabagsega ya ginawa nilan na pagtagenan nilan ya kanilan pagka-utawun. 7Aw ikaw kay Tito, ka-ilangan na ma-imoꞌ kaw pundinganan dun ni manga imo-unun mu na madyaw. Aw dun ni pagpalna-u mu kita-en na mig-unawa ya pig-imoꞌ mu aw ya pigpalna-u mu, aw kita-en uman na pigbasa͡an mu ya tingeg na Tyumanem. 8Aw pakatanawan mu ya kanmu paglongun na walaꞌ ya magsalaꞌ, pada mamulamula ya utaw na magtanemtanem kanateꞌ sa tingeg kay walaꞌ ya indeganan nilan maglong kanateꞌ sa malat.

9Aw palna-uwi ya manga allang na ka͡agadan nilan ya tagtun kanilan aw tibagsegan nilan na katutukan ya tagtun dun ni kadég na imo-unun nilan. Diliꞌ silan magtubagtubag 10aw diliꞌ silan magpangamang sa manga pametang na tagtun kanilan, manang pakitaꞌ baling nilan na to-o silan kasaligan. Kun maynan alag ya imo-un nilan, basa͡an saba na manga utaw ya palna-u tadun sa Tyumanem na kanaten Magpaluwa-ay.

11Kay pigbukasan da na Tyumanem ya kanan kallat adti kadég na utaw pada makaluwaꞌ silan. 12Aw magi sa kallat nan, pigpalna-uwan nan kitadun na talikudan tadun ya imo-unun na diliꞌ magpakatutuk sa Tyumanem aw ya pagkaliman na kanaten pagka-utawun. Pigpalna-u nan kanaten ya katadeng sa pagdala sa kanaten pag-eyaꞌ, aw ya pag-imoꞌ sa matulid adti anenganeng nan, aw ya pagdalug sa bet na Tyumanem talana pa tadun nyeyaꞌ asini tas na lupaꞌ. 13Yeiy ya pig-imoꞌ tadun talana kitadun tyumagad sa allaw na to-o madyaw na pig-iman tadun na bukasan ya kanaten Magpaluwa-ay na si Jisu-Kristu dala ya kadakulaꞌ na kadyawan na pagka Tyumanem nan. 14Pig-atag nan ya kanan pagka-utawun na un patayen kalyu kanaten, pada lekaten kitadun lekat adti pag-allang na manga salaꞌ aw linisan kitadun na un ma-imoꞌ kanan manga utaw na to-o matibulluk sa pag-imoꞌ sa madyaw.

15Na, palna-uwan ya kadég yeiy adti manga utaw. Pakabagsega ya pagpangintu-u nilan, aw pagsagda͡an ya manga utaw na diliꞌ malim dumalug sa palna-u ini kay awun saba katundanan mu kanilan. Diliꞌ mu pagtumbay na palipaslipasan na pangkay singalan ya palna-u mu.

Currently Selected:

Tito 2: klgv

Highlight

Copy

Compare