Tito 1

1Kay Tito, aku si Pablo ya migsulat adti kanmu. Sugu-anen aku na Tyumanem aw sambuk uman na apostol ni Jisu-Kristu. Pigsuguꞌ aku nan pada pakabagsegen ya pagpangintu-u na manga utaw na pigpamalliꞌ da dadan na Tyumanem aw ka-ede-an nilan ya matinaw na palna-u pada dalugun nilan ya kanan bet. 2Aw awun imanen nilan na ginawa na walaꞌ ya katigkasan na yeiy ya pigpakang asini muna na Tyumanem, aw diliꞌ saba sakanan maggaluꞌ. 3Aw pagdateng da na allaw na pigpamalliꞌ nan, pigpa-edeꞌ da nan ya Madyaw na Ubat-ubat kan Kristu. Aw sambuk aku na pigtaliguwan na mag-ubat-ubat adti madég na utaw magi sa suguꞌ na Tyumanem na kanaten Magpaluwa-ay.

4Pigsulatan ta kaw na pigsiling ku na kanak tengteng iseꞌ kay migsambuk da kita dun ni pagpangintu-u kan Jisus.

Padatengen galu adti kanmu ya grasya aw kalinaw na lyumekat adti Tyumanem na yan ya Ama aw adti kan Kristu Jisus na kanaten Magpaluwa-ay.

Ya bet na umbaꞌ sa utaw na ma-imoꞌ maggagaday sa manga mangintu-uway

5Na, kay Tito, yan ya du-an na pig-ayawan pa ta kaw dun ni puluꞌ na Krita na un padelegen ya walaꞌ pa nateꞌ kalingeb aw mamalliꞌ kaw sa manga utaw na un maggagad sa manga mangintu-uway adti tagsambuksambuk na lunsud, kasiling na pigpalna-u ku kanmu. 6Aw yan ya pamalli-en mu ya eseg na walaꞌ ya pagsalaꞌ sa bet nan. Sambuk da ya ka͡ubayan nan. Aw mangintu-uway sa Tyumanem ya mangayseꞌ nan, aw walaꞌ ya makapaglong kanilan na mig-imoꞌ silan sa malatay, aw diliꞌ uman sagda͡enen. 7Kay ya utaw na pag-imo-un maggagaday sa manga mangintu-uway, un sakanan taliguwan sa imo-unun na Tyumanem, aw ka-ilangan na diliꞌ pagsala-en ya bet nan. Diliꞌ sakanan magpatastas aw diliꞌ uman maksay magkadaman. Diliꞌ pala-inem sa magpakalangulangu aw diliꞌ matipanumbagay. Aw diliꞌ sakanan magginawa sa kuwalta. 8Manang magpamasa sakanan sa utaw na makalabaꞌ adti balay nan. Pagleya͡an nan ya pangkay unu na madyaw. Aw una nan pag-anenganengen ya umbaꞌ nan imo-un, aw matinaw ya kanan pagbayaꞌ. Nyatibulluk ya ginawa nan adti Tyumanem, aw matadeng magtagen sa pagkaliman na pagka-utawun nan. 9Aw ka-ilangan na to-o nan awidan ya matinaw na palna-u, pada palna-u nan uman sa manga utaw aw ka-ede-an nan kun unun ya pagtulid sa manga nyatu seiy.

10Kay madég ya manga utaw na diliꞌ malim dumalug sa matinaw na palna-u, dala ya manga utaw na magkasampetanen sa walaꞌ ya guna aw maggaway sa manga eped nilan. Labi la ya manga Judiyu na nyangintu-u la kan Kristu manang kenneꞌ nilan pigpalna-u na dalugun galu na kadég na mangintu-uway ya katanem na manga Judiyu. 11Madyaw pa na pigilan silan. Kay dun ni pagpalna-u nilan, pigkalat nilan baling ya pagpangintu-u na madég na utaw, matag pilang ka balay ya pigpasuway nilan. Aw makamulamula͡ay ya pig-imoꞌ nilan kay yan oloꞌ ya tud na pagpalna-u nilan ya manguwalta. 12Yan saba ya piglong asini muna na sambuk na utaw na to-o matadeng na taga Krita, law nan, “Ya manga utaw na taga Krita, gayed silan maggaluꞌ. Mabulut aw malat ya bet nilan. Mangkataka silan aw ya kaliman nilan oloꞌ ya kuman.” 13Aw matinaw saba ya piglong nan. Yanagaw to-o mu silan pagsagda pada magkasalig ya pagpangintu-u nilan, 14aw diliꞌ da silan magka-agad-agad sa manga kasampetanen na pig-imo-imoꞌ oloꞌ na manga Judiyu, aw diliꞌ da uman dumalug sa manga suguꞌ na manga utaw na tyumalikud da sa matinaw na palna-u. 15Adti manga utaw na kyalinisan da na Tyumanem ya anenganeng nilan, ya kadég uman alag da malinis adti kanilan. Manang ya manga utaw na walaꞌ pangintu-u sa Tyumanem, walaꞌ ya kalinis nilan kay alag malipaꞌ ya adti anenganeng nilan. Aw walaꞌ nilan ka-ede-i kun unu ya madyaw aw unu ya malat kay nyabaluk ya kanilan anenganeng. 16Miglong silan na kya-ede-an da nilan ya Tyumanem, manang dun ni kanilan imo-unun liwan na pigbalyaw nilan sakanan. Mangkalipaꞌ saba silan adti anenganeng na Tyumanem. Walaꞌ nilan daluga ya matinaw na palna-u. Aw walaꞌ ya un ma-untung adti kanilan kay diliꞌ nilan mabatug ya pag-imoꞌ sa madyaw.

Currently Selected:

Tito 1: klgv

Highlight

Copy

Compare